Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Հաջողության գաղտնիքներ

Ինչպես գործը տեղից շարժել

Խոսքը մանր մունր գործերի մասին չէ: Խոսքը գետնից փոքր քար վերցնելու և նետելու մասին չէ: Խոսքը այնպիսի գործերի մասին է, որոնք Ձեզ թվում է, որ անհնար է անել: Խոսքը նկարում պատկերված ժայռը գլորելու մասին է:

Ժայռը գլորելու համար որոշ մարդիկ գալիս, կանգնում են ժայռի մոտ և գոռում. «Ժայռ, գլորվի՛ր»: Նրանց թվում է, որ իրենք կարող են ոչինչ չանել և ժայռն ինքն իրեն պետք է գլորվի: Ոմանք էլ թափ են հավաքում, հեռվից վազելով գալիս ու թռնում են ժայռի վրա` կարծելով, որ այդ հարվածից այն կգլորվի: Բայց այդ մարդիկ միայն իրենց են վնասում և վնասվածքներից հետո այլևս չեն շարունակում: Իսկ ի՞նչ կանեիք դուք, եթե ուզենայիք ժայռը գլորել:

Կգտնեիք մարդկանց, որոնք Ձեզ կօգնեին: Դժվար է ժայռը միայնակ գլորել, դա պետք է մի քանի հոգով անել: Պետք է կարողանալ բաշխել պարտականությունները, գտնել մարդկանց, որոնք պատասխանատու են գործի առանձին մասերի համար: Պետք չէ ողջ ծանրությունը սեփական ուսերին վերցնել: Գործի առանձին կտորի վրա կենտրոնացած ուղեղն ավելի լավ է աշխատում, քան ընդհանուր գործի վրա կենտրոնացածը: Բայց դուք պետք է գտնեք այնպիսի մարդկանց, որոնք շարժվում են նույն ուղղությամբ: Այսինքն, ժայռը հնարավոր չի լինի գլորել, եթե երեք հոգի մի կողմից հրեն, երեքը` հակառակ: Եթե կա թիմ, թիմը պետք է ունենա հստակ, ընդհանուր ուղղություն, այլապես գործը տեղից չի շարժվի:

Կօգտագործեիք լծակներ: Դժվար է ժայռը մերկ ձեռքերով հրել: Եթե այդ ժայռը իվիճակի են հրել 15 զույգ մարդկային ձեռքեր, ապա ճիշտ տեղում դրված և ճիշտ օգտագործված ընդամենը երեք լծակները կարող են նույն գործը անել: Կյանքում կան շատ գործիքներ, որոնք կարելի է օգտագործել, բայց մարդիկ հաճախ որոշում են ամեն ինչ սեփական ձեռքերով անել: Բայց նույնիսկ, եթե դա Ձեզ մոտ ստացվում է, ինչ որ պահի դուք հաստատ կհոգնեք:

Կսկսեիք ժայռը տատանել: Ժայռը միանգամից չի գլորվի: Սկզբում դուք այն մի փոքր շարժում եք և այն սկսում է տատանվել: Ապա դուք ևս ճիգեր եք գործադրում և այն սկսում է ավելի ուժեղ տատանվել: Դուք ևս մի քանի ճիգ եք գործադրում և վերջ` ժայռը սկսում է իր թափի տակ առաջ շարժվել: Դուք այլևս անելու բան չունեք: Ձեր փոքրիկ ճիգերը, որոնք դուք անընդհատ անում էիք, տատանեցին ժայռը, պոկեցին այն տեղից և ժայռն ինքն իրեն սկսեց գլորվել:

Ժայռի սկզբունքը կիրառեք Ձեր կյանքում` ցանկացած գործի դեպքում: Գտեք մարդկանց, որոնք կարող են Ձեզ օգնել, օգտագործեք համապատասխան գործիքներ և գործի ուղղությամբ անընդհատ ճիգեր գործադրեք, որոնք գնալով մեծացրեք: Մի կանգնեք տեղում և սպասեք, որ ամեն ինչ ինքն իրեն կլինի:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»