Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Բիզնես և ֆինանսներ

Ովքե՞ր են բիզնեսում կարևոր. հաճախորդներ, թե՞ աշխատակիցներ

Հայտնի ասացվածքն ասում է. «Հաճախորդը միշտ ճիշտ է»: Լիովին համաձայն եմ, քանի որ հաճախորդն այն ուժն է, որի շնորհիվ գոյություն ունի բիզնեսը: Սակայն կա բիզնեսի մեկ այլ, ներքին մեծ ուժ` ընկերության աշխատակիցները: Ես համոզված եմ, որ աշխարհում մեծ մասամբ բարգավաճում են այն ընկերությունները, որոնց աշխատողների համար ստեղծված են լավագույն պայմաններ: Այսօր աշխատողի համար կարևորը միայն բարձր վարձատրությունը չէ: Առավել կարևոր է, որ ցանկացած աշխատող իրեն բիզնեսի մի մասը զգա, զգա իրեն «ընտանիքի անդամ», զգա իր կարևորությունն ընդհանուր գործում:

Չգիտեմ ինչպես է եղել նախկինում, բայց այսօր ՄԵԾ, ՀԱՆՃԱՐԵՂ ընկերությունները պետք է ստեղծեն այնպիսի մթնոլորտ, որտեղ աշխատակիցները զգան, որ իրենք ոչ թե աշխատում են, այլ համագործակցում ընկերության հետ: Այսինքն, «պարտադրաբար»-ից պետք է անցում կատարել դեպի «իմ ցանկությամբ»: Նման ընկերություններ կան: Դրանցում աշխատակիցներին մեծ ազատություն է տրվում: Աշխատակիցները կարող են գալ աշխատանքի ցանկացած ժամի, կարող են ձևավորել իրենց աշխատատեղը իրենց ցանկությամբ, ստանում են տարբեր տեսակի ապահովագրություններ, ստանում են «չնախատեսված» պարգևատրումներ և ամենակարևորը` յուրաքանչյուրը զգում է, որ իրենից ինչ-որ բան է կախված: Նման մթնոլորտում, երբ ընկերությունն իրոք թիմ է, բիզնեսի հաջողության կեսը կարծում եմ ապահովված է:

Սակայն կան նաև ընկերություններ, որոնք ուզում են, որ իրենց աշխատակիցները նույնպես լինեն այդպիսին` գործին նվիրված, «ընտանիքի անդամ»: Սակայն նրանք չեն տալիս գլխավոր հարցը` ԻՆՉՈ՞Ւ: Ինչո՞ւ պետք է աշխատակիցը աշխատի հենց այդ ընկերությունում, ինչո՞ւ նա պետք է այդտեղ իրեն լավ զգա, ինչո՞ւ նա չպետք է տեղափոխվի այլ աշխատանքի, երբ արդեն ձանձրանա նույն տեղում աշխատելուց, ինչո՞ւ նա չպետք է ձանձրանա ընդհանրապես, և այլն, և այլն: Այսինքն, ի՞նչն է մոտիվացնում աշխատողներին: Միայն գումա՞րը: Եթե պատճառն իրոք միայն գումարն է, ապա կարծում եմ պետք է մարդկանց հոգեբանություն ուսումնասիրել, քանի որ գումարից կարևոր շատ այլ գործոններ կան: Հիշեք` աշխատակիցը նվիրված է իր աշխատանքին և դրանից շահում է միայն ընդհանուր բիզնեսն այն ժամանակ, երբ աշխատակիցն իրեն «լավ է զգում» աշխատավայրում և զգում է իր կարևորությունը: Հակառակ դեպքում` աշխատակիցները կգան ու կհեռանան, նրանց հետ կհեռանան փորձն ու ծախսված գումարները, իսկ բիզնեսը միայն փոքր քայլերով կշարժվի առաջ:

Այնպես որ, եթե դուք բիզնեսի ներկայիս կամ ապագա սեփականատեր եք, ապա այնպես արեք, որ Ձեր աշխատողներն իրենց զգան ոչ թե «վախի» և «պարտադրանքի» միջավայրում, այլ «ազատության» և «ստեղծարարության»: Թույլ տվեք նրանց երբեմն կարևոր որոշումներ կայացնել, «ազդել» ընկերության ապագայի վրա: Թույլ տվեք նրանց իրենց «լավ զգալ», քանի որ իրեն լավ զգացող մարդը մի քանի անգամ ավելիին է ընդունակ: Ստեղծեք նրանց համար լավ պայմաններ, իսկ մնացածը կանեն նրանք:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

2 մեկնաբանություն

  • Հաճելի է, երբ գործատուն հոգատար է ենթակաների հանդեպ, երբ նա ուրախանում է քո հաջողություններով, ոգևորում է, իսկ թերացումներին մոտենում է ըմբռնումով, թևաթափ չի անում:

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»