« »

Բանկ և հաճախորդ

Ինեկոբանկ

Թե ինչու է հոդվածի գլխավոր նկարում երևում Ինեկոբանկը, Դուք կհասկանաք հոդվածի վերջում: Իսկ մինչ այդ պատմեմ մի փոքրիկ պատմություն:

Այն, թե ինչ կարևորություն պետք է տա ցանկացած կազմակերպություն հաճախորդների հետ շփմանը, կարծում եմ՝ հասկանում են բոլորը: Եվ դա առավել կարևոր է, երբ այդ կազմակերպությունը բանկ է: Վերջերս երկու նամակ ուղարկեցի հայկական տասնութ առևտրային բանկեր, որոնցում խնդրում էի պատասխանել ինձ հետաքրքրող երկու հարցերի: Հարցերից մեկը հետևյալն էր՝ «հնարավո՞ր է արդյոք ընկերության հաշվարկային հաշվին Master քարտ կցել», իսկ երկրորդը՝ «կարո՞ղ է արդյոք բանկը միջնորդ հանդիսանալ արտասահմանյան որևէ այլ բանկում հաշիվ բացելու համար»:

Բանկերից ոմանք պատասխանեցին միայն նամակներից մեկին, մյուսները՝ ընդհանրապես չպատասխանեցին, բայց ես ուզում եմ խոսել այն միակ բանկի մասին, որը պատասխանեց երկու նամակներին էլ: Ինչպես հասկացաք՝ դա Ինեկոբանկն էր: Նամակների պատասխանները պարզ էին ու համառոտ, դրանցում չէին գովազդվում բանկի ինչ-որ ծառայություններ (որը հանդիպում էր որոշ այլ բանկերի պատասխաններում), այսինքն՝ «կոնկրետ հարց – կոնկրետ պատասխան»:

Երբ ես ուղարկում էի այդ նամակները, դա ինձ պետք էր անձնական նպատակներով և ես չէի պատրաստվում դրա մասին գրել Հաջողության բլոգում: Բայց հետո մտածեցի՝ իսկ ինչո՞ւ ոչ: Ինչո՞ւ չխրախուսել կազմակերպությանը իր լավ աշխատանքի համար և ինչու չգրավել մյուս կազմակերպությունների (ոչ միայն բանկերի) ուշադրությունը մեր օրերում այդքան կարևոր դարձած էլեկտրոնային շփման մշակույթի վրա: Բոլորս էլ գիտենք, որ համացանցի զարգացման հետ մեկտեղ ավելի հանրահայտ է դառնում կազմակերպություն-հաճախորդ էլեկտրոնային շփման տարբերակը, հիմնականում՝ էլեկտրոնային նամակի միջոցով: Եվ եթե հայկական բանկերի և այլ խոշոր կազմակերպությունների մոտ այդ մշակույթը ինչ-որ չափով զարգացած է, ապա միջին և մանր կազմակերպություններից շատերը դրա վրա լուրջ ուշադրություն չեն դարձնում: Այդ պատճառով էլ, տալիս ենք մի քանի խորհուրդներ, որոնք հուսով ենք՝ Ձեզ օգտակար կլինեն:

1. Կազմակերպությունը պետք է ունենա կայք և էլեկտրոնային հասցե

Այսօր բիզնեսը տեղափոխվում է համացանց և ցանկացած իրեն հարգող կազմակերպություն պետք է մտածի իր կայքը և էլեկտրոնային հասցեն ունենալու մասին: Պետք չէ թերագնահատել կայքի, կազմակերպության ծառայություններն ու ապրանքները էլեկտրոնային միջավայրում ներկայացնելու և հաճախորդների հետ էլեկտրոնային եղանակով շփվելու կարևորությունը: Բիլլ Գեյթսն ասել է. «Ապագայում շուկայում կմնան երկու տիպի ընկերություններ՝ նրանք, որոնք կան համացանցում և նրանք, որոնք ընդհանրապես չկան»:

2. Անհրաժեշտ է պատասխանել նամակներին

Ցանկացած կազմակերպություն, որն ունի էլեկտրոնային հասցե, պետք է շատ լուրջ վերաբերվի իրեն հասցեավորված նամակներին: Երբ կազմակերպությունը իր փոստարկղում տեսնում է ստացված նոր նամակ, նա դեռ չգիտի, թե ո՞վ է այդ նամակն ուղարկել: Միգուցե՞ դա Ձեր ապագա գործընկերն է, կամ Ձեր ամենահավատարիմ հաճախորդը, կամ ցանկացած այլ մարդ: Այդ պատճառով էլ, պետք է նախ՝ անպայման պատասխանել նամակին և երկրորդը՝ պատասխանել այնպես, կարծես նամակը եկել է այս պահին Ձեր համար ամենակարևոր նշանակությունը ունեցող մարդուց: Այդպես Դուք և վստահություն կներշնչեք Ձեր հաճախորդներին և կստիպեք նրանց հետագայում շարունակել օգտվել Ձեր ծառայություններից:

P.S.

Շատ հաճելի կլիներ, եթե այս հոդվածը հասներ Ինեկոբանկի ղեկավարությանը և նրանք խրախուսեին համապատասխան անձին: Հիշեք, ցանկացած կազմակերպության իրական արժեքը իր աշխատողներն են:


Հարգելի հաճախորդ,

Տեղեկացնում ենք Ձեզ, որ ԻՆԵԿՈԲԱՆԿ ՓԲԸ-ում MASTER քարտը կցվում է կազմակերպության քարտային հաշվին, որն առանձին հաշվեհամար է, այլ ոչ թե հաշվարկային հաշվին:

Կից ներկայացնում ենք քարտային հաշվի սպասարկման պայմանները:

Նշենք նաև, որ մինչև 31.12.2011թ. Բանկում գործում է ակցիա և MASTER BUSINESS քարտերի առաջին և երկրորդ տարվա սպասարկման վճարները 50%-ով զեղչված են, այսինքն 5,000.00 ՀՀ դրամ:

Հարգանքով,

ԻՆԵԿՈԲԱՆԿ ՓԲԸ


Հարգելի Հաճախորդ,

Ձեր և օտարերկրյա բանկի միջև հարաբերություններում < <Ինեկոբանկ>> ՓԲԸ-ն չի կարող հանդիսանալ որպես որևէ կողմ, հետևաբար մենք չենք կարող այդ հարցում Ձեզ օգնել:

Հարգանքով,

ԻՆԵԿՈԲԱՆԿ ՓԲԸ

The following two tabs change content below.
Անձնային աճի և ինքնազարգացման գծով հեղինակ, Հաջողության բլոգի հիմնադիր, «Փոխիր կյանքդ» և «Կամքի ուժ. ինչպես ղեկավարել սովորությունները» գրքերի հեղինակ, օգտակար կարծիքներ ստանալու Թրութլի հարթակի համահիմնադիր:
2 տարբերակ մեր հոդվածներին բաժանորդագրվելու համար


Մեկնաբանել

Ձեր էլ. հասցեն չի ցուցադրվի կայքում: Պարտադիր դաշտերը նշված են *-ով:

error: Կյանքն ավելի հրաշալի է, երբ ստեղծում ես սեփական «բովանդակությունը»