Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Հաջողակ մարդիկ

Արիստոտել Օնասիս` հույն նավատորմային արքան

Արիստոտել Օնասիսը ծնվել է 1906 թվականի հունվարի 5-ին Թուրքիայի Սմիրն քաղաքում (այժմյան Իզմիր), ծխախոտի բիզնեսով զբաղվող ընտանիքում: 1922 թվականին թուրքերը գրավում են այդ ժամանակ դեռևս հունական քաղաք Սմիրնը և Օնասիսի ընտանիքը, կորցնելով իր ողջ կարողությունը, ստիպված փախչում է, իսկ Արիստոտելը, լավագույն կյանք գտնելու նպատակով, մեկնում է ամերիկյան մայրցամաք, Արգենտինա, Ռիո Դե Ժանեյրո:

Ինչ մասնագիտությամբ ասես նա չի աշխատում Ռիո Դե ժանեյրոյում` սևագործ աշխատանք, նավակ քշող, ափսեներ լվացող, մատուցող, մրգեր վաճառող, հեռախոսային ընկերությունում վերանորոգող: Համաձայնեք, որ այսպիսի աշխատանքներում բավականին դժվար է հսկայական բիզնես կառուցել և մեծ գումարներ աշխատել: Սակայն տեղի է ունենում մի պատահականություն, որը փոխում է նրա կյանքը:

1924 թվականին, Ռիո Դե Ժանեյրոյի ռեստորաններից մեկում, որտեղ Արիստոտելը մատուցող էր աշխատում, հանգստանում էր համաշխարհային ճանաչում ունեցող երգիչ` Կառլոս Գարդելը: Օնասիսը արգենտինյան տանգոյի “արքային” հյուրասիրում է հոր ուղարկած սիգարներից մեկով: Սիգարի համը երգչին այնքան է դուր գալիս, որ նա մի ամբողջ տուփ է պատվիրում Արիստոտելին: Այս իրադարձությունը սկիզբ է հանդիսանում Արիստոտել-գործարարի համար: Արդեն մի քանի ամիս անց “Մելանժ Գարդել” սիգարները հայտնի են դառնում ոչ միայն Արգենտինայում, այլ ամբողջ Հարավային Ամերիկայում: Այդպիսի հաջողությունը անհնար էր չնկատել և 1928 թվականին Օնասիսը հունական կառավարությունից Արգենտինայի հետ առևտրային պայմանագիր կնքելու առաջարկ է ստանում: Ավելին, նա նշանակվում է Արգենտինայում Հունաստանի գլխավոր հյուպատոս:

Արիստոտելը ակտիվ աշխատում է իր ֆինանսական կայսրությունը ընդլայնելու ուղղությամբ, սկսում է սիգարներ և այլ ապրանքներ արտադրել, ինչի շնորհիվ 1931 թվականին, 25 տարեկան հասակում, աշխատում է իր առաջին միլլիոն դոլլարը: Բայց դա միայն սկիզբն էր և ինչպես նա էր սիրում ասել. “Դժվարը առաջին միլլիոնն աշխատելն է”: 1932 թվականին նա սննկացած կանադական ընկերությունից 120 հազար դոլլարով գնում է իր առաջին 6 բեռնատար նավերը, որոնք վաճառքի էին հանված դատարանի որոշմամբ: Այդ իրադարձությունն է սկիզբ դնում հետագայում մի ամբողջ նավատորմի կազմավորմանը: 1938 թվականին Արիստոտելը կառուցում է իր առաջին լցանավը (танкер): Որոշ ժամանակ անց նա ձեռք է բերում ևս երկու լցանավ: Նույնիսկ պատերազմի ժամանակ է նա շարունակում մեծացնել իր նավատորմը: Գործարարի նավերին հաջողվում էր խուսափել պատերազմի սպառնալիքներից: 50-ական թվականներին Օնասիսը մի քանի ամսվա ընթացքում գնում է ևս 17 նոր լցանավեր: 1953 թվականին նա ձեռք է բերում “Société des Bains de Mer”-ի արժեթղթերի հսկիչ փաթեթը: “Société des Bains de Mer”-ին էին պատկանում անշարժ գույքի տարբեր օբյեկտներ` հյուրանոցներ, թատրոններ, խաղատուն Մոնտե Կառլոյում:

Արիստոտել Օնասիս և Ժակլին Քենեդի

Արիստոտել Օնասիսը մահանում է 1975 թվականի մարտի 15-ին, 69 տարեկան հասակում: Կյանքի վերջին տարիներին նա տառապում էր մահացու հիվանդությամբ: Իր մահից հետո նա թողնում է հսկայական կարողություն, տարբեր գնահատականների համաձայն 3-5 միլլիարդ ամերիկյան դոլլար: Վերջին տարիներին գործարարի օրեկան եկամուտը կազմում էր ավելի քան 200 հազար ամերիկյան դոլլար:

Ընտանեկան կյանքում միլլիարդատերը այդքան հաջողակ չէր, ինչքան բիզնեսում: Նա կարողանում էր հմայել շատ կանանց և աղջիկների: Նրա կանանցից են եղել հայտնի և մեծահարուստ հույնուհի Թինա Լեվանոսը և Ժակլին Քենեդին` ԱՄՆ-ի 35-րդ նախագահ Ջոն Քենեդիի այրին: Մինչև ամուսնությունը Արիստոտելը գրավում է հիասքանչ Ինգեբորգ Դեդիխենի` նորվեգական նավային մագնատի աղջկա սիրտը: Բացի այդ, երկու ամուսնությունների արանքում ընկած ժամանակահատվածում, Օնասիսը բուռն և երկար հարաբերություններ է ունենում հիասքանչ օպերային երգչուհի, աստղ Մարիա Կալլասի հետ: Ցավոք այս կանանցից ոչ մեկը չդարձավ այն “միակը”, որի հետ Արիստոտելը կկիսեր իր երջանկությունը:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

2 մեկնաբանություն

    • Իմ կարծիքով ամբողջ պատասխանատվությունը յուրաքանչյուրս պետք է իր վրա վերցնի: Նկատի ունեմ անկախ ինչ երկրում ես ապրում, եթե ցանկացար ինչ-որ բանի հասնել, կհասնես, իսկ եթե ոչ, ապա դրա համար պատասխանատու ենք միայն մենք, ուրեմն ինչ որ բան այնպես չենք արել:

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»