Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Անձնային աճ Առողջ ապրելակերպ

Կամքի ուժ. ինչպես ղեկավարել սովորությունները

Տասնվեց տարեկանում ես հայտնվեցի կոմայում: Այն քսան րոպեներից, երբ բժիշկները պայքարում էին կյանքիս համար, ես ոչինչ չեմ հիշում, ի տարբերություն հարազատներիս, ովքեր քսան րոպե սարսափ ապրեցին: Կոմայում հայտնվելուս պատճառը խնջույքի ժամանակ ալկոհոլի չարաշահումն էր:

Հաջորդ տարի դարձա ուսանող, և ինչպես նոր կյանք մտած երիտասարդներից շատերը, ովքեր ազատության հուժկու ալիքի հարված են զգում իրենց վրա, ես նույնպես սկսեցի ծխել: Ուսանողական և դրան հաջորդող մի քանի տարին անցան նմանակերպ. ալկոհոլ, ծխախոտ, արագ սնունդ, ժամանց:

Ուսանողական կյանքն ավարտելուն պես, երբ վերադարձա բանակից և սկսեցի աշխատել, ինձ թվում էր, որ արդեն հասուն, գիտակից մարդ եմ, ում համար նոր կյանք է սկսվում: Սխալվում էի: Ավելի ուշ հասկացա միայն, որ նույնիսկ այդ տարիները գիտակից համարել չէր կարելի, քանի որ այն, թե ինչպես էի ես ապրում և ինչով էի զբաղվում, թելադրում էր ոչ թե գիտակցությունս, այլ սովորություններս, որոնք ձևավորվել էին տարիների ընթացքում: Այդ սովորությունները ձևավորվել էին այն հասարակության մեջ և շնորհիվ, որտեղ ես ապրում էի, և որտեղ ապրում ենք մենք բոլորս: Իմ սովորությունների հիմքում իմ որոշումները չէին. դրանք ինչ-որ մեկն ասես «գլխիս մեջ էր դրել»: Երբ հասկացա դա, սկսեցի ղեկավարել սովորություններս:

Հիմա ես երեսուներկու տարեկան եմ: Արդեն ութ տարի է, ինչ ընդհանրապես չեմ ծխում և ալկոհոլ չեմ օգտագործում, հեռուստացույց չեմ դիտում և բացասական բաների մասին չեմ մտածում: Եթե նախկինում առանց շաքարավազ թեյ չէի խմում, աղ օգտագործում էի չափից շատ և մսակեր էի, ապա այժմ հրաժարվել եմ շաքարավազից ու աղից և դարձել եմ բուսակեր: Չեմ օգտագործում նաև գազավորված ըմպելիքներ, սուրճ, պաղպաղակ և հեշտությամբ կարող եմ հրաժարվել ցանկացած քաղցրավենիքից: Փոխարենը շատ միրգ և բանջարեղեն եմ ուտում և միշտ ձգտում եմ առողջ սնվել:

Սկսել եմ շատ քայլել, սպորտով զբաղվել, վաղ եմ քնում և վաղ արթնանում, ամեն օր գիրք եմ կարդում, երբեք ոչնչից չեմ բողոքում… այս ցուցակը դեռ երկար կարող եմ շարունակել: Իմ մեջ ձևավորվել է սովորություն` ղեկավարել սովորություններս: Ես դա հեշտությամբ եմ անում: Երբ ես որոշում եմ, որ ինչ-որ բան պետք է չանել, ես դա չեմ անում: Եվ հակառակը, երբ պետք է նոր սովորություն ձեռք բերել, ես այն առանց լրացուցիչ ջանքերի ձեռք եմ բերում: Հավատացե՛ք, այն զգացման հետ, երբ դու ղեկավարում ես քո սովորությունները, ոչինչ չի կարող համեմատվել:

Իրականում, դուք նույնպես կարող եք ղեկավարել ձեր սովորությունները. յուրաքանչյուր մարդ կարող է դա: Եթե կարդում եք այս տողերը, հավանաբար դուք դրա կարիքը ունեք: Եկեք միասին փորձենք հասկանալ, թե ինչպես անել դա: Դուք կարող եք հեշտությամբ ազատվել ցանկացած սովորությունից և ձեռք բերել նոր սովորություններ: Այն ամենը, ինչ դրա համար անհրաժեշտ է, արդեն կա ձեր ներսում:

***

Հարգելի ընթերցող, սա հատված է իմ հաջորդ գրքից, որը լույս կտեսնի շուտով: Գիրքը մի բանի մասին է, ինչը կարող է ամբողջությամբ փոխել Ձեր կյանքի հունը. սովորությունները ղեկավարելու: Գրքի հրատարակման մասին տեղեկացված լինելու համար կարող եք բաժանորդագրվել` սեղմելով ներքևում գտնվող կոճակը:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»