Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Հաջողակ մարդիկ

Աշխարհի ամենահարուստ մարդը. Կառլոս Սլիմ

Այս հոդվածում ուզում եմ պատմել Ձեզ վերջին երկու տարիների աշխարհի ամենահարուստ մարդու` մեքսիկացի Կառլոս Սլիմ Էլուի մասին: «Forbes» ամսագրի տվյալներով, 2010 թվականին մեքսիկացին իր ակտիվների շուկայական գնի աճի հետևանքով 500 միլիոն դոլարով առաջ է անցնում Բիլլ Գեյթսից և իր 53,5 միլիարդ դոլարով դառնում է աշխարհի ամենահարուստ մարդը: Իմիջիայլոց նա միակն է, ում հաջողվել է խլել այդ տիտղոսը ամերիկացիներից վերջին 16 տարիների ընթացքում:

Վերելքի սկիզբ

Արաբական ծագում ունեցող մեքսիկացին ծնվել է 1940 թվականի հունվարի 28-ին: Ծնողները գաղթականներ են Լիբանանից: Կառլոսի հայրը` Ջուլիան Սլիմը, գալով Մեքսիկա ձեռք է բերում անշարժ գույք և սկսում է զբաղվել առևտրով: Գործարարի իր առաջին քայլերը Կառլոսը նույնպես կատարում է առևտրի բնագավառում: Նա որոշում է շեշտը դնել մատչելի գներով վաճառվող մասսայական օգտագործման ապրանքների վրա և չի սխալվում: Արդյունքում, նրա Carso ընկերությունը (ստացել է անվանումը Կառլոսի և իր կնոջ` Սոումայի անվան առաջին վանկերից) դառնում է առևտրային հսկա WalMart-ի գլխավոր մրցակիցը: Զարգացնելով իր բիզնեսը` Կառլոս Սլիմը ստեղծում է Group Carso ընկերությունների ցանցը և արդեն 1980 թվականին Մեքսիկայի յուրաքանչյուր երկրորդ բնակիչն այս կամ այն կերպ առնչվում էր Սլիմի ընկերություններից որևէ մեկի ապրանքների կամ ծառայությունների հետ:

Բիզնես

1990 թվականին Կառլոսը չնչին` 300 միլիոն դոլարով, պետությունից ձեռք է բերում Telefonos de Mexico հեռահաղորդակցական ընկերությունը` այդ ժամանակվա մոնոպոլիստը Մեքսիկայի ներքին հեռահաղորդակցության շուկայում: Նրանից հինգ տարի է պահանջվում ընկերությանը նոր թափ հաղորդելու համար և շուտով ընկերության շրջանառությունը անցնում է տարեկան 10 միլիարդ դոլարը (այսօր էլ ընկերությանը բաժին է հասնում Մեքսիկայի ֆիքսված հեռախոսակապի 80-90 և բջջային կապի մոտ 70 տոկոսը): Ժամանակի ընթացքում Կառլոս Սլիմի գործունեությունը դուրս է գալիս Մեքսիկայի սահմաններից: Նա սկսում է ձեռք բերել հեռահաղորդակցական և ՏՏ ոլորտի մի շարք ընկերություններ Լատինական Ամերիկայում և Միացյալ Նահանգներում: Ասում են, որ սկզբում Կառլոսը խուսափում էր համակարգչային տեխնիկայից և ՏՏ ոլորտից, բայց ամեն ինչ փոխվում է մի ամանորից հետո, երբ տղաները նրան նոութբուք են նվիրում: Միլիարդատիրոջը այն դուր է գալիս և միգուցե հենց դա է պատճառը, որ հետագայում նա ընդլայնում է իր բիզնեսը հենց այդ ուղղությամբ:

Անձնական կյանք

1966 թվականին Կառլոսը ծանոթանում է Սոումա անունով լիբանանյան ծագում ունեցող աղջկա հետ: Նրանք ամուսնանում և իրար հետ երջանիկ ապրում են 33 տարի` մինչև 1999 թվականին Սոումայի մահանալը: Կառլոսն ունի տղաներ, որոնք ղեկավարում են նրա ընկերությունները: Սլիմների ընտանիքն ունի մի շարք ավանդույթներ, որոնցից մեկը ընտանիքով կոլեկտիվ հանգիստն է Մեքսիկայի արևմտյան ափերից մեկում: Ամռանը ընտանիքի բոլոր անդամները, ներառյալ Կառլոս Սլիմի փոքրիկ թոռնիկները, հավաքվում են իրար հետ, որպեսզի մի քանի շաբաթ միասին անցկացնեն Մեքսիկայի ծովափերից մեկում: Վերջին տարիներին Կառլոս Սլիմը ակտիվ զբաղվում է նաև բարեգործությամբ և հսկայական միջոցներ է ներդնում Լատինական Ամերիկայում կյանքը բարելավելու համար:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

1 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»