Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Ստարտափ

Ներդրո՞ւմ է անհրաժեշտ. իսկ ինչո՞ւ վարկ չեք վերցնում

Ռուսական «Успех ТВ» հեռուստաալիքով մի հաղորդում կա. կոչվում է «Стартап-шоу Премьера»: Հաղորդման ընթացքում տարբեր թիմեր ներկայացնում են իրենց նախագծերը, իսկ ժյուրին, որը կազմված է ներդրումային ֆոնդերի ներկայացուցիչներից և հաջողակ գործարարներից, պետք է որոշում կայացնի, թե որ թիմերն են անցնում հաջորդ փուլ և որոնցում են իրենք պատրաստ ներդրում անել: Բայց այս հոդվածը ոչ թե այդ հաղորդման մասին է, այլ դրա ընթացքում տրվող մի հարցի, որի վրա ուշադրություն դարձրեցի:

Տեսնո՞ւմ եք նկարում պատկերված դեմքերը: Դրանք ներդրողների «ինֆորմացիան արագ վերլուծող» դեմքերն են, որոնց առջև ինչ-որ բան են ներկայացնում և նրանք պետք է փորձեն արագ կողմնորոշվել և հասկանալ՝ արդյո՞ք դա բիզնեսի տեսանկյունից հետաքրքիր առաջարկ է, թե հերթական երազողը երազանքների գիրկն է ընկել: Եվ երբ մասնակիցները վերջացնում են իրենց ելույթները, ներդրողները տալիս են հարցեր: Դրանք այն հարցերն են, որոնք միգուցե մի օր ձեզ տան ձեր ներդրողները, երբ դուք նրանց առջև կանգնած լինեք: Եվ այդ հարցերից մեկը հետևյալն է. «Ինչո՞ւ դուք բանկից վարկ չեք վերցնում»:

Իրականում սա շատ խելացի հարց է: Մինչև այն վերլուծելն ասեմ, որ հաղորդման ընթացքում հանդես են գալիս 2 տեսակի թիմեր. նրանք, որոնք արդեն ունեն գործող բիզնես, ունեն շրջանառություն և նրանց ներդրում է անհրաժեշտ բիզնեսը զարգացնելու համար (կամ այն չկորցնելու, քանի որ կարող ես ունենալ շրջանառություն, բայց ծախսերը գերազանցեն եկամուտը և ինչ-որ պահի գումարները վերջանան) և նրանք, որոնց մոտ ամեն ինչ գաղափարի մակարդակում է կամ իրականացման սկսնակ փուլում և չկա եկամուտ: Երկու դեպքում էլ թիմերը ներդրողներին ներկայացնում են «հստակ» կանխատեսումներ, թե որքան եկամուտ իրենք կարող են ունենալ 2 կամ 5 տարի անց: Եվ ներդրողների բնական արձագանքը լինում է հետևյալը. «Այո, ամեն ինչ շատ լավ է, դուք ունեք հստակ պլան, գիտեք, թե երբ և որքան գումար եք աշխատելու, այդ դեպքում ինչո՞ւ դուք չեք կազմում բիզնես պլան և ինչո՞ւ չեք ներկայացնում այդ պլանը բանկ՝ վարկ ստանալու նպատակով: Չէ՞ որ ներդրողների ներդրած գումարները համարվում են «ամենաթանկ» գումարները : Ինչո՞ւ ենք մենք ձեզ պետք»:

Շատերն այս հարցից հետո լռում են: Պատճառն այն է, որ հարցի մեջ կա հստակ տրամաբանություն: Ներդրողների ներդրած գումարները իրոք համարվում են «ամենաթանկ» գումարները, քանի որ դրանց դիմաց ներդրողն ուզում է ձեր ընկերության մի մասը: Իսկ դա նշանակում է՝ քանի դեռ ձեր ընկերությունը կա, դուք վճարելու եք ձեր ներդրողին ձեր շահույթի մի մասը, և այդ տոկոսը բավական մեծ է լինելու: Իսկ բանկից վարկ վերցնելու դեպքում դուք գումարը կներդնեք ձեր գործի մեջ, կստանաք ձեր կանխատեսած եկամուտները, մի քանի տարվա ընթացքում կփակեք վարկը և դուք ազատ մարդ եք: Ավելի լավ տարբերակ չէ՞: Իսկ եթե ձեր կանխատեսումները անհիմն են և դուք չեք կարող փակել վարկը, այդ դեպքում ինչո՞ւ ներդրողները պետք է գումար ներդնեն ձեր նախագծի մեջ և կորցնեն այն:

Այս հարցին յուրաքանչյուրս պետք է պատասխանի իր համար: Օրինակ, կա այսպես կոչված «խելացի փողեր» հասկացությունը, երբ խոսքը գնում է ոչ միայն զուտ փողը ստանալու մասին, այլ նաև խորհուրդների, աջակցության, կապեր ստեղծելու և այլն: Բայց դրա մասին առանձին: Իսկ ընդհանուր, վերլուծելով հոդվածը, ավարտեմ միտքս հետևյալով. բոլոր նորաստեղծ ստարտափները միանգամից «երազում են» ներդրման մասին: Սակայն դա մի բան չէ, որի մասին պետք է երազել: Դրա անհրաժեշտությունն իրոք պետք է զգալ և պետք է կարողանալ հիմնավորել դա: Ներդրողներին հնարավոր չէ «պտտեցնել» 🙂 Դա այդ մարդկանց պրոֆեսիոնալ զբաղմունքն է և նրանք բազմաթիվ թիմեր են տեսել: Այնպես որ, մինչև փորձելը ներդրողներից գումար ներգրավել, տվեք ձեզ այդ հարցը: Փորձեք վերլուծել, հասկանալ, քանի որ ինչ-որ պահի նույն բանը հարցնելու է ձեզ ձեր ներդրողը:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

1 մեկնաբանություն

  • Էհ էս ինչ լավ թեմա էր))) Մի գիրք էի կարդացել մանագիտական այնտեղ խորհուդ չէին տալիս գործը սկել վարկով կամ ինչ որ մեկի վերցված գումարով,թեկուզ ներդրողներից ստացված:Միշտ աում էի լավ բայց ինչու՞:Հիմա շաաատ լավ եմ հասկանում:Նոր սկսվող բիզնեսում ինչքան էլ հստակ հաշվարկներ անես միևնույն է ինչ որ պահին ինչ որ բան այն չի ընդհանա ու ոչ ներդրողին կհետքարքրի ,ոչ էլ բանկին :Իրենք ակնկալում են իրենց ներդրման արդյունքը:Ցանկացածը կարող է իր գործը սկսել զրոյից առանց մի կոպեկի ,ճիշտ է դանդաղ բայց շատ հտակ քայլերով առաջ գնալ:Ես 100%-ով համոզվել եմ դրանում:

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»