« »

Երանի

Երանի

Կյանքը լույսի ու ստվերի հանդիպման խաչմերուկն է: Երանի ստվերները չդողային լույսից, զգալով, որ կյանքի թելերով կապված են նրան:
Աշխարհում ավելի հեշտ է կասկածել, քան՝ հավատալ: Երանի մարդիկ հավատային, որ երազանքը կարող է ավելի հզոր լինել, քան իրականությունը:
Մարդիկ զմայլվում են ծովով և փորձում գտնել նրա անծայրածիր ափերի եզրերը: Երանի ծովին նայելիս մարդիկ հիշեին, որ նրա անսահման կապույտը երկնքից է գալիս:
Ազատություն սիրող թռչունները գերի են գարնան ջերմությանը: Երանի նրանք դիմանային ձմռան սառնամանիքին և վայելեին ձյան գեղեցկությունը:
Դժվար է սառույցի վրա քայլել և չմտածել ընկնելու մասին: Երանի մարդիկ վստահ քայլեին, քանի որ ընկնելու մասին միտքը թուլացնում է ոտքերը:

Մարդիկ անհամբերությամբ են սպասում բնության զարթոնքին: Երանի նրանք հասնեին գարնանը և իրենց սրտերի ջերմությամբ վառեին բնության գույները: Այդ կախարդական գույների թափվող ալիքներից է ջրվեժը, որի գեղեցկությունը մարդիկ վայելում են այնքանով, որքանով կարողանում են բարձրացնել իրենց գլուխը: Երանի մարդիկ ջրվեժը տեսնելիս հիշեին, որ նրա ջուրը սկսում է ցած թափվել շատ ավելի վերևից:
Բնությունը գեղեցկացնում են ծաղիկները, որոնց թերթերը հիշեցնում են բարի սրտերի քնքշությունը: Երանի մարդկանց համար ծաղիկներ նվիրելն ավելի հաճելի լիներ, քան՝ ստանալը:
Մարդիկ ապրում են՝ սպասելով ճակատագրի կողմից պատրաստված բարեբախտությանն ու հաջողությանը: Սակայն այն միշտ չէ, որ բարի է և երբեմն մարդկանց մատուցում է տհաճ անակնկալներ: Երանի մարդիկ ճակատագրից առաջ ընկնեին և իրենք ստեղծեին իրենց բախտը:
Կյանքի «երթուղին» մարդկանց տանում է վեր ու վար: Երանի կյանքում կողմնորոշվելն ավելի հեշտ լիներ, քան՝ մոլորվելը:
Հաճախ մարդիկ դժգոհում են աշխարհում իրենց զբաղեցրած տեղից: Երանի նրանք դժգոհելու փոխարեն փորձեին հասնել այն վայրը, ուր տանում է իրենց երազանքը:
Երկրագունդը պտտվում է և գիշերն անխուսափելի է: Երանի առավոտն այնքան հավերժական թվար, որքան՝ գիշերը:

Կյանքը լի է փորձություններով, որոնցով սնվում է ուժի աղբյուրը: Երանի մարդիկ չհուսահատվեին փորձություններից, քանի որ նրանցով կոփվում է կամքը:
Կյանքի գինն ապրելու խնդիրն ու մահն է: Երանի ապրելն այնքան հեշտ լիներ, որքան՝ մեռնելը:
Մարդիկ փնտրում են երջանկություն, որը կյանքի քաղցրությունն է: Երանի երջանկությունը խոսել իմանար և մարդիկ կհասկանային, որ այն իրենց ներսում է:
Անհնար է խուսափել սխալներից: Երանի սխալներն ընդունելն ավելի հեշտ լիներ, քան ուրիշներին մեղադրելը:
Կանգնած լինելով գետնի վրա՝ շատերը զգում են իրենց ամպերի մեջ: Երանի մարդիկ զգային հողի ամրությունը, որպեսզի վեր բարձրանալն ավելի հեշտ լիներ:
Մարդիկ սպասում են, թե երբ է հայտնվելու ինչ-որ մեկն ու հարթելու իրենց հաջողության ճանապարհը: Երանի նրանք չսպասեին որևէ մեկի օգնությանը, քանի որ յուրաքանչյուր ճանապարհ սկսվում է իրենցից:
Մարդկանց հաճախ է այցելում հոգնածությունը, որը հանգստի խոստում է: Երանի մարդիկ հասկանային, որ այն տրված է բացահայտելու չօգտագործված ուժերը:

Երանի-երանի… Այս բառը մարդկանց երկու խմբերի է բաժանում: Առաջին խմբի համար այն կարոտ ու տենչանք է: Մյուսների համար՝ երազանքներ ունենալու և դրանց հասնելու շարժառիթ:
Երանի ունենանք մեծ երազանքներ և փորձենք հասնել նրանց իրականացմանը: Կյանքը տալիս է այն՝ ինչն ուզում ենք վերցնել ինքներս: Երանի կարողանանք մեր երազներից իրականություն վերցնել…

The following two tabs change content below.

Ալլա Լույս

Վերջին հոդվածները: Ալլա Լույս (տեսնել բոլորը)

Թեգեր: ,
2 տարբերակ մեր հոդվածներին բաժանորդագրվելու համար


5 մեկնաբանություն

  1. Ալլա ջան ես հաստատ գիտեմ, դուք վերջում Ջոան Ռոուլինգ եք դառնալու..

    • Luka ջան, շատ շնորհակալ եմ: Ձեր գնահատականն ընդունում եմ որպես մաղթանք: Ինձ համար Ռոուլինգը ( մարդ՝ ով հասել է հաջողության գրականության շնորհիվ) ոգեշնչման մեծ աղբյուր է: Ես երազում եմ դառնալ հանրահայտ և իմ լեգենդներով ու նրանց հիման վրա նկարահանված ֆիլմերով ուրախություն պարգևել շատ մարդկանց: Դա իմ կյանքի մեծագույն նպատակն է:

      • Ալլա ջան եթե կա նպատակ, ուրեմն կա ուղղություն, շարժվեք այդ ուղղությամբ և վերջիվերջո կհասնեք:

  2. Ինչքա~~~~ն լավն էր
    Շատ շնորհակալություն
    Ուղղակի կախարդական խոսքեր….
    Ալլա ջան շատ գեղեցիկ էր գրված, գրելու ձիրք ունեք 🙂
    :):):):)

    • Էմմա ջան, շատ մերսի: Հաճելի է, որ հավանել եք: Անչափ շնորհակալ եմ, որ գեղեցիկ խոսքերով ոգևորում եք ինձ:

Մեկնաբանել

Ձեր էլ. հասցեն չի ցուցադրվի կայքում: Պարտադիր դաշտերը նշված են *-ով:

error: Կյանքն ավելի հրաշալի է, երբ ստեղծում ես սեփական «բովանդակությունը»