Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Հաջողության գաղտնիքներ

Մի լսեք տատիկի գործնական խորհուրդները

Գործարար տատիկը

Շատերիս համար աշխատավարձից բացի այլ եղանակով գումար աշխատելը դժվար է կամ գրեթե անհնար: Համենայն դեպս՝ մենք այդպես ենք կարծում, քանի դեռ չենք փորձում: Համակարգը, որում մենք մեծացել ենք, սովորեցրել է մեզ, որ գումար պետք է աշխատել աշխատավարձով: Դա ներծծված է մեր ենթագիտակցության մեջ: Մարդկանց համար, ովքեր չեն անցել կրթական համակարգով մինչև վերջ, ինքնուրույն գումար աշխատելն ավելի հեշտ է: Լինելով համակարգից դուրս՝ նրանք իրենք են ժամանակի ընթացքում ձեռք բերել գումար աշխատելու հմտություններ: Այլ տարբերակ չկա. ապրել է պետք:

Աշխատավարձը միգուցե լավ է սկսելու համար, բայց ոչ կյանքն ավարտելու: Մի այսպիսի ասացվածք կա. «Ես դեռ չեմ ճանաչում աշխատավարձով ապրող միլիոնատերերի»: Խոսքը դոլարային միլիոնատերերի մասին է: Իհարկե, տեխնոլոգիական հսկա ընկերությունների դարաշրջանում դոլարային միլիոնատեր-տնօրեններ կան, բայց ավելի մեծ է հավանականությունը, որ դուք դոլարային միլիոնատեր կդառնաք սեփական բիզնեսով, քան կլինեք նրանցից մեկը:

Աշխատավարձը ենթադրում է սեփական ժամանակի և գիտելիքների օգտագործում: Այլ եղանակով գումար աշխատելը ենթադրում է հնարավորությունների հայտնաբերում կամ ստեղծում: Երբ հնարավորությունը վերածվում է համակարգի, դուք ներդնում եք ոչ թե սեփական ժամանակը և գիտելիքը, այլ ուրիշների: Այսինքն այն, ինչը սահմանափակ է, դուք վերածում եք անսահամանափակի: Դրանումն է ֆինանսապես աճելու գաղտնիքը:

Ժամանակներն արագ փոխվում են: Վերնագրում նշված «տատիկն» իրականում հին համակարգն է՝ իր ներկայացուցիչներով: Այն, ինչը գործել է նախկինում, այսօր այլ կերպ է գործում: Այն, ինչը գործում է այսօր, վաղն այլ կերպ է գործելու: Եվ դա տեղի է ունենում շատ արագ: Վեց տարի առաջ 1000 դոլարով 400 բիթքոյին գնած երիտասարդի կարողությունն այսօր գնահատվում է մի քանի միլիոն դոլար: Մեկ այլ երիտասարդ, ում «տատիկը» խորհուրդ էր տալիս չզբաղվել սեփական նորաձև հագուստի արտադրությամբ, երբ նա անում էր դա սեփական բնակարանում և առաջին տարվա ընթացքում մի քանի հարյուր դոլար էր աշխատում, այլ փոխարենը որևէ ընկերությունում մենեջեր աշխատել, այսօր հագուստի խանութների ցանց ունի: Պիցցա առաքողը, հասկանալով պիցցայի բիզնեսի առանձնահատկությունները, սեփական բիզնեսն է սկսում և նախկին գործատուից առաջ անցնում:

«Տատիկի» խորհուրդները պետք է լսել այն ժամանակ, երբ դուք ուզում եք ապրել այնպես, ինչպես տատիկը: Եթե դա չեք ուզում, ապա ինքնուրույն որոշեք, թե ինչ եք ուզում: Որոշելուց հետո փորձեք՝ ունենալով այն հնարավորությունները, որոնք ներկա պահին ունեք: Փորձելուց հետո ինչ-որ բան հաստատ ստացվելու է՝ փոքր մասշտաբներով: Կառուցեք համակարգ, որը կօգնի փոքրն աստիճանաբար մեծացնել: Մեծացնելուց հետո վերադարձեք այստեղ, և իմ հոդվածի տակ մեկնաբանության տեսքով գրեք ձեր պատմությունը: Կսպասեմ: Իմ մոտ ամեն ինչ սկսեց փոխվել այն ժամանակ, երբ ես դադարեցի լսել տատիկիս խորհուրդները:

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»