Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Հաջողության գաղտնիքներ

Մի բողոքեք: Բողոքները ոչինչ չեն փոխում:

Հոդվածի միտքը ծնվեց միանգամից: Գիտեի, որ այսօր տեղի է ունենալու Առաջնորդության Դպրոցի կազմակերպած «Նոր հնարավորություններ» խորագրով երիտասարդական քննարկումը: Թեման շատ հետաքրքիր էր: Քննարկվելու էին տարբեր նախաձեռնություններ իրականացնելու, սեփական բիզնես սկսելու և նորարարության թեմաները: Չնայած ոգևորությանը` հենց սկզբից մասնակցել չկարողացա: Հաշվապահության սեմինարի էի: Բայց վերջացնելուն պես վազեցի այնտեղ: Հասա այն պահին, երբ քննարկման մասնակիցները հարցեր էին տալիս հանդիպման հյուրերին և կազմակերպիչներին: Երեք հարց հասցրեցի լսել: Եվ կրկին նույն բանը: Մարդիկ բողոքում են…

Մոտ մեկ տարի առաջ կնոջս հետ պայմանավորվեցինք, որ եթե մեզանից մեկը մյուսի մոտ ինչ-որ բանից բողոքի, մյուսը նրան անմիջապես ուղղի: Այսինքն, երբ առօրյայում մենք ինչ-որ բանից խոսում էինք և մեզանից մեկը մի բան էր ասում, որն իր մեջ բողոքի ինչ-որ նշույլ էր պարունակում, մյուսը միանգամից կանգնեցնում էր նրան և մատնանշում դա: Եվ դա դարձավ սովորություն: Այսօր խոսելիս` մենք իրար ուղղելու կարիք գրեթե չենք զգում: Մենք աշխատում ենք երբեք ոչնչից չբողոքել, եթե նույնիսկ ամեն ինչ շատ վատ է, նույնիսկ, եթե պատճառներ իրոք կան: Իմաստը կայանում էր հետևյալում: Բողոքելով մենք ոչինչ չենք փոխում: Բողոքը բացասական մեծ էներգիա է իր մեջ պարունակում: Այն թուլացնում է մարդուն: Բողոքելով մենք մեղավորներին շրջապատում ենք փնտրում: Իհարկե, այդ պահին մենք մեզ լավ ենք զգում, քանի որ պատասխանատվությունը ուրիշների վրա ենք գցում: Բայց դա ոչինչ չի փոխում: Ինձ ճիշտ հասկացեք: Հնարավոր է բողոքելու պատճառներ իրոք կան: Բայց հարցը ոչ թե այդ պատճառներն են, այլ վերաբերմունքը դրանց հանդեպ: Ցանկացած խնդրի միայն 10%-ն է ներկայացնում իրական խնդիրը, մնացած 90%-ը դա այն է, թե ինչպես ենք մենք դրան վերաբերվում: Պետք չի կենտրոնանալ բացասականի վրա: Եթե ինչ-որ խոչընդոտի եք հանդիպում` կա՛մ հաղթահարեք դա, համարելով կյանքի լավ փորձ, և հաստատուն քայլերով շարժվեք առաջ, կա՛մ էլ, եթե չեք կարողանում ոչինչ փոխել, մի բողոքեք, մի փոխանցեք այդ էներգիան ուրիշներին: Հիշեք, մարդիկ միշտ սիրում են շփվել դրական տրամադրված, դրական էներգիա ճառագայթող մարդկանց հետ: Իսկ բողոքող ու բացասական տրամադրված մարդիկ հաճախ վանում են այլ մարդկանց: Ամեն ինչի մեջ լավը փնտրեք: Ցանկացած խոչընդոտ նոր հնարավորության սկիզբ կարող է լինել: Մենք բոլորս ապրում ենք նույն պայմաններում: Ինչու՞ են որոշ մարդիկ հասնում մեծ հաջողությունների և անընդհատ շարժվում են առաջ, իսկ մյուսները կանգնած են նույն տեղում և շարունակում են բողոքել: Խնդիրները կդադարեն հայտնվելուց, եթե դուք ներքուստ պատրաստ լինեք դրան: Դուք իվիճակի եք հաղթահարել ցանկացած խնդիր և խոչընդոտ, եթե ցանկանաք դա: Անհնար ոչինչ չկա: Անհնարը հաղթահարվում է ձեր ուղեղում և մտքերում: Այնպես որ, մի կենտրոնացեք բացասականի վրա, մի փնտրեք պատճառները ձեզանից դուրս, վերցրեք ողջ պատասխանատվությունը ձեզ վրա և արեք այն, ինչ պատրաստվում եք անել: Իսկ եթե ինչ-որ բան էլ չի ստացվում, մի բողոքեք: Մեծ հաջողություններ եմ ձեզ մաղթում:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

5 մեկնաբանություն

  • Իհարկե այդ ամենը ճիշտ է, սակայն ինձ թվում է հայերիս մոտ բողոքելը պաշտպանական մեխանիզմ է, ինչպես ասենք իսպանացիների կամ լատինամերիկացիների մոտ մեր համար զարմանալի էմոցիոնալիզմը: Մեր այն հայերը, որոնք ինչ-ինչ պատճառներով չեն կարող իրենց թույլ տալ լացել ու լիաթոք ծիծաղել, նրանք էլ հենց ամենից շատն են բողոքում:

  • Ես համամիտ եմ այս պոստի հետ, իսկապես կյանքում ամենասխալ բանը բողոքելն է: Եկեք մտածենք` մինչ այժմ, որ ապրել ենք դժգոհ ու բողոքելով արդյոք դա մեր կյանքում ինչ որ բան է փոխել, համոզված եմ, որ ոչ: Դե ուրեմն եկեք կյանքին նայենք ուրիշ աչքերով, լինենք լավատես ու ամեն ինչում փնտրենք ու տեսնենք միայն լավը, և կյանքը անպայման կժպտա մեզ:

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»