Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Բիզնես և ֆինանսներ

Փող աշխատելու` ոչ փող ծախսելու հոգեբանություն

Հեղինակ՝ Tntesaget

Շատերը պատկերացում չունեն, թե ինչ բաներ են սոցիալիզմը, կոմունիզմը և կապիտալիզմը: Դրանք այն 3 բաներն են, որոնք հարկավոր է իմանա ամեն մի փող աշխատել ցանկացող մարդ, որովհետև դրանք իմանալուց և տարբերելուց հետո է միայն, որ մարդու աչքերն այնքան լայն են բացվում, որ նա փող աշխատելու հոգեբանություն է ձեռք բերում: Ուրեմն հետևյալ տողերն արժե լայն բացված աչքերով կարդալ:

Սոցիալիզմը գաղափարախոսություն է, որն ուղղված է հասարակության մեջ սոցիալապես հավասարություն հաստատելուն: Սոցիալիզմը չի ընդունում մասնավոր սեփականությունը: Այն, ինչ կա սոցիալիստական պետությունում, դրա նկատմամբ գրեթե հավասար իրավունքներ ունեն տվյալ սոցիալիստական պետության բոլոր քաղաքացիները: Սոցիալիստական պետությունում նույնպես քաղաքացին վարձատրություն է ստանում փողի տեսքով, որը տրվում է նրան անհրաժեշտ ծախսերը հոգալու համար:

Կոմունիզմ

Սոցիալիզմը գնահատում է քաղաքացու աշխատանքը և ինչքան քաղաքացին շատ է աշխատում, այնքան բարձր է գնահատվում: Հետևապես, սոցիալիստական պետության քաղաքացին ինչքան շատ աշխատի, այնքան շատ փող կստանա, որն իրեն պետք է անհրաժեշտ ծախսերը հոգալու համար: Ինչքան շատ փող ունենա, այնքան շատ անհրաժեշտ ծախսեր կարող է իրեն թույլ տալ: Այստեղից էլ գալիս է սովետական հին ասացվածքը. «Ով աշխատի, նա կուտի»: Բայց սոցիալիզմը կատարյալ չէ, որովհետև սոցիալիստական պետությունում ապրող քաղաքացին դեռ կատարյալ չէ սոցիալիստական գաղափարախոսության տեսակետից: Սոցիալիզմը միայն ձգտում է կատարելության, իսկ կատարելությունն այդ տեսակետից կոմունիզմն է: Ըստ կոմունիստական գաղափարախոսության սոցիալապես հավասարությունն այնքան բարձր, այնքան կատարյալ աստիճանի է հասած, որ փող գոյություն չունի: Կոմունիստ քաղաքացին վարձատրություն չի ստանում փողի տեսքով: Նա աշխատում է, որպեսզի ստեղծի համապատասխան բարիք, որը հավասարապես բաժանվում է բոլոր քաղաքացիների միջև: Սակայն կոմունիզմն այդպես էլ ոչ մի երկրում չի հաստատվել: Եվ բոլոր այդպիսի վեհ գաղափարախոսությունների պես կոմունիզմն էլ զոհեր է պահանջում: Օրինակ, ԽՍՀՄ-ում ժողովրդին խոստացվել էր, որ նրանք կհասնեն կոմունիզմին (այսինքն` կատարելության), բայց միլիոնավոր մարդկային զոհեր տալուց հետո կոմունիզմ այդպես էլ չհաստատվեց:

Կապիտալիզմ

Այս երկու իրար հաջորդող, իրար լրացնող գաղափարախոսությունների լրիվ հակադարձ պատկերն է կապիտալիզմը: Կապիտալիստական երկրի քաղաքացին ունի սեփականության իրավունք: Կապիտալիստական երկրի քաղաքացին աշխատում է փողի համար, որն իրեն պետք է ոչ միայն անհրաժեշտ ծախսերը հոգալու, այլ նաև ուզած բաները գնելու համար, կամ այդ փողն էլ ավելի շատ փողի վերածելու համար: Հաճախ կապիտալիզմի մասին մեծ պատկերացում ունեցող մարդիկ շատ քիչ են աշխատում, բայց շատ փող են վաստակում, որովհետև օգտվում են այն հնարավորություններից, որն ընձեռում է կապիտալիզմը: Կապիտալիզմը պայմաններ է առաջարկում, որոնց համաձայն երբեք չի կարող լինել սոցիալապես հավասարություն: Հետևապես կան և հարուստներ, և միջին դասի մարդիկ, և աղքատներ: Եթե դուք ուզում եք հարստանալ, ուրեմն դուք պետք է կապիտալիստ լինեք, կապիտալիստն էլ իր հերրթին, ինչպես տեսաք, աշխատում է փող ստանալու համար, իսկ ամենալավ կապիտալիստները չեն աշխատում, բայց շատ փող են ստանում: Ինչպե՞ս են նրանք կարողանում չաշխատելով շատ փող ստանալ: Որովհետև նրանք օգտվում են կապիտալիզմի ընձեռած հնարավորություններից:

Այն, ինչ պետք է անել փող աշխատելու հոգեբանություն ձեռք բերելու համար, իմանալով և տարբերելով այս 3 բաները՝ դա կապիտալիստի մտածելակերպ ունենալն է: Պետք է սոցիալիստի պես եռանդով աշխատել, ոչ մի դեպքում կոմունիստի պես չաշխատել միայն հասարակության համար բարիք ստեղծելու նպատակով և օգտվելով կապիտալիզմի հնարավորություններից` փողը չծախսել, այլ ավելի շատ փողի վերածել:

Մի դարձեք ծախսերի գերին

Եթե դուք աշխատավարձ եք ստանում, դա դեռ չի նշանակում, որ դուք փող եք աշխատում: Դա նշանակում է, որ դուք աշխատավարձ եք ստանում փողի տեսքով: Նույն հաջողությամբ դուք աշխատավարձ կարող էիք ստանալ ապրանքի տեսքով, սակայն դա այնքան էլ տարածված չէ: Բայց, եթե ձեր աշխատավարձը ստանում եք փողի տեսքով, ապա մի պահ մտածեք, թե ինչ եք անում այդ գումարը և ուրիշ էլ ինչ կարող էիք անել: Եթե դուք այդ փողը շտապում եք ծախսել, ապա դուք չեք գտնվում փող աշխատելու ճանապարհին, որովհետև փող աշխատելը ծախսելուց շատ է տարբերվում: Փող ծախսելու ճանապարհին գտնվող մարդու ֆինանսական դրությունը չի լավացնի ոչ աշխատավարձի բարձրացումը, ոչ էլ միլիոնավոր դոլարների առկայությունը: Իսկապես, եթե դուք գիտեք միայն ծախսել, ապա 1 000 000$  ունենալու դեպքում ի՞նչ կանեիք: Երևի` կծախսեիք: Ավելին, 1 000 000$ ծախսելուց հետո դուք այնքան մեծ պահանջներ կունենայիք, որ ձեզ 2 000 000$ հարկավոր կլիներ ձեր ծախսերը հոգալու համար: Եթե դուք չեք ուզում այդ ահռելի ծախսերի գերին դառնալ, ապա մտածեք, թե ուրիշ էլ ինչ կարող էիք անել փողի հետ: Փողը 2 հատկություն ունի` մեկը վատ, մյուսը լավ: Դրանք են ծախսվելու և ավելի շատ փողի վերածվելու հատկությունները:

Մարդիկ կան, ովքեր առաջ չէին աշխատում և չէին էլ ծախսում, իսկ հիմա, երբ աշխատում են, ոգևորված ծախսում են, դեռ մի բան էլ սպասում են աշխատավարձի բարձրացմանը, որպեսզի ավելի շատ ծախսեր իրենց թույլ տան: Այդ մարդիկ փող չեն աշխատի քանի դեռ փողը նրանց պետք է միայն ծախսելու համար: Նրանք շտապում են մեքենա, նոր և թանկարժեք հագուստ գնելու, ուտելու խմելու, վատնելու… Երբ նրանք առաջվա պես աշխատանք չունենան, ապա լավագույն դեպքում չեն ծախսի, իսկ վատագույն դեպքում ահռելի պարտքեր կունենան երբեմնի վայելքների հիշատակին:  Շատերը կան, ովքեր ասում են, որ չեն կարող չծախսել և նրանք իրենց վրա ընդհանրապես չեն ծախսում, բայց իրենք ընտանիք ունեն, իսկ ընտանիք պահելը մեծ ծախսեր է պահանջում: Բայց նրանք կարող են այլ կերպ մտածել: Նրանք կարող են համարել, որ պարտավոր են չծախսել, քանի որ նրանք ընտանիք ունեն և ընտանիք պահելը մեծ ծախսեր է պահանջում: Նրանք պետք է ոչ թե ընտանիքի համար ծախսեն, այլ ընտանիքի համար տնտեսեն: Եթե իրենք ամեն ամիս իրենց վաստակած գումարը ծախսեն, ապա ինչ են անելու մի օր, երբ ծախսերը գերազանցեն ամսեկան վաստակած գումարը: Տվյալ դեպքում կարծես մնում է միայն աղոթելը, որ աշխատավարձն էլ համապատասխանաբար բարձրանա ծախսերի աճի հետ:

Հաճախ քիչ վաստակող մարդիկ, համեմատած իրենց եկամուտների, ավելի շատ են ծախսում, քան շատ վաստակող մարդիկ, որովհետև ճոխություններ կան, որոնց բացակայությունը իրենց արդեն անտանելի է դարձել: Երբ նրանց ձեռքը բարեբախտաբար փող է ընկնում, նրանք շտապում են ծախսել այն, փոխանակ` օգտվելով հնարավորությունից փորձեն եկամտաբեր ներդրումներ անել: Պետք է կարողանալ ծախսելու գայթակղությունից հրաժարվել:

Պետք չէ ընդհանրապես չծախսել, այլ պետք է նպատակային ծախսել: Եթե ձեր նպատակը ծախսելն է, ապա պարզապես ծախսեք ձեր ուզածի պես: Բայց, եթե ձեր նպատակը փող աշխատելն է, ապա նպատակային ծախսելը ձեր դեպքում կլինի այնպես ծախսել, որ այդ ծախսերը հետագայում եկամուտ բերեն: Դա շատ պարզ է և գրեթե բոլորը կարող են դա հասկանալ, բայց ոչ բոլորն են բավականաչափ ուշադրություն դարձնում նման մանրուքներին: Դա գալիս է նրանից, որ մարդիկ փողի մասին մտածելիս հաճախ պատկերացնում են, թե ինչ իրեր կամ հաճույքներ կարող էին դրանով գնել, այլ ոչ թե  ինչքան շատ փող կարող են փողով գնել: Շատ փող ունենալը խնդրի լուծում չէ, խնդրի լուծումը փողի ճիշտ տնօրինումն է: Եթե դուք չգիտեք, թե ինչպես ձեր ունեցած փողը ավելի շատ փողի վերածել, դա պատճառ չէ այն ծախսելու: Այդ դեպքում փորձեք սովորել, թե ինչպես պետք է դա անել:

Հեղինակի մասին

Tntesaget

5 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»