Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Հաջողության գաղտնիքներ

Կարևորն արագությունն է

Կյանքում հաղթող լինելու համար միայն խելքն ու գիտելիքը բավարար չեն, քանի որ ոչ միշտ է հաղթում ուժեղը: Կարևորն այդ խելքն ու գիտելիքը անհրաժեշտ պահին օգտագործել կարողանալն է: Իսկ դա հնարավոր կլինի այն ժամանակ, երբ մարդը կարողանա շատ արագ կողմնորոշվել: Կյանքը պահանջում է արագություն՝ հաջողության հասնելու համար: Պետք է հասնել մեզանից անընդհատ փախչող ժամանակի ետևից: Ամեն ինչի համար կա ինչ-որ կոնկրետ ժամանակ: Պատահական չէ ասված, որ հաջողակները նրանք են, ովքեր որսում են անհրաժեշտ պահը: Կյանքում չպետք է կանգնել կամ քայլել: Կյանքից ետ չընկնելու համար անհրաժեշտ է վազել:

Վերջերս դիտեցի մի ֆիլմ, որում շատ հետաքրքիր մտքեր կային: Ինձ գրավեց ֆիլմի այն դրվագը, որտեղ ուսուցիչը սովորեցնում էր աշակերտին, թե ինչ է արագությունը: Նա աշակերտին ասում էր, որ պետք է կարողանալ մատները ջրի կաթիլների միջով այնքան արագ անցկացնել, որ դրանք չոր մնան: Ահա թե ինչ է արագությունը: Իհարկե, շատ դժվար է կարողանալ այդքան արագ գործել, բայց հենց դա է ապահովում հաղթանակը: Շատ կարևոր է կարողանալ ճիշտ և արագ կողմնորոշվել կյանքի տարբեր իրավիճակներում, քանի որ երբեմն մարդիկ ստիպված են լինում ընդունել ակնթարթային որոշումներ, որոնք կարող են փոխել իրենց կյանքը:

Որպեսզի ավելի լավ պատկերացնենք, թե ինչ արժեք է ներկայացնում իրենից արագությունը, եկեք խոսենք այն մասին, թե ի՞նչ էին անելու մարդիկ առանց դրա: Եթե արագությունը չլիներ, ինչպե՞ս էին մարդիկ մտածելու (չէ՞ որ մարդն իր մտքի արագությամբ գերազանցում է իր շուրջը կատարվող երևույթները): Մարդիկ, նույնիսկ գիտակցելով, թե որքան արագ է թռչում ժամանակը, չեն շտապում ինչ-որ գործ սկսել, կիսատ թողածն ավարտել, ի վերջո՝ ժամանակ խնայել: Իսկ պատկերացրեք, եթե արագության ուժը չլիներ և ժամանակն ավելի դանդաղ առաջ շարժվեր, մարդիկ իհարկե ավելի ուշ կծերանային, բայց կդառնային սարսափելի ալարկոտ ու ծույլ: Նրանք ավելի շատ բան կհետաձգեին և կթողնեին վաղվան: Առանց արագության մարդիկ ինչպե՞ս էին տիեզերք թռչելու, ինչպե՞ս էին այնտեղից երկիր վերադառնալու: Եթե դաշնակահարը մատները ստեղների վրա մեծ արագությամբ ու համաչափությամբ չշարժեր, ապա ինչպես էինք մենք երաժշտություն լսելու:

Եթե վերհիշեք ձեր հաջողությունների ընթացքը, ապա կնկատեք, որ կյանքում ամեն ինչի հիմքում ընկած է արագությունը: Ռիսկը նույնպես արագության արդյունք է, քանի որ երբեմն մարդիկ կարող են պահի ազդեցության տակ ինչ-որ խիզախ քայլի դիմել: Իսկ այն, թե ինչպե՞ս է պետք արագ կողմնորոշվել, ասեմ, որ դրան պետք է հասնել ժամանակի ընթացքում, սեփական, բայց երբեմն նաև ուրիշների փորձի ու սխալների վրա սովորելով:

Հեղինակի մասին

Ամալյա Սուքիասյան

7 մեկնաբանություն

  • Իսկապես ժամանակի խնայողությունն ու արագ կողմնորոշվելու ունակությունը շատ կարևոր են հաջողության հասնելու համար:

  • Ես նույնպես շատ եմ գնահատում արագ և ճիշտ կողմնորոշվելու ունակությունը, բայց չէ որ արագությունն ու ճշտությունը հաճախ հակասում են իրար: Օրինակ համբերությունը դիտվում է որպես լավ հատկություն հաջողության հասնելու համար, որը հակասում է արագությանը: Եվ չգիտես՝ որն է դրանց օպտիմալ սահմանը: Ինձ այդ հարցը շատ է հուզում:

    • Սուրեն ջան սկզբնական փուլում արագությունն ու ճշտությունը միգուցե իրար հակասում են, բայց պետք է գալ նրան, որ արագը չնշանակի ոչ ճիշտ:

      Համբերատար լինելը իրոք կարևոր է և հնարավոր է լինել արագ և համբերատար:
      Համբերատարն ավելի երկարատև կտրվածքով է, այսինքն երբ ասում ես հաջողության հասնելու համար եղիր համբերատար, նկատի ունես որ դրա համար տարիներ կարող են անցնել, մի հուսահատվիր: Իսկ արագությունը ավելի փոքր ժամկետի կտրվածքով է:
      Օրինակ, եթե ուզում ես ընկերություն բացել, կարող ես ամիսներով մտածել, վերլուծել և նոր բացել, իսկ կարող ես մինիմալ գիտելիքներ ստանալով բացել, այսինքն անհրաժեշտ է արագ կողմնորոշվել:

      Այսինքն, ինչքան էլ արագ լինես, միևնույն է անցնելու է ահագին ժամանակ, մինչև հասնես նպատակիդ, այդ ընթացքում համբերատար եղիր:

  • Շատ շնորհակալ եմ պարզաբանման համար:
    Օրինակ, հիմա ես աշխատում եմ որպես հաշվապահ, և այստեղ մի քանի տարի հետո որոշ հեռանկարներ եմ տեսնում: Բայց այս գործում ես ձանձրանում եմ և շատ դեպքերում ուզում եմ դուրս գալ և զբաղվել այլ գործով, հետո մտածում եմ՝ կարող է շտապում եմ և պետք է համբերել: Ու հիմա ինձ մոտ երկու տարբեր մոտեցումներ կան՝ կամ ես հապաղում եմ, կամ շտապում:

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»