Գրքեր անձնային աճի մասին

Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքերի միջոցով ես կփորձեմ Ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար: -Հ. Մանուկյան


   


Արժեթղթեր

Բաժնետոմսեր. հնարավոր ռիսկերը

Գիտե՞ք երբ է մարդը վախենում ինչ-որ բան անել: Երբ լիովին չի պատկերացնում, թե ինչի մեջ է մտնում, ինչ հնարավոր ռիսկեր կան, ինչ կարող է լինել վատագույն դեպքում և ինչ` լավագույն: Իսկ երբ ամեն ինչ հստակ է, վախը երկրորդ պլան է մղվում և մարդը սկսում է պարզապես անել դա` կամ լավ կամ վատ:

Բաժնետոմսերի հետ կապված բազմաթիվ կարծիքներ եմ լսել: Ոմանց կարծիքով դա «վիճակախաղ» է, որտեղ քեզանից ոչինչ կախված չէ, մյուսների կարծիքով` «խաղատուն», որտեղ կարող ես մտնել և այլևս դուրս չգալ, մի մասի կարծիքով էլ դա մի տեղ է, որտեղ պարտադիր պետք է փողերդ կորցնես: Այս հոդվածում ուզում եմ խոսել այն հնարավոր ռիսկերի և կորուստների մասին, որոնք դուք կարող եք ունենալ բաժնետոմսերով զբաղվելու դեպքում: Իրականում, միգուցե լինեն ինչ-որ «թաքնված» վտանգներ, որոնց ես դեռ չեմ հանդիպել, բայց այստեղ կխոսեմ միայն նրանց մասին, որոնց հանդիպել եմ:

Ընկերությունը, որի բաժնետոմսերը դուք գնում եք, փակվում է

Սա, կարելի է ասել, առաջին վտանգն էր, որի մասին չէի մտածել, մինչև չհանդիպեցի: Այսինքն, հնարավոր է լինեն դեպքեր, երբ դուք գնում եք ինչ-որ ընկերության բաժնետոմսեր, բայց մինչ այդ չեք ուսումնասիրել, որ ընկերությունը գտնվում է ծանր վիճակում, շուկայում նրա ապրանքներն այլևս պահանջարկ չեն վայելում, նա մեծ պարտքեր ունի, իսկ ծախսերը մի քանի անգամ գերազանցում են եկամուտը: Եվ եթե այդպես շարունակվում է վերջին մի քանի տարիների ընթացքում, ապա պետք է մտածեք` այդ դեպքում ինչպե՞ս նա պետք է վճարի աշխատողների աշխատավարձը կամ հոգա այլ ծախսերը, չէ՞ որ բանկերը չեն կարող նրան անվերջ վարկ տալ: Այսինքն, հնարավոր է, որ ընկերությունը լուծարվի: Իսկ այդ դեպքում, ավելի հավանական է, որ ձեր բաժնետոմսերից ձեզ ոչինչ չի մնա:

Նման փորձ ինձ համար եղավ Kodak-ը, որի վրա մինչև հիմա էլ կախված է փակման վտանգը: Բայց պետք չէ մտածել, որ եթե ընկերության վիճակը շատ ծանր է, ուրեմն այն անպայման պետք է փակվի: Դուք պետք է գնահատեք դա, ինչ-որ տեղ նաև զգաք, քանի որ կանխազգացումն այստեղ մեծ դեր է խաղում: Օրինակ, շատ ծանր վիճակում էր նաև Nokia-ն, սակայն դրա բաժնետոմսերի վրա ես աշխատեցի, քանի որ պարզապես չէի հավատում, որ Nokia-ն կարող է փակվել:

Դուք գնում եք բաժնետոմսերը «գագաթում» և դրանց գինը տարիներով մնում է ներքևում

Օրինակ, երբ Facebook-ը դուրս եկավ IPO-ի, դրա բաժնետոմսերը վաճառվում էին 40$-ով: Դրանից հետո դրանց գինը սկսեց նվազել և տատանվել արդեն ներքևում` երբեք չհասնելով 40$ ցուցանիշին: Չնայած կոնկրետ Facebook-ի դեպքում համոզված եմ, որ տարիների ընթացքում դրա բաժնետոմսերի գինը մի քանի անգամ կաճի, բայց պատկերացրեք, որ դա նրա առավելագույն սահմանն էր և մոտակա 10 տարիների ընթացքում այն երբեք չի հասնի 40-ի: Այսինքն, եթե օրինակ դուք ծախսել էիք 400$ 10 բաժնետոմս ձեռք բերելու համար, ապա ցանկացած պահի, եթե ուզենաք վաճառել դրանք, դուք չեք կարող ետ բերել ձեր 400$-ը ամբողջությամբ, այլ կունենաք օրինակ 200 կամ 350$: Այսինքն, ձեր կորուստը կկազմի այդ տարբերությունը:

Նման դեպքերում դուք իհարկե կարող եք չվաճառել բաժնետոմսերը և պահել դրանք այն հույսով, որ 10 տարի անց Facebook-ը թռիչք կապահովի: Եվ նման բան իրոք հնարավոր է: Բայց շատ քչերը կարող են այդքան երկար սպասել, քանի որ սովորաբար մարդիկ կվաճառեն իրենց բաժնետոմսերն առաջին իսկ առիթի դեպքում, երբ նրանց փող անհրաժեշտ լինի: Այդ գումարը նրանք միգուցե ներդնեն ավելի լավ պայմաններով ու ստանան ավելի բարձր տոկոսներ, կամ միգուցե ծախսեն առօրյա նպատակներով, բայց անկախ դրանից, փաստն այն է, որ Facebook-ի վրա նրանք կորցրել են:

Ոչ թե կորուստ, այլ ձեռք չբերված եկամուտ

Եվ վերջապես, երրորդ դեպքը, որը հանդիպել եմ, այն է, որ դուք չեք կորցնում ձեր փողերը, այլ հակառակը` աշխատում եք, բայց կարող էիք աշխատել ավելի շատ: Այսինքն, դուք վաճառում եք ձեր բաժնետոմսերն այն ժամանակ, երբ դրանց գինը սկսում է աճել, բայց պարզվում է, որ ձեր վաճառելուց հետո դրանց գինը շարունակում է աճել և փաստորեն` դուք շտապեցիք: Այստեղ ագահության խնդիրը չէ` աշխատել որքան հնարավոր է շատ, պարզապես դուք ափսոսում եք, որ չկարողացաք «շռնդյունով հաղթել» այդ խաղում, չկարողացաք վերլուծել փաստերը, կանխատեսել մինչև վերջ և փողն այդտեղ ոչ միշտ է դեր խաղում: Այդպես եղավ ինձ մոտ Facebook-ի և Nokia-ի բաժնետոմսերի դեպքում: Օրինակ, Facebook-ի բաժնետոմսերը ես գնեցի 20,73$-ով և վաճառեցի 27,8$-ով, սակայն հաջորդ մի քանի շաբաթվա ընթացքում դրանց գինն աճեց մինչև 31$: Այնպես չէ, որ դժգոհ եմ այդ գործարքից, պարզապես ուզում եմ ձեզ հնարավորինս ներկայացնել բաժնետոմսերի առք ու վաճառքի բոլոր հնարավոր կողմերը:

Եվ վերջում, մեկ խորհուրդ, որին հետևելու դեպքում բաժնետոմսերի առք ու վաճառքով զբաղվելը ձեզ համար «խաղ» կլինի, եթե իհարկե` դա ձեր գլխավոր մասնագիտությունը կամ փող աշխատելու հիմնական միջոցը չէ:

Եթե սկսնակ եք, երբեք առևտրի մեջ մի մտեք այն գումարներով, որոնք ձեր առօրյա կյանքում ձեզ անհրաժեշտ են լինելու:

Մի փորձեք ներդնել այն գումարները, որոնցով դուք սնունդ կամ հագուստ եք գնելու, կոմունալ վճարումներ եք անելու կամ ուսման վարձ եք տալու: Ավելի լավ է բաժնետոմսերի համար առանձին գումար հատկացրեք, որի կորուստը (վատագույն դեպքում) ոչ մի ձև չի ազդի ձեր կյանքի վրա:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

4 մեկնաբանություն

  • Շնորհակալություն շատ հետաքրքիր էր: Իրոք որ այս գործով զբաղվելու համար պետք են ամուր նյարդեր: Բոդո Շեֆերի գրքերից մեկում նա պնդում է որ արժեթղթերի շուկայում մարդկանց 90% առաջնորդվում են էմոցիաներով: Հենց այդ է պատճառը որ խաղից շատերը դուրս են գալիս պարտված:

    • Համաձայն եմ 🙂 Բայց եկեք խոստովանենք, որ դա էլ է պետք, չէ որ ամեն դեպքում պետք է հաղթի լավագույնը, ուժեղը 🙂

      • Իհարկե, բիզնեսը հենց պայքարի այն ձևերից է որտեղ ստուգվում է մադու կայունությունը: Բայց պետ է նաև չմոռանալ որ լավագույն դառնում են ոչ թե այդպիսին ծնվում: Իմ կարծիքով անտաղանդ մարդիկ գոյություն չունեն և լավագույնների տարբերությունը հենց նրանում է որ նրանք բացահատել են իրենց տաղանդները և կենտրոնացել դրանց վրա:

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»