Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Մտորումներ

Նամակ Ձմեռ պապին

Մինչև Ձմեռ պապի նամակը ներկայացնելը, կցանկանայի հայտնել իմ խորին  երախտագիտությունը հաջողության բլոգին, քանզի  տալիս եք լավատեսություն և մարդկանց մեջ սեփական ուժերի հանդեպ հավատ եք ներշնչում: Ողջ տարվա ընթացքում ինձ համար «հաճելի պարտականություն» էր դարձել ամեն օր այցելել հաջողության բլոգ և հետևել թարմացումներին: Կայքում տեղ գտած հոդվածներն ու նյութերը նպաստում են անձի զարգացմանն ու ինքնաճանաչմանը: Այդ  նյութերը ստիպում են ընթերցողին  փոխվել դեպի լավը և ձեռք բերել հաջողակ մարդուն բնորոշ մտածելակերպ: Ես սրտանց շնորհավորում եմ  իմ սիրելի  բլոգի  ղեկավարությանը  և նրա ընթերցողների ամանորն ու Սուրբ ծնունդը: Ձեզ եմ ուղարկում ամանորյա բարեմաղթանքներս ու ցանկություններս՝ Ձմեռ պապին ուղղված իմ նամակով: Այս նամակը (անգլերեն լեզվով) ուզում եմ տեղադրել նաև YouTube.com կայքում:

Նամակ Ձմեռ պապին
Բարև սիրելի Ձմեռ պապ: Այս նամակը գրում եմ հավատի գրչով: Ճանապարհին  գուցե  տողերս պատվեն սառույցով: Սակայն, եթե կարդում ես նամակս, ուրեմն  արևը չի հալեցրել այն: Քեզ գրում  է մի ուսանողուհի, ով ամեն օր մի նոր բան է սովորում:  Սակայն խոստովանեմ, որ այն՝ ինչ սովորեցնում է  կյանքը, ուղղակի անգնահատելի է:  Սիրելի Ձմեռ պապ, ես խնդրում եմ, որ փոխես  աշխարհը դեպի լավը: Քանի որ  երկրի վրա լավն ու բարին  շնչահեղձ են լինում չարության բաժակում: Իսկ այդ բաժակն անընդհատ մեծացնում է իր ծավալը: Ես ուզում եմ, որ  մարդկանց հաղթանակների փայլով վառվեն տոնածառի լույսերը: Այնպես արա, որ մարդիկ գտնեն իրենց կյանքի լույսն ու ջերմությունը՝ ինչպես երկիրը և  պտտվեն նրա շուրջը: Թող տարին մարդկանց համար լինի 365  հնարավորությունների ուղի: Սիրելի Ձմեռ պապ, ամանորի գիշերը քո ճերմակ մորուքը ձյուն դարձրու և թափվող  փաթիլներով բուժիր աշխարհի վերքերը: Դու գիտե՞ս, թե արցունքները որքան են դառնացնում աշխարհը: Ուստի  աշխարհի բոլոր արցունքները դարձրու ժպտացող ծաղիկներ: Սիրելի Ձմեռ պապ, մարդիկ խոսում են ուրիշների ցավերից, որպեսզի չհիշեն սեփական ցավերը: Բեր նրանց այդքան սպասված մոռացումը:

Այնպես արա, որ մարդիկ չսպասեն, թե հաջողությունը երբ է իրենց  գտնելու, այլ իրենք գտնեն  նրան: Թող մարդիկ չցանկանան ապրել Վեներայի կամ լուսնի վրա, այլ հաշտ լինեն իրենք իրենց հետ և երկրի  վրա ապրելը տոն լինի: Եթե ամպերին հարցնենք, թե ինչպե՞ս է  երկինքը՝  նրանք կարտասվեն, իսկ  թե նույնը հարցնենք արևին՝ նա կժպտա: Ուստի  տուր մարդկանց այդ մեծագույն շնորհը՝ լավատեսությունը: Այնպես արա, որ  կյանքի ջերմությամբ հալվեն մարդկանց սրտերի սառույցները: Սիրելի Ձմեռ պապ, մարդն ավելի շատ  հոգի է, քան մարմին: Իսկ երկրի վրա իշխում է փողը, որն անզոր է սնել մարդու հոգին: Նրա «կանաչ թագավորության» դեմ խոնարհվում են նույնիսկ հպարտ  ճակատները: Փողի միջով են անցնում կյանքն ու մահը: Մարդիկ նրան են նվիրում իրենց օրն ու ժամանակը, իսկ նա պատկանում է սոսկ ակնթարթին: Ուստի վերցրու այդ իշխանությունը նրանից և տուր  ազնիվ հոգիներին, բարությանն ու սիրուն: Գիշերային երկնքի անթիվ ժպիտները՝ աստղերը, գերում են մարդկանց իրենց վեհությամբ: Այնպես արա,  որ մարդիկ չփորձեն երկնքից աստղեր իջեցնել, այլ կարողանան իրենք հասնել աստղերին: Սիրելի Ձմեռ պապ, երկրի վրա երջանիկ պահերը շատ արագ են անցնում: Այնպես արա, որ երջանիկ պահերին մարդիկ կարողանան կանգնեցնել ժամացույցի սլաքները: Թող հեռվում դրախտ փնտրելու փոխարեն մարդիկ կարողանան այն կառուցել իրենց ներսում:

Ես ուզում եմ, որ մեր մոլորակը դառնա ոսկեգանգուր տղայի՝ «Փոքրիկ  իշխանի» երազած աշխարհը: Սիրելի Ձմեռ պապ, այսքանով ավարտում եմ նամակս: Քանի որ, եթե շարունակեմ գրել ցանկություններիս մասին, այս նամակը կնմանվի գիշերային երկնքի, իսկ ցանկություններս՝  անհամար աստղերի: Եվ, որպեսզի քեզ «անթիվ աստղերով գիշերային երկինք» չուղարկեմ, ավարտում եմ նամակս և հավատում, որ այն գնում է հեռավոր Լապլանդիա՝ աշխարհը փոխելու:

Հեղինակի մասին

Ամալյա Սուքիասյան

5 մեկնաբանություն

  • Ալլա ջան շնորհավորում եմ Ձեր նոր տարին, մաղթում ամենալավ բաները: Թող 2012 թվականին Դուք հասնեք ստեղծագործական մեծ հաջողությունների և Ձեր լեգենդները մեծ ճանաչում ձեռք բերեն և դուրս գան Հայաստանի սահմաններից: Շնորհակալություն տարվա ընթացքում գրված բազմաթիվ հիանալի հոդվածների համար:

  • Sireli Alla jan! Nakh cankanum em shnorhavorel Dzer AMANORN U SURB [email protected]! Ev uzum em khorin shnorhalakutyun haytnel nman hiasqanch maghtanqneri hamar…Ughaki ccnogh er! Hianali artahaytchakan dzirq uneq…Cankanum em meeeeeeeeeets hajoghutyunneri hasneq!!! Shat huzich er dzer [email protected]….Maghtum em hajoghutyun….

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»