Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Օգտակար խորհուրդներ

Արդյունավետ հաղորդակցման հմտություններ երեխաների համար

Եթե դուք ծնող եք, ապա հենց սկզբից ուշադրություն դարձրեք, որպեսզի ձեր երեխան կարողանա շփվել իր հասակակիցների հետ: Բնավորության այն գծերը և սովորությունները, որոնք ձևավորվում են մարդու մոտ փոքր տարիքում, հետագայում դժվար է փոխել և հաճախ դրանք կարող են ազդեցություն թողնել մարդու ողջ կյանքի վրա:

Նախ, եթե ուզում եք երեխային ինչ-որ բան սովորեցնել, ապա արեք դա այնպես, որպեսզի երեխան իր համար «օգուտ տեսնի»: Մի ասեք նրան «հաճախ ժպտա, որովհետև մայրդ է այդպես ուզում», այլ ասեք «հաճախ ժպտա, քանի որ երբ ժպտում ես, դու ավելի գեղեցիկ ես»: Երբ երեխան կեղտոտ շորերով դպրոցից տուն է վերադառնում, մի ասեք «ինչո՞ւ ես կեղտոտել շորերդ, չէ՞ որ ես եմ լվանալու»: Ընդհանուր առմամբ, երեխան դեռ այդքան հասուն չէ, որ այդ ամենը հասկանա և նրա համար մեկ է, թե ով է լվանալու: Դրա փոխարեն ասեք «հարևանի աղջիկ Լիլիթին մայրը այգի է տանում, քանի որ նա միշտ մաքուր է ու կոկիկ»: Դրանից հետո նա ինքն էլ կուզի նմանվել Լիլիթին:

Սովորեցրեք ձեր երեխային օգնել այլ երեխաներին: Լավագույն միջոցը շփվելու մարդկանց հետ՝ նրանց օգնելն է: Երբ ձեր երեխան սկսի օգնել ուրիշներին, աստիճանաբար այդ ուրիշները կհավաքվեն նրա շուրջ: Սովորեցրեք երեխային ասել «ներողություն», երբ նա սխալվում է և «շնորհակալություն», երբ նրան օգնում են: Ինչպե՞ս անել դա: Դուք ինքներդ այդպես վարվեք նրա հետ: Երեխան սովորում է այն, ինչ տեսնում է: Երբեք մի բարկացեք ձեր երեխայի վրա: Բարկանալը ոչինչ չի լուծում, իսկ հաճախ էլ հետք է թողնում երեխայի հոգում, որը դուք չեք տեսնում և դա դրսևորվում է ավելի հասուն տարիքում: Երեխային այս կամ այն բանը անելու համար պետք է մոտիվացնել, այլ ոչ թե «ստիպել»:

Անընդհատ ասեք երեխային, որ իրեն սիրում եք: Արեք դա փոքր տարիքից, այլապես հետո դժվար կլինի: Խրախուսեք երեխային նոր ընկերներ ձեռք բերել: Թող երբեմն նա իր ընկերներին հրավիրի ձեր տուն: Եթե ուզում եք, որ երեխան ինչ-որ բան սովորի, նրա հետ դիտեք ֆիլմեր, որոնցից դա կարելի է սովորել: Ֆիլմերը մեծ ազդեցություն են թողնում երեխայի գիտակցության վրա: Եթե երեխան ամաչկոտ է, չի կարողանում շփվել մյուս երեխաների հետ կամ նրան նեղացնում են, մի անմոռանալի միջոցառում կազմակերպեք նրա ծննդյան օրը (ցանկալի է ոչ տանը) և բոլոր այդ երեխաներին հրավիրեք այդտեղ: Դրանից նա իրեն լավ կզգա, իսկ ընկերները կսկսեն ավելի գնահատել նրան: Որպես ամփոփում՝ որպեսզի երեխան իրեն լավ զգա, նա պետք է իրեն գնահատված զգա: Գնահատեք նրա ամենափոքր ձեռքբերումները և մի կենտրոնացեք նրա բացթողումների վրա:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

6 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»