Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Հաջողության գաղտնիքներ

Միջավայրը ձևավորում է մարդուն

Այն, որ միջավայրը ձևավորում է մարդուն, ես զգացել եմ սեփական մաշկի վրա, նաև այն զրույցների հիման, որոնք ունեցել եմ տարբեր մարդկանց հետ: Միջավայրը միայն մարդիկ չեն, չնայած շրջապատի մարդկանց ազդեցությունը մեր ձևավորման հարցում ահռելի է: Միջավայրը նաև կենցաղն է, մեր ապրելակերպը, մեզ շրջապատող իրերը: Միջավայրի ազդեցությունը հսկայական է, քանի որ այն ազդում է մեր ենթագիտակցության, մտածելակերպի, հետևաբար նաև սովորությունների և քայլերի վրա:

Երբեմն անհրաժեշտ է լինում փոխել միջավայրը, որպեսզի փոխվենք մենք ինքներս: Երբ ես որոշեցի, որ ուզում եմ հայտնվել ինչ-որ կետում, ես փոխեցի միջավայրս, որն ամեն կերպ ինձ պետք է օգներ, որ ես հայտնվեի այդ կետում: Միջավայրի փոփոխությունը բերում է ինֆորմացիայի փոփոխության, որն ամեն օր մուտք է գործում մեր ուղեղ: Դա այն ինֆորմացիան է, որը ձևավորում է մեր մտքերը և անում է դա մեզանից անկախ, հետևաբար ձևավորում է նաև մեր հետագա կյանքը:

Իսկ ինչպե՞ս ձևավորել միջավայրը, ինչից ելնելով, ինչպե՞ս հասկանալ, որ դա այն միջավայրն է, որը մեզ պետք է:

Սկզբում պատկերացրեք այն կետը, որում ուզում եք հայտնվել: Ապա սկսեք շփվել մարդկանց հետ, որոնք կամ գտնվում են այդ կետում, կամ նույնպես շարժվում են այդ ուղղությամբ՝ նույն եռանդով և խանդավառությամբ: Դա ամենագլխավորներից մեկն է. մարդիկ, ում հետ դուք շփվում եք ամեն օր:

Երկրորդն այն վայրը կամ վայրերն են, որտեղ դուք անցկացնում եք ձեր օրը: Այդտեղ դուք ձեզ պետք է հրաշալի զգաք, զգաք, որ ունեք թևեր և կարող եք թռչել: Իսկ նման զգացումը ձևավորում են ոչ միայն մարդիկ, այլ նաև շրջապատող իրերը, կահավորանքը, տեսարանը: Շրջապատեք ձեզ իրերով, որոնք ձեզ հիշեցնում են, թե դեպի ուր եք դուք շարժվում: Վերացրեք այն իրերը, որոնք ձեզ շեղում են և չեն նպաստում նրան, ինչին դուք ձգտում եք:

Փոխեք ձեր ապրելակերպը, եթե դրա շնորհիվ դուք կարող եք ավելի արագ հասնել ձեր նպատակակետին: Փոխեք ձեր սնվելու կարգը, բարելավեք ֆիզիկական վիճակը, հրաժարվեք վատ սովորություններից, ֆիլտրեք այն ինֆորմացիան, որն ամեն օր ստանում եք, և արեք դա միայն նրա համար, որ հնարավորինս շուտ հայտնվեք այն կետում, որին դուք ձգտում եք:

Եվ վերջում, այս ամենին վերաբերվեք որպես ձեռքբերում, որպես հերթական քայլ դեպի նպատակը, քանի որ իրականում այդպես էլ կա: Միջավայրը փոխելը հաճախ հեշտ չէ՝ տարբեր պատճառներից ելնելով, սակայն շատ բան կախված է նրանից, թե որքան մեծ է ձեր ձգտումը, որքան շատ եք դուք ուզում հայտնվել այն կետում, որն այս պահին պտտվում է ձեր գլխում:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

5 մեկնաբանություն

  • Բարև հարգելի Հրաչ
    Ես ցանկանում եմ հոդված գրել Ռիչարդ Բրենսոնի մասին: Ուզում եմ իմանալ արդյոք նրա մասին հոդված կա գրած արդեն?

  • Հիշեցի, որ արդեն կա հոդված Ռիչարդ Բրենսոնի մասին: Ի դեպ ես կարդացել եմ նրա “Գրողի ծոցը ամեն ինչ: Թող և սկսիր նորից” գիրքը: Հանճարեղ է:

    • Բարև Զառա ջան 🙂
      Հոդված, այո, կա, իսկ գիրքը իրոք որ շատ լավն է, երկար ժամանակ ազդեցության տակից չես կարողանում դուրս գալ:

  • Խորհուրդ կտամ կարդալ նաև Սթիվեն Քովիի Семь Навыков Высокоэффективных Людей գիրքը: Շատ լավն է

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»