Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Հաջողության գաղտնիքներ

Մարդիկ չեն նկատում իրենց թերությունները

Անխելքն ամեն ինչում մեղադրում է ուրիշներին, խելոքն` ինքն իրեն, իսկ իմաստունը` ոչ ոքի չի մեղադրում:

Շատ հաճախ լինում է այնպես, որ մեզ մոտ ինչ-որ բան չի ստացվում: Այդ ժամանակ պատճառները մենք սկսում ենք փնտրել մեզանից դուրս: Մենք սկսում ենք մեղադրել հանգամանքները, սկսում ենք մեղադրել ուրիշներին, եղանակի տեսությանը, մի խոսքով, բոլորին-բոլորին, բացի մեզանից: Դրանից մենք մեզ լավ ենք զգում և խորը շունչ ենք քաշում` չէ՞ որ մենք ոչնչում «մեղավոր» չենք: Արդյունքում, այն, ինչը մեզ մոտ չէր ստացվում, կրկին շարունակում է չստացվել և ոչինչ չի փոխվում:

Այն, որը մարդը չի նկատում իր թերությունները, կարծում եմ, ներդրված է նրա մեջ բնությամբ: Դա ինքնապաշտպանական ռեակցիա է: Երիտասարդը, որի վրա աղջիկները ուշադրություն չեն դարձնում, պատճառը ման չի գալիս իր մեջ, այլ փնտրում է շրջապատում: Նա չի տեսնում այն, որ չի կարողանում հակառակ սեռի հետ շփվել, որ իր արած կատակները տեղին չեն, որ իր արած հաճոյախոսությունները միայն իրեն են գեղեցիկ թվում, որ նա անընդհատ խոսում է միայն իր մասին, որ իր անընդհատ զանգերով նա զայրացնում է աղջկան: Բայց նա շատ գոհ է իր պահվածքից և հետո էլ անկեղծորեն զարմանում է` ինչո՞ւ իմ վրա ուշադրություն չեն դարձնում:

Ամեն ինչի պատճառը փնտրեք ձեր մեջ: Միգուցե դուք իրականում ոչնչում էլ մեղավոր չեք, բայց սկզբում փնտրեք ձեր մեջ: Դա չպետք է հարվածի ձեր ինքնավստահությանը և դուք չպետք է սկսեք մտածել` «ես լավը չեմ», «ես խեղճ եմ», «ինձ մոտ ոչինչ չի ստացվում» և այլն և այլն: Ընդհակառակը, դուք պետք է ավելի լավ զգաք ձեզ, քանի որ գտաք ձեր մեջ մի բան, որը կարելի է բարելավել, իսկ այդպես` դուք կարող եք աճել: Ուղղակի շատ մի կենտրոնացեք դրա վրա, այլ մի պահ ֆիքսեք դա, ապա մոռացեք դրա մասին և կենտրոնացեք լուծման վրա: Թող դա ձեզ համար լինի օգտակար «խաղ», այլ ոչ թե մտածմունքների տեղիք և ճնշվածության պատճառ:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»