Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Հաջողության գաղտնիքներ

Մի փնտրեք մեղավոր…

Երեկ մի դեպքի ականատես եղա: Մետրոյի մուտքի մոտ մի կին իր երեխաների` աղջկա և տղայի հետ, զարդ էր գնում: Մետրոյի այդ հատվածը կարծում եմ գիտեք. բազմաթիվ իրար կպած տաղավարներում բիժուտերիա է վաճառվում: Կինը մի վզնոց գնեց, տվեց աղջկան, որ պահի և շարունակում էր նայել: Այդ ընթացքում տղան փորձեց քրոջ ձեռքից վերցնել վզնոցը, որպեսզի ինքն էլ նայի: Բայց այդ ժամանակ վզնոցն ընկավ նրա ձեռքից, թելը կտրվեց և դրա վրայի բազմաթիվ հատիկները թափվեցին գետնին: «Դո՛ւ ես մեղավոր», — բացականչեց մայրը տղային և կռացավ, որպեսզի հավաքի հատիկները: Տղան բավական մեծ էր, և ինչ աներ նա, երբ դա պատահական ստացվեց: Իսկ ո՞ւմ մոտ չի ստացվում: Մեզանից ով է այնքան ուշադիր, անթերի և պատասխանատու, որ նրա կյանքում նման «փոքրիկ պատահարներ» երբեք չեն լինում: Ես հաստատ այդպիսին չեմ: Այստեղ հարցը կրկին ու կրկին կայանում է նրանում, թե ինչպես ես դրան վերաբերվում:

Բոլորիս կենցաղում էլ նման «մանրուքներ» լինում են: Վերը նշված դեպքն իրոք մանրուք էր. վզնոց է, կտրվել-կտրվել է, ինչ անենք, հատիկները կհավաքես, կմիացնես և կրկին վզնոց կդառնա: Եթե մի քանի հատիկ էլ չգտնես, ոչ մի սարսափելի բան` հաշվի առնելով, որ աշխարհում պատերազմներ ու երկրաշարժեր են լինում, իրոք ոչ մի լուրջ բան: Եթե նման «մանրուքներին» լուրջ չվերաբերվես, չես էլ սկսի նկատել, որ դրանք քո կյանքում լինում են: Իսկ եթե «մանրուքը» ուռճացնես, դարձնես խնդիր, մեղավորներ փնտրես, հավատացեք, այդ դեպքում միակ տուժողը դուք կլինեք, դրանից միայն ձեր կյանքը կծանրանա: Երբ սուրճ է թափվում, բաժակ է կոտրվում, հագուստ է կեղտոտվում, գրքի էջն է պատռվում կամ հացը մնում է դուրսը և չորանում, նման և այլ դեպքերում մի փնտրեք մեղավորներ: «Մեղավորներն» իրենք իրենց «մեղքը կզգան» և մյուս անգամ ավելի ուշադիր կլինեն: Մարդը խելացի արարած է, երբ նա մեկ անգամ տեսնում է, որ սխալվել է, հաջորդ անգամ ավելի ուշադիր է դառնում: Դուք կարող եք ոչինչ չասել և նա ամեն ինչ կհասկանա: Այդ դեպքում ձեզ մոտ էլ տպավորություն չի առաջանա, որ կյանքում այդքան հոգսեր կան, անընդհատ ինչ-որ խնդիրներ են լինում, դրանից ձեր տրամադրությունն էլ չի ընկնի: Պետք չէ բացասական վերաբերվել նրան, ինչն արդեն հնարավոր չէ փոխել:

Մարդիկ լինում են երկու տեսակ. մարդիկ, որոնց կյանքում անընդհատ խնդիրներ են լինում, և մարդիկ, որոնց կյանքում խնդիրներ ընդհանրապես չեն լինում: Իրականում այդպես չէ: Մարդիկ լինում են երկու տեսակ. մարդիկ, որոնց կյանքում անընդհատ խնդիրներ են լինում, և մարդիկ, որոնց կյանքում նույն խնդիրներն են լինում: Պարզապես առաջինները կենտրոնանում են դրանց վրա, իսկ երկրորդները` անտեսում:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

3 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»