Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Բիզնես և ֆինանսներ

Սկսնակ բիզնեսի տապալման գլխավոր պատճառներից մեկը

Շատերը, ովքեր բիզնեսով են զբաղվել, սակայն նրանց բիզնեսը հաջողություն չի ունեցել, կարծում եմ կհաստատեն, որ դրա գլխավոր պատճառներից մեկն այն է, որ ինչ-որ պահի վերջանում են ֆինանսները: Իսկ քանի որ շահութաբերության կամ նույնիսկ եկամտաբերության, սկսնակ բիզնեսները սովորաբար հասնում են ոչ միանգամից, ապա ֆինանսների անբավարարությունը սկզբնական փուլում նշանակում է մահ բիզնեսի համար: Այնպես որ, հատկապես այդ շրջանում, պետք է մտածված վատնել ամեն մի կոպեկը: Եվ եթե որևէ ծախս անհրաժեշտություն չէ, դրանից պետք է խուսափել, իհարկե, եթե բիզնեսն այնպիսի եկամուտներ չի բերում, որ ֆինանսների մասին ընդհանրապես պետք չէ մտածել:

Ահա թե ինչպես է սովորաբար լինում: Գործընկերները որոշում են բիզնես սկսել և գրանցում են ընկերություն: Ընկերությունն արդեն կա, սակայն ինչ բիզնես, առանց նորմալ գրասենյակի: Վարձում են գրասենյակ, գնում են կահույք, համակարգիչ, նույնիսկ վարձում են աշխատողներ, որոնք այդ պահին դեռ պետք չեն և սկսում են սպասել, թե երբ ընկերությունը եկամուտ կստանա, որպեսզի փակեն այդ բոլոր ծախսերը: Իսկ նույնիսկ ամենափոքր բիզնեսի դեպքում նվազագույն ամսեկան ծախսեր պարտադիր կան՝ հարկեր, հեռախոսի, ինտերնետի և այլ վճարումներ, մարքեթինգ, եթե աշխատողներ կան՝ աշխատավարձ, և այլն: Սակայն քանի որ ընկերությունը դեռ եկամուտ չունի, այդ ծախսերը տանում են նրան դեպի անդունդ:

Կարծում եմ ծանոթ իրավիճակ է, շատերս ենք տեսել կամ ապրել դա: Երբ ես մի քանի տարի առաջ բացեցի փոքրիկ ընկերություն, որը զբաղվելու էր ինտերնետ բիզնեսով, վարձեցի գրասենյակ, քանի որ նախ չգիտեի՝ հնարավո՞ր է արդյոք ունենալ ընկերություն առանց գրասենյակի, և 2-րդը՝ դա թույլ էր տալիս զգալ բիզնեսի համը՝ չէ՞ որ դու ունես ՔՈ ՍԵՓԱԿԱՆ ԳՐԱՍԵՆՅԱԿԸ 🙂 Ընդամենը անուրջներ էին.. Մոտ մեկ տարի պահելուց հետո գրասենյակը հանձնեցի, քանի որ դրա անհրաժեշտությունն ընդհանրապես չկար: Ճիշտ է՝ ֆինանսական առումով դա ինչ-որ խնդիրների առջև չկանգնեցրեց, ամեն դեպքում՝ այդ գումարները կարելի էր ծախսել ինչ-որ բանի վրա, որն իրոք կազդեր ընկերության բիզնեսի վրա՝ կօգներ վաճառքները շատացնել, նոր ծառայություններ մատուցել, ավելի շատ հաճախորդներ ներգրավել, և այլն:

Բայց հիմա այդ ամենը շատ լավ հասկանում եմ: Ուստի նույնը ուզում եմ խորհուրդ տալ նաև ձեզ. բիզնես սկսելուց կարևորը ոչ թե այն է, թե ինչպես է ձեր բիզնեսը երևում այլ մարդկանց աչքերում, այլ այն, թե ինչ է այն իրենից իրոք ներկայացնում: Բիզնես սկսելիս պետք է փորձել հնարավորինս շուտ եկամուտ ստանալ, պետք է անել ամեն ինչ, որպեսզի սկսել վաճառել, հաճախորդներ ներգրավել, և կարևոր չէ՝ դուք դա անում եք տանից, ավտոտնակից, թե գրասենյակից: Նաև կարևոր չէ՝ անում եք դա ինքներդ, ծանոթների օգնությամբ, թե աշխատողների: Շատ դեպքերում, իհարկե, գրասենյակը և մյուսները, որոնց մասին խոսեցինք վերևում, անհրաժեշտ են, օրինակ, երբ ձեր գործունեության ոլորտն այնպիսին է, որ դուք անընդհատ պետք է հանդիպեք հաճախորդների կամ գործընկերների հետ, պայմանագրեր կնքեք, և այլն: Բայց եթե դա այդպես չէ, շքեղ ու հարմարավետ գրասենյակի և մնացածի մասին կմտածեք ավելի ուշ, երբ բիզնես մոդելն իրեն արդարացնի և սկսեք կայուն եկամուտ ստանալ: Իսկ մինչ այդ՝ խուսափեք բոլոր անտեղի ծախսերից և ավելորդություններից:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»