Ունենալ բիզնես գաղափար` սկզբի համար շատ կարևոր է, սակայն գաղափարն իրականություն դարձնելը պահանջում է մի շարք գործողություններ, առանց որոնց այն չի կարող իրականանալ: Խոսքից գործին անցնելու համար անհրաժեշտ է առաջին հերթին խորությամբ ուսումնասիրել այն պետության տնտեսությունը, որտեղ պատրաստվում եք իրականացնել ձեր գաղափարը: Որպեսզի ճիշտ ուսումնասիրեք տնտեսությունը, նախ պետք է պատկերացում ունենաք տնտեսության մասին ընդհանրապես:
Տնտեսագիտություն ուսումնասիրում են գրեթե բոլորը` սկսած դպրոցից, բայց շատերը վերաբերվում են դրան ինչպես մյուս առարկաներին: Նույնիսկ ուսումնասիրելու դեպքում հնարավոր չէ լիարժեք պատկերացում կազմել տնտեսության մասին, քանի որ տնտեսությունը պետք է լավ հասկանալ ավելի շատ գործնական ճանապարհով, քան տեսական:
Տնտեսությունը գործնականորեն ուսումնասիրելու համար պետք է անընդհատ հետևել երկրում տեղի ունեցող իրադարձություններին և պարտադիր չէ դա անել բիզնես գաղափարը ծագելուց հետո: Տնտեսությունն ավելի հեշտ հասկանալու ամենապարզ մեթոդը դրա համեմատությունն է ընտանիքի հետ: Պետությունները, ինչպես և ընտանիքները, ունեն ֆինանսական ելքեր և մուտքեր (բյուջե), անդամներ, ռեսուրսներ և որոշակի կանոններ, որոնք հատուկ են միայն տվյալ պետությանը: Գործարարի խնդիրն է նախ և առաջ համոզվել` արդյո՞ք երկրում առկա միջավայրը հնարավորություն կտա կյանքի կոչել բիզնես գաղափարը կամ արդյո՞ք կան բավարար ռեսուրսներ բիզնեսն իրականացնելու համար:
Ցանկացած տնտեսություն ունի իր առանձնահատկությունները, որոնք պայմանավորված են տվյալ ժողովրդի մենթալիտետով, որը նույնպես պետք է ուսումնասիրել: Սկսնակ գործարարի դասական սխալները գալիս են հենց տնտեսության թերի ուսումնասիրությունից: Բերեմ մի քանի տարածված օրինակներ.
Շատ շատերը սկսում են բիզնես միայն նրա համար, քանի որ հարևանների կամ բարեկամների կարծիքով այն կենսունակ է: Երբեք պետք չէ գայթակղվել նման գաղափարներով: Պետք է հիշել, որ «խորհրդատուներից» շատերը հնարավոր է տարրական պատկերացում չունեն բիզնեսի մասին, այլ ուղղակի տեսնելով միջավայրի հաջողակ մարդկանց` նրանց մոտ ձևավորվել է սխալ կարծիք բիզնեսի մասին: Դասական սխալներից է նաև այնպիսի բիզնեսի հիմնումը, որով շատերն են զբաղվում` հաշվի չառնելով, որ ցանկացած ապրանք շատ արտադրելու դեպքում հնարավոր է դրա գնանկում, եթե պետությունը չունի տվյալ արտադրանքի արտահանման հնարավորություն (կան ապրանքատեսակներ, որոնց արտահանումը ձեռնտու չէ կամ չունի սպառում միջազգային շուկայում):
Ամենակարևորը` ցանկացած բիզնես գաղափար պետք է համապատասխանեցնել պետության տնտեսական ներուժին: Պետք է ուսումնասիրել բիզնես միջավայրը, հասկանալ` արդյո՞ք հստակ են գործում օրենքները, թե որոշ հարցեր լուծվում են անօրինական ճանապարհով: Պատահում են դեպքեր, երբ մարդիկ սկսում են իրենց նախագիծը` հիմնվելով բիզնեսի ամերիկյան մոդելի վրա, հաշվի չառնելով, որ ամերիկյան մոդելը գործում է ֆինանսապես ապահով երկրներում, իսկ սուղ միջոցներով երկրներում գործում են խաղի այլ կանոններ:
Տնտեսությունները լինում են երեք տեսակ` նոր զարգացող, զարգացող և զարգացած: Մեր հանրապետությունը համարվում է նոր զարգացող տնտեսություն և այստեղ համեմատաբար եկամտաբեր են համարվում ներդրումներն առևտրի, ամենօրյա սպառման ապրանքների արտադրության, մասամբ նաև` սպասարկման ոլորտում: Իհարկե, դա չի նշանակում, որ մյուս ոլորտները եկամտաբեր չեն, ուղղակի այդտեղ անհրաժեշտ են ավելի շատ ֆինանսական միջոցներ և ժամանակ: Փորձը ցույց է տալիս, որ նոր զարգացող երկրներում մարդիկ ավելի շատ գումար են ծախսում առաջին անհրաժեշտության պարագաների, սննդի ձեռքբերման համար, ավելի քիչ` տեխնիկայի, բնակարանի, կահույքի համար, և ավելի քիչ են զբաղվում մշակույթային կյանքով:
Կգա մի օր, երբ եկամտաբեր կլինեն բոլոր ոլորտները, սակայն մինչ այդ պետք է սկսել ամենակարևորից` մանր ու միջին ձեռնարկատիրության զարգացումից:
Դավիթ ջան պետության՝ ընտանիքի հետ համեմատությունը շատ տեղին է:
Հրաչ ջան այն երկրներում որտեղ մարդիկ պետությանը վերաբերվում են ինչպես ընտանիքի շատ արագ զարգանում են լավ կլիներ որ Հայաստանում էլ այդպես լիներ
Դավիթ ջան նյութն օգտակար էր, բայց ես կուզենայի տեսնել շեշտադրումներ(մգացված վերնագրեր հարցերի տեսքով, կամ հատուկ կետեր)նյութի կոնկրետ հատվածներից առաջ, դա ավելի գրավիչ կդարձներ և թույլ կտար կենտրոնանալ բոլոր այն կետերի վրա, որոնք անհրաժեշտ է մտապահել: Խնդրում եմ ընդունել սա որպես խորհուրդ 🙂
Եղավ Գոհար ջան մյուս անգամ անպայման հաշվի կառնեմ մերսի շատ
Խնդրեմ ընկերս 🙂
Ինձ գյուղատնտեսական վարկ է անհրաժեշտ գործ սկսելու համար,բայց բանկերը միայն դոլար են տրամադրում :Ծանոթանալով ձեր բլոկին՝ ուզում եմ ակտիվ կյանք վարել,աշխատել, հասնել այն ամենին , ինչ ուզում եմ , ինչը ինձ համար անիրական էր թվում:Այժմ բախվել եմ նման խնդրի.հասկանում եմ ,որ վախենալ չի կարելի, բայց դոլարի ինքնարժեքը գնալով աճում է :խնդրում եմ ,օգնեք ձեր խորհուրդներով. ինչ անել: