Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Բիզնես և ֆինանսներ

Ինչու է պետք պատենտավորել գաղափարը. Tetris-ի օրինակը

1984թ-ին ռուս ծրագրավորող Ալեքսեյ Պաժիտնովը աշխատում էր ՍՍՀՄ Գիտությունների Ակադեմիայի հաշվողական կենտրոնում: Այնտեղ նա զբաղվում էր արհեստական ինտելեկտի հետ կապված խնդիրներով և իր ուսումնասիրությունների ընթացքում կիրառում էր նաև տարբեր գլուխկոտրուկ-խաղեր: Հենց այդ ժամանակ է նրա մոտ ծնվում փոքրիկ քառակուսիներից կազմված, տարբեր կառուցվածք ունեցող մարմինների իրար վրա տեղադրումը, որը հետագայում վերածվում է հանրահայտ Tetris խաղին: 1984թ-ին իր «Էլեկտրոնիկա-60» համակարգչի վրա նա գրում է Tetris-ի առաջին տարբերակը:

Խաղը միանգամից ճանաչում է ձեռք բերում Մոսկվայում, ապա սկսում տարածվել նաև ողջ աշխարհում: Երբ այն հասնում է Հունգարիա, դրա վրա ուշադրություն է դարձնում ազգությամբ հունգարացի, բրիտանական ծրագրային ապահովման ընկերության ղեկավար Ռոբերտ Սթեյնը: Սթեյնը թռչում է Ռուսաստան, հանդիպում է Պաժիտնովի հետ և պայմանավորվածություն է ձեռք բերում խաղի թողարկման լիցենզիայի հետ կապված: Կարծելով, որ նա արդեն իրավունք ունի ազատ վաճառել Tetris-ի թողարկման իրավունքը, նա վաճառում է Tetris-ի իրավունքները բրիտանական մեդիա-մագնատ Ռոբերտ Մաքսվելին պատկանող ընկերությանը:

1988թ-ին խաղեր ստեղծող և թողարկող Bullet-Proof Software ընկերության նախագահ Հենք Ռոջերսը զբաղվում էր դեպի Ճապոնիա խաղերի արտահանմամբ: Նա ծանոթանում է Tetris-ին 1988թ-ին Լաս Վեգասում անցկացված կենցաղային էլեկտրոտեխնիկայի ցուցահանդեսի ժամանակ: Խաղը նրան դուր է գալիս: 1989թ-ին հանրահայտ ճապոնական Nintendo ընկերության ամերիկյան ներկայացուցչությունը համոզում է Ռոջերսին բանակցել Սթեյնի հետ` Tetris-ը Nintendo-ի կողմից թողարկվող Game Boy ձեռքի խաղային համակարգիչներում տեղադրելու իրավունքը ձեռք բերելու համար: Սակայն Ռոջերսին չի հաջողվում կապ հաստատել Սթեյնի հետ և նա թռչում է Մոսկվա` հանդիպելու խաղի հիմնադրի հետ: Ռոջերսը և «Էլեկտրոնօրգտեխնիկա» ընկերության ղեկավարները (որն այդ ժամանակ զբաղվում էր ՍՍՀՄ Գիտությունների Ակադեմիայի առևտրային գործերով) պայմանավորվածություն են ձեռք բերում, ըստ որի Ռոջերսի ընկերությունը ստանում է Tetris-ը ձեռքի խաղային սարքավորումներում տեղադրելու իրավունքը: Արդյունքում, այդ իրավունքը նրանից գնում է Nintendo-ն, ապա իրավունքի համար դատական գործեր են սկսվում նշված և տարբեր այլ ընկերությունների միջև, որն իրականում այդքան էլ կարևոր չէ, իսկ կարևորն այն է, որ այդ ողջ խառնաշփոթը սկսվում է այն պատճառով, որ Պաժիտնովը չէր պատենտավորել իր գաղափարը ԱՄՆ-ում և այլ երկրներում:

Արդյունքում, Tetris խաղը հարստացնում է բոլորին, բացի իր հիմնադրից: Սթեյնը աշխատում է Tetris-ի վրա մոտավորապես 200 հազ դոլար, ռուսների և Nintendo-ի միջև միջնորդները` 30-40 մլն դոլար, Nintendo-ն` ավելի քան 2 մլրդ դոլար, ՍՍՀՄ Գիտությունների Ակադեմիան` մոտ 10 մլն դոլար, իսկ ծրագրավորող Ալեքսեյ Պաժիտնովը ստանում է միայն որոշ համեստ նվերներ, ծառայողական միջին վարձատրություն, անձնական համակարգիչ և այլն: Եվ միայն 1991թ-ին է նա տեղափոխվում ԱՄՆ, որտեղ 1996թ-ին Ռոջերսի հետ համատեղ բացում է The Tetris Company LLC ընկերությունը, որը փորձում է աշխատել Tetris ապրանքանիշի օգտագործման իրավունքը վաճառելով: Այնուհետև, 1996թ-ից 2005թ-ը Պաժիտնովն աշխատում է Microsoft ընկերության համակարգչային խաղերի ստեղծման բաժնում, ապա սկսում աշխատել խաղեր արտադրող այլ ընկերությունում: 2007 և 2009թթ-ին արժանանում է խաղերի հետ կապված պատվավոր մրցանակների, իսկ այժմ էլ խոսակցություններ կան, որ նա աշխատում է Tetris-ի multiuser տարբերակի (երբ խաղը կարող են խաղալ միաժամանակ մի քանի մարդիկ) վրա:

Հ.Գ.
Եվ վերջում, մի փոքրիկ հարցազրույց տարիներ անց Tetris-ի հիմնադրի և դրա տարածողի` Հենք Ռոջերսի հետ (տեսանյութի 2-րդ մասն այստեղ)

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

3 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»