Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Հաջողության գաղտնիքներ

Պարզ ու անկեղծ զրույց

Հեղինակ՝ Marine Amiryan

— Ամեն ինչ վատ է:

— Իսկապե՞ս: Ինչպե՞ս կարող է ամեն ինչ վատ լինել: Ավելի կոնկրետ նշիր, թե ինչ նկատի ունես:

— Աշխատանք չունեմ, առողջությունս այնքան էլ ամուր չէ, ամուսնացած չեմ, դրամապանակս դատարկ է, ընկերներիս ամիսներով չեմ տեսնում…

— Հմմ… փորձիր գտնել այնպիսի լուսավոր կետեր, որ կան քո կյանքում:

— Ես… ազատ մարդ եմ, ստացել եմ բարձրագույն կրթություն, դեռ երիտասարդ եմ: Հետո՝ հրաշալի ծնողներ ունեմ, ովքեր դժվարին իրավիճակներում միշտ կողքիս են…

— Իսկ ինչո՞ւ չես աշխատում:

— Չգիտեմ, հավանաբար այնպիսի գործ չեմ գտնում, որ կարողանամ գիտելիքներս լիարժեք կիրառել, մասնագիտական աճի հեռանկար տեսնել և, ամենակարևորը, ընտրածս մասնագիտությամբ աշխատել:

— Փաստորեն ինքնագնահատականդ ցածր չէ. դա լավ է: Ասեցիր, որ ընկերներիդ հետ հազվադեպ ես հանդիպում, ինչո՞ւ:

— Ինչպե՞ս դատարկաձեռն գնամ հանդիպման: Առանց դրամի չեմ կարող հավաքույթներ կազմակերպել:

— Նաև՝ անքաղաքավարի ու աներես չես: Առողջության հետ կապված ի՞նչ խնդիրներ ունես:

— Ուշ եմ քնում, նյարդերս չեմ խնայում, չարաշահում եմ քաղցր և յուղոտ սնունդը, իմանալով, որ նստակյաց կյանքն ու ծխախոտը առողջ ապրելակերպի թշնամիներն են՝ չեմ հրաժարվում վատ սովորություններից:

— Հիանալի ինքնաքննադատություն, վատ չէ: Կարող էիր ամուսնանալ, չէ՞, բայց մերժել ես բոլոր առաջարկները:

— Այո, առանց սիրո չեմ ցանկանում ընտանիք կազմել, հետո՝ պիտի ընդհանուր հետաքրքրություններ լինեն, նաև՝ փոխադարձ հարգանք ու վստահություն:

— Բրավո, անպայման կհանդիպես նրան, ում փնտրում ես: Իսկ հիմա ի՞նչ ես պատրաստվում անել:

— Կփորձեմ այս իրավիճակից դուրս գալ: Ես ուժեղ մարդ եմ:

— Այդպես էլ կլինի: Երբ հաղթահարես խնդիրներդ և հաջողություն ունենաս, անպայման տեղեկացրու ինձ:

— Բարի:

Ինչ-որ ժամանակ անց:

— Ամեն ինչ շատ լավ է:

Իսկապե՞ս: Ինչպե՞ս կարող է ամեն ինչ լավ լինել: Ավելի կոնկրետ նշիր, թե ինչ նկատի ունես:

— Աշխատանք ունեմ, բարձր եկամուտ, նվիրված ամուսին, հրաշալի ընկերներ: Թողել եմ ծխելը, սպորտով եմ զբաղվում, լավ ինքնազգացողություն ունեմ և ամուր առողջություն:

— Իսկ ծնողնե՞րդ:

— Նրանք մահացել են:

— Ցավում եմ, ամուսինդ քեզ սիրո՞ւմ է, փոխադարձ հարգանք և վստահություն կա՞:

— Այո, միայն երեխա չունենք: Ամուսինս որոշ խնդիրներ ունի, բուժվում է: Շատ ենք ուզում երեխաներ ունենալ, բայց…

— Առանց երեխայի իսկապես ընտանիքն ամբողջական չի կարող լինել: Աշխատանքումդ ի՞նչ դրական առաջընթաց կա:

— Դե աշխատավարձս բարձր է, տնօրենս բարի ու ազնիվ մարդ է, աշխատակիցներիս հետ շփումը ընկերական է, բայց…

— Բա՞յց…

— Սա իմ երազած աշխատանքը չէ, մասնագիտությանս հետ կապ չունի:

— Ափսոս, իսկ ընկերներիդ հաճա՞խ ես տեսնում:

— Այո, միայն թե այն ժամանակ մեր հանդիպումներն ավելի ջերմ էին՝ խենթություններ էինք անում, հետաքրքիր հավաքույթներ կազմակերպում, այժմ մեր շփումը մի տեսակ ձևական է դարձել:

— Լավ չէ:

— Ինչո՞ւ է այդպես ստացվել, սխալվե՞լ եմ:

— Ոչ, պարզապես մի քանի ճանապարհներից ընտրել ես այս տարբերակը: Ճիշտ ու սխալ չկա, ինչ ճանապարհ էլ ընտրես, ինչ-որ բան կորցնելու ես: Ընտրության մի քանի  հնարավորություն էլ դեռ ունես: Կհանդիպենք…

Հեղինակի մասին

Marine Amiryan

4 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»