Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Մարքեթինգ

Ինչ կասես, ուղեղ ջան, գնե՞մ, թե՞ չգնեմ

Հեղինակ՝ Artur

Այսօր (վերջապես) հիշել եմ, որ բժիշկ եմ, և այս հոդվածն էլ կգրեմ մասնագիտական տեսանկյունից: Եվ ձեզ կպատմեմ գնման նեյրոֆիզիոլոգիայի մասին:

Հո շատ չվախեցա՞ք վերջին բառը լսելիս: 10 րոպե անց ամեն ինչ կդառնա պարզից էլ պարզ: Եվ դուք կհասկանաք, թե ինչպես է ձեր ուղեղը ձեզանից թաքուն ղեկավարում ինչ-որ մի բան գնելու ձեր որոշումը:

Նոր բան չեմ ասում, և, իհարկե, ուղեղն է, որ բոլորիս թույլ է տալիս մինչև գնում կատարելը հաշվարկներ անել, գնահատել ռիսկերը և այլն: Համաձայն եմ, բայց դրանք տեսանելի են, իսկ ես կպատմեմ ուղեղի թաքուն գործերի մասին: Եվ այն մասին, թե ինչու եք դուք գնում ինչ-որ մի թանկ ապրանք, եթե կարող էիք ավելի էժանը գնել: Կամ՝ ինչո՞ւ եք հենց այդ խանութից գնում կատարում, այն էլ՝ ավելի թանկ, եթե մեկ այլ խանութում նույն ապրանքն ավելի էժան է դրված:

Եթե կուզեք, հաշվիչը ձեռքներդ գնացեք խանութ, միևնույն է, որոշում կայացնողը ուղեղի երկու տեղամասերն են: Ձեզանից թաքուն, բայց՝ ի օգուտ ձեզ:

Հարգելի՛ վաճառողներ, ձեզ էլ է վերաբերվում այս հոդվածը: 9 րոպե անց դուք կիմանաք, թե ինչպես կարող եք ազդել ուղեղի այս երկու կենտրոնների վրա, որպեսզի հաճախորդն իր գրպանը քիչ թեթևացրած, բայց՝ բավարարված հեռանա:

Nucleus Accumbens և Insula

Սրանք մեր գլխուղեղի բազմաթիվ կենտրոններից երկուսն են: Nucleus Accumbens-ը հաճույքի կենտրոնն է, իսկ Insula-ն՝ ցավի և տհաճության:

Առաջինը դրդվում է այն ժամանակ, երբ մենք տեսնում ու զգում ենք այն, ինչ կցանկանայինք տեսնել ու զգալ: Սկսած հաճելի միջավայրից ու վերջացրած ցանկալի սեքսով՝ բոլորն էլ խթանում են Nucleus Accumbens-ը ու մեզ պարգևում բարձր տրամադրություն, երանության ու երջանկության զգացումներ:

Հակառակը, երկրորդ կենտրոնը՝ Insula-ն, ակտիվանում է, երբ մենք տեսնում կամ զգում ենք այն, ինչ չէինք ցանկանա, որ տեսնենք կամ զգանք: Օրինակները դարձյալ շատ-շատ են՝ սկսած ընկճող իրավիճակներից ու վերջացրած չհաջողված սեքսով: Insula-ի դրդվելը մեզ պարուրում է բացասական զգացումներով՝ տհաճություն, դիսկոմֆորտ, հոգեկան (անգամ՝ մարմնական) ցավ և այլն:

Կառնեգի-Մելոն համալսարանից պրոֆ. Ջորջ Լևենշտեյնը և Ստենդֆորդից՝ պրոֆ. օգնական Բրայան Կնուտսոնը մի ծավալուն հետազոտությամբ (հարցումներ, փորձարկումներ, գլխուղեղի ՄՌՏ) պարզել են, որ գնում կատարելն իրենից ներկայացնում է այս երկու կենտրոնների միջև հավասարակշռության խախտում՝ մեկնումեկի օգտին: Եթե «հաղթում է» Nucleus Accumbens-ը, ապա գնումը կատարվում է, հակառակ դեպքում, եթե գերիշխողը Insula-ի ազդեցությունն է, ապա դժվար թե գնումը հաջողության հասնի (իհարկե, եթե կինդ կողքից չի բշտում :)):

Ստացվում է, որ, երբ ավելի ակտիվացած է Nucleus Accumbens-ը, ապա հաճախորդը մեծ հավանականությամբ կգնի իր նախընտրած ապրանքը, հակառակ դեպքում, երբ գերիշխում է Insula-ի ազդեցությունը, ապա գնումը չի կատարվի:

Մի փոքր շեղվեմ: Հետաքրքիր է իմանալ նաև, թե ինչպես է պրոֆ. Լևենշտեյնը միմյանցից տարբերակում ագահ (քծիպ) և տնտեսող մարդկանց: «Ագահները ցավով են տանում փողեր ծախսելը, միչդեռ տնտեսող մարդկանց հաճելի է կուտակել դրանք»: Այսինքն, ագահներն ագահ են Insula-ի պատճառով, իսկ տնտեսողներն այդպիսին են Nucleus Accumbens-ի շնորհիվ:

Գործնական կիրառություն

Ի՞նչ է ստացվում:

Բոլոր այն գործոնները, որոնք կխթանեն Nucleus Accumbens-ը, էապես կնպաստեն վաճառքի կայացմանը: Ես սկսեմ թվարկել, մնացածը դուք կարող եք շարունակել՝ հաճելի միջավայր, սիրալիր վերաբերմունք, հարգալից շարժուձև ու սպասարկում, անկեղծ ժպիտ, ճաշակով ընտրված ինտերիեր, գրավիչ զեղչեր և խելամիտ գներ, բոնուսներ, գործուն հետադարձ կապ…: Այսինքն՝ այն ամենը, ինչ տվյալ առևտրի սրահում կցանկանայիք տեսնել կամ զգալ:

Հակառակ վերոնշյալին, Insula-ն խթանող գործոնները կասեցնում են գնելու որոշումը: Երևի չթվարկեմ դրանք, որպեսզի ձեզ մոտ չառաջացնեմ տհաճության զգացում:

Եվ, վերջում…

Եթե գնում կատարելու հոգեբանական կողմը հետաքրքրեց, ապա ուրախ կլինեմ նաև հաջորդ անգամ այս տեսանկյունից դիտարկել կրեդիտ-քարտերի վտանգավորության թեման:

Հեղինակի մասին

Artur

Ողջույն, ես Վեբ կայքի կատարելագործման բլոգի հեղինակն եմ: Իմ բլոգում տեղ են գտել կայքերի գուգլ-օպտիմալացման, վեբ առաջխաղացման եւ բլոգինգի հարցերին նվիրված ավելի քան 600 հոդվածներ։ Բաժանորդագրվեք իմ բլոգի հոսքերին եւ տեղեկացեք նոր հրապարակումների մասին: Հետեւեք նաեւ իմ ֆեյսբուքին եւ թվիտերին:

14 մեկնաբանություն

  • Արթուր ջան, երբ կարդում եմ քո հոդվածները, անկեղծ զգում եմ թե ինչքան աճելու տեղ ես ունեմ` ոճաբանությունը, հումորը, ինտերակտիվությունը, կարդալու թեթևությունը, մի խոսքով… ամեն ինչ: Երբ սկսում ես կարդալ, ինքնստինքյան հասնում ես վերջին 🙂

    Գնումների պահով շատ օգտակար ինֆորմացիա էր, փաստորեն իմացանք, որ մեր ուղեղի վրա վաճառողները կարող են ուզել ներազդել 🙂 զգոն կլինենք 🙂

  • Հրաչ ջան

    Ինչպես կարող եմ ինտերնետից ստանալ ֆիլտրված ինֆորմացիա ընկերությունների մասին օրինակ

    1. IT ոլորտի վերջերս IPO հանած ընկերությունների ցուցակ
    2. X երկրի կամպանիաների ցուցակ
    yahoo.finance.com -ին եմ մի քիչ ծանոթացել ,բայց դեռ չեմ կարող վերցնել նման ինֆորմացիա

    ինչպես ասում են
    Thank you in advance

    Արամ

  • Գիտական և միաժամանակ մատչելի նյութ է: Շատ շնորհակալ եմ, սպասում եմ կրեդիտային քարտերին վերաբերող նյութին

  • Հարգելիներս, ուրախ եմ ու շնորհակալ, որ այս գրառումս ձեր հավանությանն արժանացավ: Իրականում Nuc. Accumbens-ը(прилежащем ядре) եւ Insula-ն (островок) վերջին տարիներին հայտնվել են ոչ միայն նյարդաբանների, նարկոլոգների, հոգեբանների կամ հոգեբույժների, այլ նաեւ տնտեսագետների եւ շուկայագետների ուշադրության կենտրոնում: Հաճույքի եւ տհաճության կենտրոնների մեջեւ առկա “հակամարտությունից” շատ-շատ բան է կախված, նույնիսկ այնպիսի բաներ, որոնք ոչ մեկիս մտքով չեն էլ անցում:

    Ինչ վերաբերվում է կրեդիտ-քարտերին, ապա… դա ՆՈՒՅՆՊԵՍ կախված է Insula-ից: Մի քանի օրից ժամանակ կգտնեմ եւ անպայման կներկայացնեմ իմ հաջորդ նյութը:

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»