Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Ստարտափ

Ստարտափի ֆինանսավորում. Y Combinator

Այսօր ուզում եմ խոսել Սիլիկոնյան հովտի ամենահայտնի բիզնես աքսելերատորի մասին՝ Y Combinator: Բիզնես աքսելերատորները, ընդհանրապես, հնարավորություն են տալիս ստարտափին արագ աճել (անգլերեն accelerate բառից՝ արագացնել): Այսինքն, նրանց գլխավոր ֆունկցիան է ոչ թե ֆինանսավորելը, այլ անհրաժեշտ մարդկանց՝ այդ թվում ներդրողների հետ կապելը, ստարտափի բիզնես մոդելը մշակելը, խորհուրդներ տալը, ընկերության ստեղծման և իրավաբանական այլ հարցերը լուծելը, այսինքն այն ամենը, որն առանց օգնության հիմնադիրները միգուցե անեին շատ երկար ժամանակում:

Y Combinator-ը տարեկան երկու անգամ կազմակերպում է եռամսյա հավաքներ Սիլիկոնյան հովտում՝ հունվարից մարտ և հունիսից օգոստոս: Իմիջիայլոց, 2013թ-ի հունիսի հավաքներին մասնակցելու համար պետք է դիմել մինչև մարտի 29-ը (որքան շուտ, այնքան լավ, քանի որ Y Combinator-ի թիմն ավելի շատ ժամանակ կունենա նախագծին ծանոթանալու համար): Սկզբում դուք Y Combinator-ի կայքից ուղարկում եք դիմում: Դիմումին կարող եք ծանոթանալ ինքներդ, բայց եթե կարճ ասեմ, այնտեղ նշվում է ինֆորմացիա հիմնադիրների մասին (ինչ նախագծեր են նրանք արել նախկինում, որտեղից են իրար ճանաչում, սովորում են, թե աշխատում, կարող են արդյոք թողնել ամեն ինչ և գալ Սիլիկոնյան հովիտ, և այլն), նույնիսկ անհրաժեշտ է 1 րոպեանոց կարճ տեսանյութ Youtube-ում, որտեղ հիմնադիրները խոսում են իրենց և իրենց նախագծի մասին: Դիմումում անպայման նշվում է նախագծի մասին, այսինքն որն է գլխավոր միտքը, ինչն է առանձնացնում ձեզ մնացածից, կա արդյո՞ք կայքի պրոտոտիպը (իմիջիայլոց, սա ընդհանրապես պարտադիր չէ, քանի որ այդ 3 ամսվա ընթացքում հիմնադիրներն աշխատում են հենց պրոտոտիպի վրա), ովքեր են հավանական մրցակիցները, և այլն, և այլն: Ընդ որում, շատ ցանկալի է, որ հիմնադիրները լինեն 2 կամ 3 հոգի: Մեկ հիմնադիր ունեցող նախագծերը քիչ ուշադրության են արժանանում:

Դիմելուց հետո, եթե դուք հետաքրքրություն եք առաջացնում Y Combinator-ի շրջանակներում (որի հիմնադիրը հանրահայտ Պոլ Գրեհեմն է), ապա այնտեղից կապնվում են ձեզ հետ, հոգում են ձեր ճանապարհածախսը 1100$-ի չափսով և դուք թռչում եք Սիլիկոնյան հովիտ անձնական հարցազրույցի (2013թ-ի ամառային սեզոնի համար հրավերքը տեղի է ունենալու ապրիլի 16-ին, իսկ հարցազրույցը՝ ապրիլի 26-ից 30-ը): Եթե դուք բարեհաջող անցնում եք հարցազրույցը, ապա դա արդեն հաղթանակ է, որովհետև 3 ամիս դուք աշխատելու եք աշխարհում ոլորտի լավագույն մասնագետների հետ, հանդիպելու եք ամենահայտնի ներդրողներին և լինելու եք այնպիսի միջավայրում, որտեղ ստեղծարարությունն ու բիզնեսն ուղղակի ամենուր են: Այդ 3 ամսվա ընթացքում դուք աշխատելու եք նախագծի պրոտոտիպի վրա, ամեն երեքշաբթի ընթրելու եք որևէ հանրահայտ մասնագետի կամ ներդրողի հետ (օրինակ` Գայ Կավասակի, Սթիվ Բլանկ, Մարկ Ցուկերբերգ, Պիտեր Տիլ, իսկ ամեն մի ընթրիքը, կարելի է ասել, փոքրիկ պրեզենտացիա է լինելու), իսկ 3 ամիս անց տեղի է ունենալու ամենասպասված իրադարձությունը՝ Demo Day-ը, որտեղ դուք ներկայացնելու եք ձեր նախագիծը ներդրողներին աշխարհի տարբեր ծայրերից: Եթե ամեն ինչ բարեհաջող անցնի և ներդրողները տեսնեն ձեր նախագծի ապագան, ապա շնորհավորում եմ՝ ձեր կյանքը դրանից հետո կփոխվի: Դուք կստանաք մեծ ֆինանսավորում, կբացեք ձեր գրասենյակը Սիլիկոնյան հովտում և կսկսեք զարգացնել ձեր նախագիծը: Իսկ եթե ոչինչ էլ չլինի, ամեն դեպքում, այդ 3 ամիսը, համոզված եմ, որ կդառնա ձեր կյանքի ամենագլխավոր իրադարձություններից մեկը:

Այդ ամենը կազմակերպելու համար Y Combinator-ը ուզում է ձեր ընկերության 2-10%-ը՝ կախված կոնկրետ նախագծից (կարծում եմ՝ բավական խելքին մոտ թիվ է): Բացի այդ, սկզբնական շրջանում նա ինքն էլ տրամադրում է մինչև 20 000$ ֆինանսավորում, որը հիմնականում անհրաժեշտ է լինում այդ 3 ամսվա ընթացքում հիմնադիրների ապրելու և մնացած ծախսերը հոգալու համար: Հիմնականում հիմնադիրներն աշխատելու են Սիլիկոնյան հովտում իրենց բնակության վայրից՝ չնայած ընթացքում անընդհատ լինելու են հանդիպումներ Y Combinator-ի տարածքում: Y Combinator-ը օգնում է բացել ձեր ընկերությունը, կարգավորում է իրավաբանական հարցերը, պատենտների հետ կապված հարցերում է օգնում, եթե դրա անհրաժեշտությունը կա, և այլն: Մի խոսքով, ձեզ մնում է ունենալ միայն լավ գաղափար և որն ավելի կարևոր է՝ լավ թիմ, քանի որ Y Combinator-ը շատ մեծ ուշադրություն է դարձնում հիմնադիրներին և թիմին: Ինչպես ասում են՝ Սիլիկոնյան հովտում լավ գաղափարները նույնիսկ օդում են պտտվում, բայց անհրաժեշտ են մարդիկ, ովքեր կվերցնեն դրանք և իրականություն կդարձնեն: Այնպես որ, եթե դուք ունեք լավ գաղափար, հաստատակամություն շարժվել մինչև վերջ, լավ գործընկեր և աշխատելու այրիչ ցանկություն, ապա միգուցե ամռանը հանդիպենք Y Combinator-ում: Ով գիտի… 🙂

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

14 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»