Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Հաջողության գաղտնիքներ

Զբաղվեք Ձեր սիրած գործով

Հաճախ մարդիկ զարմանում են, թե ինչու իրենց գործնական կյանքում ոչինչ չի ստացվում: Նրանք անընդհատ աշխատում-աշխատում-աշխատում են, բայց կարծես ոչինչ չի փոխվում և նրանք մնում են նույն տեղում: Մյուսների մոտ էլ իրավիճակն այլ է: Նրանք նույնպես անընդհատ աշխատում են, բայց ընթացքում գրանցում են հաջողություններ, բարձրանում են իրենց կարիերայի աստիճանով, սկսում են ավելի բարձր եկամուտներ ստանալ, բայց կրկին կարծես ինչ-որ բան այնպես չէ: Նրանց ներսում չկա այն հանգստությունն ու հոգեկան բավարարվածությունը, որն ասում է.«Քեզ մոտ ամեն ինչ լավ է, դու գտնվում ես ճիշտ ճանապարհի վրա, դու անպայման կգտնես քո տեղը կյանքում և երջանիկ կլինես»:

Իսկ պատճառն այն է, որ մարդիկ չեն անում այն, ինչն իրենց իրոք հաճույք է պատճառում և ինչից իրենք հոգեկան մեծ բավարարվածություն են ստանում: Յուրաքանչյուր մարդու համար էլ կա ինչ-որ բան, որով զբաղվելը լցնում է նրա հոգու դատարկ մասերը: Մեկի համար դա գրելն է, մյուսի համար՝ երգելը, երրորդի համար՝ միջոցառումներ կազմակերպելը, չորրորդի համար էլ միգուցե ֆինանսական գործարքներ կնքելը: Ամեն մարդ յուրովի է և ամեն մեկին մի բան է հաճույք պատճառում և ամեն մեկը մի տեղ է իրեն կարևոր մարդ զգում: Իսկ դա շատ կարևոր է, որպեսզի այն, ինչով մարդը զբաղվում է, ստիպի նրան իրեն կարևոր մարդ զգալ և զգալ, որ նա անում է նշանակալից ինչ-որ բան: Բայց ցավոք, շատերն այսօր զբաղվում են նրանով, ինչով ստիպված են զբաղվել, այլ ոչ թե նրանով, ինչ իրենք ուզում են անել, որովհետև «կյանքն է այդպես դասավորվել»: Բայց նման մարդկանց կտանք մի քանի խորհուրդներ:

Նույնիսկ, եթե կյանքն է այդպես դասավորվել, Դուք կարող եք փոխել դա: Զբաղվեք Ձեր սիրելի գործով: Զբաղվեք նրանով, ինչը Ձեզ հաճույք է պատճառում: Անպայման ժամանակ գտեք դրա համար: Օրինակ, եթե Դուք սիրում եք ստեղծագործել և բանաստեղծություններ գրել, բայց աշխատում եք բանկում և դրա համար ժամանակը չի հերիքում, անպայման ժամանակ հատկացրեք դրան: Արեք դա երեկոյան, կամ հանգստյան օրերին, կամ թեկուզ աշխատանքի վայրում, բայց անպայման արեք դա: Եթե սիրում եք ակտիվ գործեր, սիրում եք հանդիպել մարդկանց հետ, բանակցություններ վարել և գործարքներ կնքել, բայց աշխատում եք որպես ուսուցիչ, ապա անպայման ժամանակ հատկացրեք նրան, որպեսզի գոնե ինչ-որ ժամանակ անց սկսեք զբաղվել նրանով, ինչը Ձեզ հաճույք է պատճառում: Քայլեր ձեռնարկեք, այլապես Դուք ողջ կյանքը ստիպված կլինեք զբաղվել նրանով, ինչը Ձերը չէ: Դա շատ կարևոր է Ձեր ներքին ներդաշնակության համար: Դա շատ կարևոր է նաև այն պատճառով, որ սովորաբար մարդիկ հաջողության են հասնում այն ժամանակ, երբ զբաղվում են իրենց սիրած գործով: Մի վախեցեք Ձեր ցանկություններից և հետևեք Ձեր սրտին: Հնարավոր չէ բացատրել թե ինչպես, բայց այն կարծես միշտ էլ գիտի, թե ինչ է Ձեզ անհրաժեշտ:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

1 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»