Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Հաջողության գաղտնիքներ

Երազանքից դեպի նպատակ. տարվա վերջին հոդված

Հեղինակ՝ Harust Tga

Այս հոդվածով ուզում եմ ամփոփել իմ տարին, նաև` կիսվել իմ փորձով ընթերցողների հետ: Սկզբում կխոսեմ իմ բիզնեսի մասին: 2012 թվականը կարելի է ասել բեկումնային տարի էր ինձ համար: Ես վերջապես դուրս եկա իմ հարմարավետության գոտուց, որը տվյալ դեպքում իմ աշխատավայրն էր, և «գլխիվայր նետվեցի» ձեռներեցության անկանխատեսելի հորձանուտը: Եվ պատկերացրեք, որ շատ գոհ եմ այդ քայլից: Իհարկե, դրան ես բավական երկար էի նախապատրաստվում, բայց ամեն դեպքում` որոշումը դժվար էր և ինչ-որ պահի ես այն կայացրեցի:

Շատերն ինձ զգուշացնում էին, որ հնարավոր է ես սխալ որոշում եմ կայացնում, հարազատներիցս ոմանք ակնհայտ դեմ էին իմ նախաձեռնությանը: Դա մայիս ամիսն էր: Անցավ մոտ կես տարի և այժմ մեր թիմում մոտ տաս մարդ կա: Այնպես չէ, որ ամեն ինչ հարթ է ընթացել, բնավ ոչ: Ապագայում նույնպես բազում խնդիրներ կլինեն, բայց հարցը նրանումն է, որ եթե դուք ունեք երազանք և կամք` դարձնելու այն նպատակ, ապա պետք է գործեք: Նման դեպքերում վախը միշտ էլ առկա է: Համոզված եմ, որ վախենում էին նույնիսկ Apple ընկերության հիմնադիրները, երբ ստեղծում էին այն, բայց նայեք ինչի է այժմ վերածվել Apple-ը: Եվ դա բնական է: Որքան դուք բարձրանում եք, այնքան ավելի վախենալու և ռիսկային է դառնում: Բայց դա է ճանապարհը դեպի հաջողությունը:

Ուզում եմ մի քանի խորհուրդներ տալ սկսնակ գործարարներին: Բիզնեսով զբաղվելու համար պետք է այն սիրել: Պարտադիր չէ ունենալ տնտեսագիտական կրթություն և հատուկ ձեռնարկներ կարդալ: Շատերը գործում են բնազդաբար, քանի որ բնազդը բիզնեսում մեծ դեր է խաղում: Օրինակ, լինում են պահեր, երբ զգում ես, որ այս մարդու հետ չի կարելի աշխատել, չնայած թվերը հակառակ բան են ասում: Նման դեպքեր իրոք շատ են լինում: Պետք է սովորել հասկանալ բնազդը և լսել դրան: Նաև, եթե բիզնես եք սկսում, մի կենտրոնացեք լոկալ շուկայի վրա: Լոկալ շուկան շատ փոքր է և եթե Ձեր գործունեությունն իր բնույթով լոկալ չէ, ապա բացեք քարտեզը և փորձեք հասկանալ, թե որտեղ կարող է սպառվել Ձեր ապրանքը կամ ծառայությունը:

Ինձ հոգեհարազատ է IT բիզնեսը: Կյանքը ցույց է տալիս, որ շրջափակված լինելով հանդերձ, մեր երկիրը IT բիզնեսի շնորհիվ կարող է լուրջ խաղացող դառնալ այդ հսկա շուկայում: IT-ն ապագան է և շատերն են արդեն թեքվում այդ կողմ: Նշեմ միայն, որ ամենամեծ կապիտալիզացիայով 10 ընկերություններից 5-ը տեխնոլոգիական են: Ահա դրանք.

1. Apple
4. China Mobile
7. Google
8. IBM
9. Microsoft

Դրանց ամբողջական ցուցակը կարող եք տեսնել այստեղ` պարզապես ընտրելով Market Cap. դաշտում Mega տարբերակը:

Ամփոփելով հոդվածը, ուզում եմ նշել, որ կան բաներ, որոնք անհավանական են թվում: Օրինակ, ինչ անհավանական է թվում այս ցուցակում հայտնվելը: Բայց խնդիր դնելն ամենամեծ ունակություններից մեկն է: Եթե մի օր որևէ հայկական ընկերություն հայտնվի այս ցուցակում, ապա մեր երկիրն այլևս չի դիտվի որպես «գաճաճ երկիր»:

Բոլորին մաղթում եմ առողջություն և թող Նոր տարում Ձեր բոլոր երազանքները նպատակ դառնան:

Հեղինակի մասին

Harust Tga

2 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»