Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Հաջողության պատմություններ

Կլիֆֆ Յանգ. չկա անհնար ոչինչ

Աշխարհում վազքի ամենադժվար մրցույթներից մեկը անց է կացվում Ավստրալիայում: Վազքուղին անցնում է Սիդնեյից մինչև Մելբուռն: Դա 875 կիլոմետրանոց ճանապարհ է թեժ անապատի միջով: Մարաթոնում վազորդների ընտրություն չկա: Մասնակցելու համար ընդամենը պետք է հայտնել, որ դուք ուզում եք վազել: Սակայն պետք է խելագար լինել, որպեսզի այդպիսի բան անել: Մարաթոնը սկսվում է Սիդնեյի մարզադաշտում: Մարզիկները մոտ 3 ժամ վազում են մարզադաշտի շուրջը, որպեսզի հանդիսատեսը գոնե ինչ-որ բան տեսնի, ապա անհետանում են անապատում և 5-6 օր հետո հասնում են Մելբուռն:

Այդ օրը աշխարհի 18 լավագույն մարզիկները կանգնած էին Սիդնեյի մարզադաշտում` պատրաստ սկսելու: Հանկարծ նրանց մեջ է հայտնվում 61-ամյա տարեց մի մարդ, որի անունն էր Կլիֆֆ Յանգ: Մարզադաշտում հավաքված մարդիկ սկզբում կարծում են, որ նա ուղղակի եկել է մարզիկներին հաջողություն մաղթելու: Բայց շուտով բոլորը հասկանում են, որ նա պատրաստվում է վազել: Մարաթոնի կազմակերպիչները սկսում են անհանգստանալ նրա համար, չէ՞ որ իրենց դիմաց կանգնած է տարեց մի մարդ:

Նրան հարցնում են.
— Դուք երբևե մասնակցե՞լ եք այսպիսի մրցույթների:
-Ոչ, -պատասխանում է նա, — բայց մի օր պե՞տք է սկսել:

Բոլորը զարմացած են, նրանք չգիտեն, թե ինչպես այդ մարդուն ետ պահեն:
— Իսկ որտե՞ղ է ձեր վրանը:

Հասկանում եք, այդ վազորդները վազում են 20 ժամ անընդմեջ, ապա հասնում են իրենց վրանը, որտեղ հաց են ուտում, խմում են ինչ-որ բան, քնում են 2 ժամ և շարունակում են վազել մինչև հաջորդ վրանը:

Կլիֆֆ Յանգը պատասխանում է.
— Ես չունեմ վրան:
— Իսկ ի՞նչ եք դուք պատրաստվում ուտել:
— Ամեն ինչ իմ ուսապարկում է, — պատասխանում է նա:

Նա պատրաստվում էր տանել իր հետ այն ամենը, ինչը գտնվում էր ուսապարկում, 6 օր: Այդ ժամանակ մարդիկ սկսում են իրոք անհանգստանալ նրա համար: Բայց մարաթոնը սկսվում է և բոլորը կարծում են, որ Կլիֆֆ Յանգի համար ամեն ինչ կավարտվի հենց մարզադաշտում: 3 ժամ մարզադաշտի շուրջը վազելուց հետո` մարզիկներն անցնում են անապատ, իսկ Կլիֆֆ Յանգը դեռ վազում էր մարզադաշտում: Նա ևս 3-4 պտույտ ուներ անելու: Բայց նա դեռ վազում էր այդ շոգին: Եվ մարդիկ տպավորված էին այդ տեսարանով: Մեկնաբանը վերցնում է խոսափողը և ասում.

— Տիկնայք և պարոնայք, մեզ համար մեծ պատիվ է ծանոթանալ այս տարեց մարդու հետ: Մենք նրան թերագնահատեցինք, նա դեռ վազում է: Հնարավոր է, որ մենք նրան այլևս չտեսնենք:), բայց եկեք ծափահարենք նրան:

Ողջ մարզադաշտը ոտքի է կանգնում և սկսում է ծափահարել և Կլիֆֆ Յանգը անհետանում է անապատում:

20 ժամ անց առաջատար վազորդները քնած են իրենց վրաններում, իսկ Կլիֆֆ Յանգը դեռ վազում էր: Կես ժամ անց նա հասնում է վրաններին: Նա անցնու՛մ է վրանները:

Եվ մարդիկ նրան հարցնում են.
— Դուք չե՞ք ուզում քնել:
— Չեմ հասկանում, — պատասխանում է նա, — ես այստեղ եկել եմ վազելու, թե քնելու համար:

Եվ նա շարունակում է վազել: Նա վազում է ողջ գիշերը, և ողջ հաջորդ օրը, և դրա հաջորդ օրը, և նաև մյուս օրը: Նա երբեք չի քնում 45 րոպեից ավելի: Նա առաջ է անցնում բոլորից: Նա ՀԱՂԹՈՒ՛Մ Է մարաթոնը` 1,5 օրով առաջ անցնելով մյուս մարզիկներից:

Երբ որպես մարաթոնի հաղթող Կլիֆֆին պարգևատրում են 10,000 ավստրալիական դոլլարով, նա հայտնում է, որ չգիտեր մրցանակի մասին և վազքին չի մասնակցել փողի համար: Նա առանց մտածելու բաժանում է այդ գումարը իրենից հետո վերջնակետին հասած 5 մարզիկների միջև` յուրաքանչյուրին 2000 դոլլար: Կլիֆֆը իրեն չի թողնում ոչ մի ցենտ և ողջ Ավստրալիան սիրահարվում է նրան:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

2 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»