Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Օգտակար խորհուրդներ

Ինչպես հաղթահարել հոգնածությունը

Հաճախ մենք բոլորս էլ մտավոր կամ ֆիզիկական ծանրաբեռնվածությունից հոգնում ենք: Դա կարող է լինել օրվա վերջում կամ դա կարող է երկար ժամանակ մնալ աննկատ, բայց մի օր զարթնենք և տեսնենք, որ մեզ մոտ արդեն գերհոգնած վիճակ է և մենք այլևս չենք կարողանում աշխատել նույն առույգությամբ և թարմությամբ, ինչպես նախկինում: Այս հոդվածում ես չեմ տա մասնագիտական խորհուրդներ` ինչպես ազատվել հոգնածությունից կամ ինչ է հոգնածությունը, որովհետև ես դրա մասնագետը չեմ: Ես միայն կխոսեմ այն մասին, թե ինչպես եմ ինքս դա անում, ինչ եմ զգացել իմ փորձից և ինչն է իմ համար եղել արդյունավետ:

Այն, որ հաճախ մենք ֆիզիկական ծանր աշխատանք չենք կատարում, բայց հոգնում ենք, դա փաստ է: Օրինակ, շատ գրասենյակային աշխատողներ օրվա վերջում իրենց զգում են այնպես հոգնած, թուլացած և հյուծված, որ կարծես ամբողջ օրվա ընթացքում իրենց ուսերին բեռ են կրել: Բայց չէ՞ որ նրանք ամբողջ օրը նստած են եղել:

Նման դեպքերում հոգնածության պատճառները մտավոր են: Բայց պատճառն այն չի, որ մարդը հոգնում է մտածելուց: Օրինակ, հիշեք ձեզ: Երբ դուք մեծ հետաքրքրությամբ և ոգևորությամբ ինչ-որ գործ եք անում, ապա կարող են անցնել ժամեր և դուք ոչ մի հոգնածություն էլ չզգաք, նույնիսկ եթե ձեր աշխատանքը շատ ծանրաբեռնված է: Կամ, եթե ինչ-որ հոգնածություն էլ զգաք, ապա դա կլինի այն հաճելի, թեթև հոգնածությունը, որն օրինակ զգում ես մարզասրահում մարզվելուց հետո: Բայց ընդհանուր առմամբ` դու չես կորցնում քո առույգությունն ու կյանքի ռիթմը:

Իսկ հոգնածության պատճառը ոչ թե մտածելն է, այլ հոգեկան ապրումները: Եթե օրվա ընթացքում դուք ինչ-որ մեկի հետ վիճում եք, ապա այդ մտածմունքներից և արդյունքում առաջացած սթրեսից դուք կարող եք հոգնել: Եթե դուք երկար ժամանակ անելու ոչինչ չեք գտնում, ապա այդ ձանձրույթից և անօգտակար լինելու զգացումից դուք կարող եք հոգնել: Եթե ձեզ վիրավորել են կամ ինչ-որ կարևոր բանի եք պատրաստվում, ապա այդ վիրավորվածությունից և անհանգստությունից դուք կարող եք հոգնել: Հիշեք, հոգնածություն առաջացնում է ոչ թե մտավոր աշխատանքը, այլ ձեր ապրումները: Եթե ձեր առօրյայում դուք փորձեք քիչ ապրումներ ունենալ, ամեն ինչին շատ լուրջ չմոտենալ, աշխատանքը հաճույքով անել, ընթացքում լիցքաթափվել, ապա օրվա վերջում կլինեք նույնքան առույգ, որքան օրվա սկզբում: Իսկ եթե տարվա մեջ մեկ-երկու անգամ մեկնեք հանգստանալու, և ընթացքում էլ հանգստյան օրերին հաճախ լիցքաթափվեք, ապա դուք երբեք էլ չեք հոգնի:

Իսկ դրանով դուք հոգ կտանեք ձեր առողջության մասին, քանի որ պարբերաբար հոգնածությունից, սթրեսներից և դեպրեսիոն վիճակներից մարդու մոտ տարբեր հիվանդություններ կարող են առաջ գալ և առաջին հերթին` կապված նյարդային համակարգի հետ: Որպեսզի խուսափեք դրանից, թեթև ապրեք և այն, ինչ անում եք, արեք հաճույքով, ինչ էլ որ դա լինի: Օրվա ընթացքում փորձեք չլարվել, ամեն ինչի մեջ խաղ տեսեք, նույնիսկ շատ լուրջ գործերի: Ուրախ եղեք, վատ բաների մասին մի մտածեք, խնդիրների վրա մի կենտրոնացեք, միաժամանակ մի փորձեք մի քանի բան անել և դուք երբեք էլ չեք հոգնի:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

16 մեկնաբանություն

  • Միանշանակ օրվա ընթացքում ապրումներն ամենամեծ չափաբաժինն ունեն հոգնածության մեջ,լրիվ համամիտ եմ Ձեր հետ Լուկա ջան…շատ լավ խորհուրդներ էին……բայց նաև այնպես է պատահում,որ հոգնում ես նաև,օրինակ մի քանի գերծանրաբեռնված շաբաթներից հետո..իմ հետ համենայն դեպս պատահում է…նման դեպքերում,երբ գերհոգնածություն եք զգում, ես խորհուրդ կտայի լրիվ մի կողմ դնել բոլոր գործերը և մեկ ամբողջական օր տրամադրեք ինքներդ Ձեզ..կարող եք այդ օր շատ ուշ արթնանալ, այդ օր թույլատրեք ինքներդ Ձեզ ծուլանալ…հանդիպեք ընկերների ,բարեկամների հետ..ընկերների հետ մի տեղ գնացեք,…կարելի է նաև ակտիվ հանգիստ կազմակերպել….իսկ երեկոյան ,անպայման մտածեք,թե ինչի համար եք դուք աշխատում,վերհիշեք Ձեր նպատակները,դրան հասնելու միջոցները, հիշեք ,թե ինչի համար է Ձեր գործադրած ամբողջ ջանքը կատարվում..առավոտյան ,կարծում եմ, կարթնանաք լավ հանգստացած և աշխատելու մեծ ցանկությամբ…..

    • Հա Lara ջան, “երբեք չեք հոգնի”-ն հաստատ չափազանցրել էի 🙂 Իհարկե եթե ծանրաբեռնված շաբաթներով գործ անենք, կհոգնենք: Ուղղակի պահն այն է, որ պետք է թույլ չտալ, որ նման գերծանրաբեռնված շաբաթներ լինեն, ընթացքում պետք է անընդհատ լիցքաթափվել:

      Չնայած ես ասում եմ սա, բայց իմ մոտ չի ստացվում 🙂 Երևի ավելի շուտ ինքս ինձ էլ եմ ասում 🙂 Եթե գործերը շատ են, շատ դժվար է ստիպել քեզ հանգստանալ, մտածում ես՝ բա գործերը: Երևի պիտի գիտակցենք, որ հանգստանալուց հետո ավելի արդյունավետ ու շատ գործ կարող ենք անել ու այդ պատճառով ընթացքում անընդհատ պետք է հանգստանանք:

      • հա,շատ լավ հասկանում եմ Ձեզ Լուկա ջան ։) ոչ միայն այս պարագայում,այլ գրեթե միշտ,երբ ինչ-որ բան եմ գրում,երևի առաջին հերթին ինձ համար եմ գրում,որ ինքս ինձ այդպես համոզեմ ճիշտ վարվել,հետևել իմ այդ մտքերին։) բայց հանգստանալը շատ կարևոր է, հանգստանալուց հետո միշտ էլ ավելի լավ է ստացվում աշխատել…կարծում եմ հոգնածը մարդը 1 շաբաթում հազիվ այնքան բան կանի ,որքան հանգստացած մարդը 1օրում.. կարող ենք հիշել միայն Ռիչարդ Բռենսոնին,թե ինչպես է նա կարևորում հանգիստը..և որքան լավ գաղափարներ են նրա մոտ առաջացել հանգստի ընթացքում….

          • ինձ համար էլ շատ մեծ նշանակություն ունի Լուկա ջան…Ռիչարդ Բրենսոնը այն մարդկանցից է,ում կյանքը ուղղորդում է ինձ ,և ում ձգտում եմ նմանվել…

    • Հա Vanuhi ջան 🙂 եթե ինչ-որ թեմա կա, որ շատ ա հետաքրքրում, պատվիրում եք և ինչ-որ ժամանակ անց հոդվածը գրում ենք.. 🙂

  • Շաբաթվա ընթացքում մեկ կամ երկու օր հանգստանալն անհրաժեշտ է ոչ միայն առողջության տեսակետից, այլև աշխատանքի արդյունավետության, քանի որ հնարավոր չէ առանց հանգստանալու և ուժերը վերականգնելու հասնել առավելագույն արդյունքի: Շաբաթվա ընթացքում` կախված աշխատանքիս ծավալից հաճախ եմ ուշ վերջացնում, սակայն շաբաթ և կիրակի օրերին անպայման հանգստանում եմ 🙂

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»