Օնլայն վճարումներ

Եթե 5-10 տարի առաջ Հայաստանում հազվագյուտ մարդիկ էին օնլայն վճարումներ կատարում, ապա այսօր նման մարդկանց թիվն անհամեմատ աճել է: Վստահությունը օնլայն վճարումների հանդեպ նույնպես աճել է: Այս պահին կան օնլայն վճարման 5 տարբերակներ, որոնք մեզ մոտ առավել տարածված են: Դրանք են՝ Arca, Idram, Webmoney, Paypal և Master (Visa) Card: Դրանցից ամեն մեկի մասին կխոսեմ առանձին: Բայց մինչ այդ ասեմ, թե ինչի համար է հնարավոր օնլայն վճարել: Ես ինքս օնլայն վճարում եմ կոմունալ վարձերը, ինտերնետի, հեռախոսակապի, հոսթինգ և դոմեյն ձեռք բերելու, արտասահմանից գնումներ կատարելու և մի շարք այլ վճարումներ: Դուք կարող եք օնլայն սննդամթերք գնել Sas.am-ում, տղամարդկանց գուլպաներ Boorg.am-ում, ծաղկեփունջ Brabion.am-ում կամ մանկական նվերներ և պարագաներ Manuk.am-ում:

Arca: Այս համակարգը կարծում եմ ամենաօգտագործվողն է Հայաստանում: Իմ վճարումների մեծ մասը ես անում եմ հենց Arca-ի միջոցով: Arca-ով հնարավոր է նաև քարտից քարտ փոխանցումներ կատարել: Օրինակ, եթե ձեր եղբորը ինչ-որ պահի գումար է անհրաժեշտ և նա քարտ ունի, ապա կարիք չկա գումարն անձամբ տանել նրան: Դուք կարող եք ուղղակի փոխանցում կատարել: Փոխանցումը կատարվում է մի քանի րոպեի ընթացքում:

Idram: Այս համակարգը նույնպես հայկական ամենահայտնի վճարային համակարգերից է: Idram-ի միջոցով իրենց առևտուրը կազմակերպում են մի շարք հայկական կայքեր, որոնց ցուցակը կարող եք տեսնել այստեղ: Idram-ի առավելությունը կայանում է նրանում, որ բացի ստանդարտ կոմունալ և ապրանքների ու ծառայությունների դիմաց վճարումներից, համակարգի միջոցով դուք կարող եք կատարել նաև բանկային փոխանցումներ, վարկ մարել, ավտոմեքենայի տուգանք վճարել կամ ԱՊՊԱ վճարում կատարել:

Webmoney: Ռուսական հայտնի վճարային համակարգ է, որը տարածում գտավ նաև Հայաստանում այն բանից հետո, երբ Երևանում բացվեցին Webmoney-ի կանխիկացման մի քանի կետեր: Դրանցից մեկը գտնվում է Թումանյան 29 հասցեում: Կանխիկացման ժամանակ իհարկե գանձվում են որոշակի միջնորդավճարներ, սակայն որպես փորձված և վստահելի վճարման համակարգ կարծում եմ դրանից կարելի է օգտվել: Իմիջիայլոց, Webmoney-ում դուք կարող եք բացել հաշիվներ մի շարք արժույթներով՝ դոլար, եվրո, ռուբլի և այլն:

Հայաստանում Webmoney քարտեր ձեռք բերելու, փոխանակում կատարելու կամ կանխիկացնելու նպատակով կարող եք այցելել նաև այս կայքը:

Paypal: Սա աշխարհում ամենահայտնի և ապահով վճարային համակարգերից մեկն է: Օրինակ, Ebay.com ինտերնետ աճուրդում կամ արտասահմանյան այլ կայքերում ես իմ բոլոր վճարումները կատարում եմ հենց Paypal-ի միջոցով: Հայաստանի դեպքում համակարգի միակ թերությունն այն է, որ այստեղ բացված Paypal հաշվով վճարումներ դուք կարող եք կատարել, սակայն ընդունել դրանք չեք կարող: Այսինքն, վճարումը կատարվում է միակողմանի և հենց դա է պատճառը, որ Paypal-ով վճարումներ հայկական մի շարք կայքերում դուք չեք հանդիպի:

Master (Visa) Card: Եթե որևէ բանկում դուք Master կամ Visa քարտ ունեք, ապա շատ օնլայն ռեսուրսներ թույլ են տալիս ձեզ կատարել վճարումներ մուտքագրելով ձեր քարտի տվյալները: Մի կողմից դա հարմար է, քանի որ պետք չէ ինտերնետում ոչ մի հաշիվ էլ բացել, բայց մյուս կողմից էլ` ապահով չէ: Ինչ-որ ձև ստանալով ձեր մուտքագրած տվյալները, չարագործները կարող են դատարկել ձեր հաշիվը: Իսկ դա անելու համար հաճախ բացվում են «խայծ» կայքեր, որոնց արտաքինից թվում է, որ դրանք լուրջ ընկերությունների կայքեր են, բայց երբ դուք մուտքագրում եք ձեր քարտի տվյալները, դրանք ընկնում են չարագործների ձեռքը, իսկ թե ինչ կարող է լինել դրանից հետո՝ գուշակեք ինքներդ: Այնպես որ, Master կամ Visa քարտով վճարումներից աշխատեք խուսափել: Ավելի լավ է օգտվել նախորդ վճարային համակարգերից որևէ մեկից:

Եվ վերջում մեկ տեղեկություն: