Անձնային աճ

7 նշան, որ ժամանակն է ձեր կյանքը փոխել

Յուրաքանչյուր մարդ արժանի է երջանիկ և հաջողակ լինելու, ներդաշնակ կյանք ապրելու: Սակայն մեր ցանկությունները ոչ միշտ են համընկնում իրականության հետ, և ինչ-որ պահից սկսած մենք սկսում ենք ապրել ոչ այնպես, ինչպես պետք է: Եվ գալիս է մի պահ, երբ հասկանում ենք, որ մեր կյանքը պետք է փոխել: Ահա 7 նշաններ, որոնք ձեզ կհուշեն, որ այդ պահը եկել է:

1. Ավելի հաճախ դուք աշխատանքի եք գնում անհանգիստ

Օրվա և շաբաթվա մեծ մասը մենք անց ենք կացնում աշխատանքի վայրում: Անհանգստությունը կամ վախի զգացումը, որն առաջանում է, երբ դուք արթնանում եք՝ գիտակցելով, որ աշխատանքի պետք է գնաք, կամ հանգստյան օրերն են ավարտին մոտենում, հստակ նշան է, որ ինչ-որ բան այնպես չէ: Ժամանակ հատկացրեք պարզելու համար, թե ինչն է աշխատանքի վայրում ձեզ անհանգստացնում և ծրագիր կազմեք դա փոխելու համար:

2. Դուք ապրում եք միայն անցյալով կամ երազում ապագայի մասին

Երբ ձեր կենտրոնացման թիրախում անցյալի լավագույն ժամանակներն են կամ այն, թե ինչ կարող է լինել ապագայում, դա կարող է նշան լինել, որ դուք փորձում եք փախչել ներկայից: Իհարկե՝ երազելը լավ է: Սակայն դա նաև նշան է, որ ներկայում ինչ-որ բան այնպես չէ, ուստի դա ձեզ պետք է փոփոխությունների մղի:

3. Դուք անընդհատ լսում եք մարդկանցից, որ «ձեզ հանգիստ է անհրաժեշտ»

Եթե դուք պարբերաբար լսում եք նույն կոչը ընկերներից և ծանոթներից, ապա միգուցե ժամանակն է պարզելու, թե ինչ է դրա հետևում ընկած: «Քեզ հանգիստ է անհրաժեշտ»-ը մեր օրերում հնչում է որպես «Թող դա»: Ուստի, եթե լսում ենք դա կրկին և կրկին, ապա մտածեք. միգուցե՞ կառչել եք որևէ բանից, որ պետք է բաց թողնել:

4. Դուք նախանձում եք այլ մարդկանց հաջողություններին

Նախանձը՝ սեփական կյանքի հանդեպ դժգոհության նշան է, որը որևէ կապ չունի մյուսների ձեռքբերումների հետ: Դժվար է երջանիկ լինել այլ մարդկանց հաջողություններով, երբ մենք ասես խրված ենք սեփական կյանքի մեջ: Ժամանակն է հարցնելու ինքներս մեզ, թե ինչ է մեր նախանձը նշանակում:

5. Դուք արթնանում եք հոգնած

Անընդհատ հոգնած արթնանալն ինչ-որ բանից դժգոհ լինելու նշան է, և դա կարող է կապված լինել ոչ թե աշխատանքի, այլ կյանքի հետ ընդհանրապես: Դժվար է լիարժեք հանգստանալ, երբ մեր կյանքում անհանգստություն կամ զայրույթ կա: Երբ մենք ապրում ենք մշտական հոգնածության վիճակում, սովորաբար դա նշանակում է պայքար մեր կյանքում: Դա նաև նշանակում է, որ մենք հոգնել ենք պայքարից և պատրաստ ենք պարտությունն ընդունել: Հանձնվելու փոխարեն պարզեք, թե ինչ կարող եք դուք անել, որպեսզի կյանքը ներդաշնակ դարձնեք: Այն նախատեսված է երջանիկ, ոչ թե հոգնած ապրելու համար:

6. Բոլորն ասես Ձեզ նյարդայնացնում են

Երբ դուք անընդհատ սխալներ եք գտնում ուրիշների և այն բանի մեջ, թե ինչ են նրանք անում, դա ավելի շատ հուշում է, որ որոշակի խնդիրներ կան ձեր իսկ կյանքում: Խնդիրները կարող են ցանկացած բնույթի լինել, բայց սովորաբար դա ցույց է տալիս, որ դուք երջանիկ չեք:

7. Դուք անընդհատ կանխազգացումներ ունեք

Ինչ-որ վատ բանի սպասելը, ի վերջո, կհանգեցնի նրան, որ այդ վատ բանը կիրականանա: Երբ ձեր գլխին կոշիկ է ընկնում, դուք չպետք է սպասեք, որ մյուս կոշիկն էլ կընկնի: Դադարեք անհանգստանալ և կանխատեսումներով ապրել՝ փոխարենը կենտրոնանալով նրա վրա, թե ինչ եք անում հիմա:

Հիշեք՝ կյանքը հնարավոր է և հարկավոր է փոխել, եթե դուք զգում եք, որ «ձեր ափսեում չեք»: Բայց նաև պետք է գիտակցեք, որ միակ մարդը, ով պատասխանատու է դրա համար, դուք եք: Ուստի ինչ-որ բան պետք է սկսեք արդեն անել:

Հեղինակի մասին

Մանե Սարգսյան

Հեղինակ, ադմինիստրատոր, մայր, մի փոքր էլ խենթ :) Կարող եք ծանոթանալ մեր հոդվածներին նաև Selfhelp.am-ում, Habits.am-ում և Nonstandardthinking.am-ում:

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»