Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Ժամանակի կառավարում

Որքա՞ն ժամանակ անցկացնել Facebook-ում

Շաբաթօրյա այս հաճելի, արևոտ առավոտյան որոշեցի խոսել Facebook սոցիալական ցանցի, ավելի շուտ մեր կյանքի վրա դրա ազդեցության մասին: Ընդհանրապես, ես Facebook սոցիալական ցանցը շատ եմ սիրում: Այն «լուրջ է». ոչ այնպես, ինչպես Հայաստանում օգտագործվող մի շարք այլ սոցիալական ցանցեր: Facebook-ը հիանալի հարթակ է նաև բիզնեսի զարգացման համար: Facebook-ի հենց այդ հնարավորությունն եմ ես ավելի հաճախ օգտագործում: Ինչպես նաև, Facebook-ի գլխավերևում կանգնած է երիտասարդ, եռանդուն մի մարդ, ով իր ներկայությամբ ինչ-որ հետաքրքիր շունչ է հաղորդում իր սոցիալական ցանցին:

Ես սիրում եմ նաև զբոսնել: Երբ զբոսնում ես կես ժամ, մեկ ժամ, զբոսանքը հաճելի է: Երբ զբոսնում ես երկու, երեք ժամ, զբոսանքը դառնում է հոգնեցուցիչ ու ոչ այնքան հաճելի: Դրանից հետո գալիս ես տուն և երկար ժամանակ չես կարողանում ինչ-որ բան անել: Իսկ երբ զբոսնում ես երեք ժամից ավելի, ԱՄԵՆ ՕՐ, զբոսանքը դառնում է էներգիա խլող, ժամանակ կուլ տվող, առօրյա կյանքին խանգարող ինչ-որ բան: Պատկերացնո՞ւմ եք` ամեն օր երեք ժամ զբոսնել… Դա համարժեք է, եթե ոտքով Մաշտոցի պողոտայից բարձրանաս մինչև Կոմիտասի պողոտայի վերջ ու հետ վերադառնաս:

Այդպես է նաև մեր «զբոսանքը» Facebook-ում: Եթե դա օրեկան կես ժամ, մեկ ժամ է, դա կարող է հաճելի լինել, օգտակար և չխանգարել մնացած գործերին: Իսկ եթե դա օրեկան մի քանի ժամից ավելի է, հոգնում են ոչ թե ոտքերը, այլ ուղեղը, շեղվում է մարդու ուշադրությունը և անտեղի ժամանակ է վատնվում:

Եկեք հասկանանք, թե ի՞նչ են մարդիկ հիմնականում անում Facebook-ում:

  • Շփվում են ընկերների հետ,
  • Նայում են ընկերների պատերն ու նկարները,
  • Փորձում են նոր ծանոթություններ ձեռք բերել,
  • Հետաքրքիր ինֆորմացիա են փնտրում,
  • Նյութեր են տարածում ֆեյսբուքյան էջերում և խմբերում,
  • Զբաղվում են բիզնեսով, PR-ով, մարքեթինգով,
  • Օգտագործում են Facebook-ը որպես աշխատանքային միջավայր:

Կարծում եմ` սրանք այն հիմնական կետերն են, ինչով մարդիկ զբաղվում են Facebook-ում (եթե ինչ-որ բան բաց թողեցի, կարող եք ավելացնել մեկնաբանություններում): Facebook-ը գերօգտագործելու հիմնական վտանգը թաքնված է առաջին երեք կետերում: Այսինքն, մարդը մտնում է Facebook և անկախ նրանից, թե այդ պահին իրոք կա ինչ-որ մեկը, որի հետ նա պետք է շփվի, սկսում է «թափառել» ընկերների ու «ոչ ընկերների» պատերով: Իսկ Facebook-ում պատը մարդու կյանքն է. այնտեղ երևում են նրա նախասիրությունները, զբաղմունքը, բարեկամներն ու ընկերները, նրա այցելած վայրերը, նկարները, մի խոսքով… ամեն ինչ: Այսինքն, դու սկսում ես ուսումնասիրել ընկերներիդ կյանքը. ով ինչ է արել, ով ուր է գնացել, ով ինչ է հագել, ով որտեղ է խայտառակվել, ով ում հետ է ամուսնացել, ով ումից է բաժանվել, ով է այսօր լավ տրամադրությամբ զարթնել, իսկ ում է պետք մի քիչ ոգևորել, ով է այսօր լավ ֆիլմ դիտել, ով է ձեր մասին թերթում կարդացել, և այլն, և այլն: Անշուշտ, եթե մտածում ես, ոչ մի վատ բան չկա: Իհարկե, քո ընկերներն են և քեզ հետաքրքիր է, թե ինչ է նրանց հետ կատարվում:

Բայց դա նման է կախվածության: Սկսում ես նայել և չես նկատում, թե ինչպես են ժամերն անցնում: Այն ժամերը, որոնք պետք է նվիրել ընտանիքին, ինքնազարգացմանը, գործին: Այն ժամերը, որոնցում դու ապրում ես այլ մարդկանց կյանքով, այլ ոչ թե քո: Ժամերը, որոնք իրականում ոչինչ չեն փոխում քո կյանքում և ոչինչ չեն փոխում այլ մարդկանց կյանքում: Այդ ժամերը դու ծախսում ես ինքնաբերաբար: Եթե մարդը հասկանա, թե որքան ժամանակ է ծախսում Facebook-ում, միգուցե նա չանի դա: Բայց ինչպես խաղատներում են պատուհանները փակում վարագույրներով և հանում ժամացույցը, այնպես էլ այստեղ է միջավայրը հաճելի, շեղող ոչինչ չկա ու ուզում ես անընդհատ նայել, նայել, նայել…

Հավատացեք, Facebook-ում ժամեր անցկացնելով չէ, որ դուք կարևոր ինֆորմացիա եք ձեռք բերում: Եթե ինֆորմացիան իրոք կարևոր է, ինչ-որ կերպ այն Ձեզ կհասնի` լինի դա ընկերոջ ծնունդ, միջոցառում, թե հանդիպում: Այդ ինֆորմացիան, ընկերների հետ շփումը և մնացած ամեն ինչը Facebook-ից կարելի է ստանալ կեսից մեկ ժամում (առավելագույնը): Մարդիկ Facebook այցելում են օրեկան մի քանի անգամ: Որովհետև օրվա ընթացքում անընդհատ մտածում են. «տեսնես ինչ-որ մեկն ինձ բան չի գրել», «տեսնես Պողոսը նոր նկար չի ավելացրել», «տեսնես վերջին գրածս ով է հավանել», և այլն, և այլն: Իսկ օրվա ընթացքում ամեն անգամ մուտք գործելով մարդը չի մնում այնտեղ 5 րոպե, այլ դա կարող է ժամեր տևել, քանի որ պատիդ հանկարծ նոր, հետաքրքիր ինֆորմացիա ես գտնում:

Խորհուրդը մեկն է.

Սահմանափակեք Facebook-ում անցկացրած Ձեր ժամանակը: Ձեր հիմնական գործերը կազմակերպեք օրվա վերջում` կեսից մեկ ժամում: Ինչ կարիք կա օրվա ընթացքում անընդհատ մտնել ու ստանալ ընթացիկ ինֆորմացիա, եթե օրվա վերջում կարելի է ստանալ ամփոփ ինֆորմացիա: Օրվա վերջում, այդ կեսից մեկ ժամում դուք կհասցնեք և՛ ընկերների հետ շփվել, և՛ նրանց նկարները նայել 🙂 և՛ նոր միջոցառումների մասին տեղեկանալ և մնացածը: Նաև այդպես դուք կշփվեք միայն այն մարդկանց հետ, որոնց հետ իրոք պետք է շփվել, բացառելով այն տարբերակը, որ դուք օնլայն եք և շփվում եք այն մարդկանց հետ, ովքեր նույնպես օնլայն են, այդ պահին գործ չունեն և ուզում են պարզապես մի քիչ շփվել, սակայն եթե այդ շփումը չլիներ, ոչ դուք կտխրեիք, ոչ էլ նա:

Հիշեք, ժամանակը շատ կարևոր է: Եթե չկարողանաս այն ղեկավարել, չես կարող նաև կյանքդ ղեկավարել: Իսկ Ձեզ պե՞տք է Ձեր կյանքը ղեկավարել…

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

3 մեկնաբանություն

  • vaaaay vonc vor hatuk indz hamar grac lineq….kashxatem hetevel xorhurdin,,, es the gitakcum em, uxxaki mexanikoren [email protected] mutq em gorcum facebook.u mtacum em <<tesnem inch chka u durs gam>>u the tevum e jamer isk gorcer mnum en……
    Shnorhakalutyun :))))

  • Ես օրեկան 1 ժամ են անցկացնում ու դա էլ երևի շատ է: Պետք է փորձել “կանտռոլ” անել, այլապես տանում էէէ

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»