Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Հաջողության գաղտնիքներ

Մահամերձ մարդու 5 հիմնական ափսոսանքները

Նման վերնագրով հոդված հանդիպեցի ռուսական կայքերից մեկում և, կարծում եմ, այն ձեզ նույնպես կհետաքրքրի: Բրոնի Վեեն երկար տարիներ աշխատում է ծերանոցում և հոգ է տանում ծեր մարդկանց մասին` անցկացնելով նրանց հետ իրենց կյանքի վերջին շաբաթները: Իր աշխատանքային երկար դիտարկումների արդյունքում` նա կազմում է ինքնատիպ մի ցուցակ, թե ինչի համար են ափսոսում մարդիկ` գտնվելով իրենց կյանքի վերջնամասում: Նա տեսնում է, որ այն հարցին, թե ինչը կփոխեիք դուք ձեր կյանքում, եթե նորից ապրեիք, որոշ պատասխաններ կրկնվում են մյուսներից շատ: Ձեզ եմ ներկայացնում այդ պատասխանները:

1. Ես ափսոսում եմ, որ համարձակություն չունեցա ապրել այնպես, ինչպես ինքս էի ճիշտ համարում, այլ ապրեցի այնպես, ինչպես ինձնից սպասում էին ուրիշները

Սա ամենաշատ տարածված ափսոսանքն էր մարդկանց մեջ: Երբ մարդիկ գիտակցում էին, որ իրենց կյանքը մոտենում է ավարտին, նրանք հեշտությամբ կարող էին ետ նայել ու տեսնել, թե իրենց որ երազանքները մնացին անկատար: Նրանց մեծ մասը հազիվ թե փորձել էր իրականացնել այդ երազանքների մի մասը գոնե և նրանք պետք է մահանային` գիտակցելով, որ դա տեղի էր ունեցել միայն իրենց ընտրությամբ:

Շատ կարևոր է կյանքի ընթացքում փորձել իրականացնել ձեր բոլոր երազանքները: Այն պահին, երբ դուք կորցնում եք ձեր առողջությունը, արդեն շատ ուշ է դառնում ինչ-որ բան ձեռնարկելու համար: Առողջությունը տալիս է այն ազատությունը, որը շատ քչերն են գնահատում, քանի դեռ չեն կորցնում այն:

2. Ափսոս, որ ես այդքան շատ էի աշխատում

Այս ափսոսանքը հանդիպում էր գրեթե բոլոր տղամարդկանց մոտ: Որոշ կանայք նույնպես ափսոսում էին դրա համար: Մարդիկ ափսոսում էին, որ իրենց ողջ կյանքի ընթացքում ստիպված են եղել անընդհատ աշխատել իրենց գոյությունը պահպանելու համար և այդ ժամանակը չեն օգտագործել ավելի կարևոր բաների վրա:

Ահա թե ինչու ենք մենք անընդհատ քարոզում` մտածեք սեփական բիզնեսը սկսելու ուղղությամբ: Ուրիշի մոտ աշխատելով` դուք երբեք էլ չեք կարող ձեր կյանքը ամբողջությամբ վայելել: Սեփական բիզնեսը տալիս է այն ազատությունը, որ չունի սովորական վարձու աշխատողը:

3. Ափսոս, որ ինձ մոտ չստացվեց արտահայտել զգացմունքներս

Շատերը կյանքի ընթացքում ստիպված էին եղել ճնշել իրենց զգացմունքները` մարդկային ինչ-որ փոխհարաբերություններ պահպանելու համար: Դրա արդյունքում նրանք չէին ապրել այնպես, ինչպես ցանկացել էին, որի համար էլ կյանքի վերջում ափսոսում էին:

4. Ափսոս, որ ես կապ չէի պահպանում ընկերներիս հետ

Բոլորն են կարոտում իրենց ընկերներին, երբ մահանում են: Շատերն ափսոսում էին, որ կյանքի ընթացքում չեն անցկացրել բավարար ժամանակ ընկերների հետ: Երբ մոտենում ես կյանքի վերջնակետին, կյանքի նյութական կողմերը դադարում են կարևոր լինելուց և միայն դա էլ մնում է` ընկերներն ու հարազատները:

5. Ես ափսոսում եմ, որ թույլ չտվեցի ինձ ավելի երջանիկ լինել

Այս մասին ափսոսում էին շատ-շատերը: Նրանք ամբողջությամբ չէին հասկանում, որ իրենց երջանկությունը միայն ընտրության հարց էր: Նրանք դարձել էին սովորությունների ու ընդունված կարծրատիպերի գերին: Նրանք դարձել էին իրենց իսկ «հարմարավետ» կյանքի զոհը: Փոփոխությունների հանդեպ վախը ստիպել էր նրանց ձևացնել իրենց և ուրիշների առջև, որ իրենք գոհ են իրենց կյանքից:

Երբ դուք գտնվում եք ձեր կյանքի վերջնամասում, ապա այն, թե ինչ են մտածում ուրիշները, կորցնում է իր նշանակությունը: Մնում է միայն այն, թե ինչ եք դուք արել կյանքի ընթացքում և ինչ եք թողնելու ձեզանից հետո: Կյանքը` ընտրություն է: Դա ձեր կյանքն է: Ընտրեք գիտակցաբար, ընտրեք խելացի, ընտրեք անկեղծ: Ընտրեք երջանկությունը:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

3 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»