Գրքեր անձնային աճի մասին

Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքերի միջոցով ես կփորձեմ Ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար: -Հ. Մանուկյան


   


Արժեթղթեր

Ընկերության շուկայական կապիտալիզացիա. ի՞նչ է դա…

Եթե հետաքրքրվում եք արժեթղթերով կամ կարդում եք նորություններ միջազգային շուկաներից, ապա կարծում եմ բազմիցս լսած կլինեք «ընկերության շուկայական կապիտալիզացիա» կամ ռուսերեն “рыночная капитализация компании” արտահայտությունը:

Մինչև հասկանալը, թե ինչ է դա, եկեք հասկանանք, թե ընդհանրապես ինչպես են որոշում ինչ-որ ընկերության գինը: Անենք դա օրինակի օգնությամբ: Ենթադրենք կա տաքսի ծառայություն, որն ունի 10 մեքենա: Տաքսի ծառայությունն անվանենք «Սըքսես»: «Սըքսես» տաքսի ծառայության յուրաքանչյուր մեքենայի արժեքն է 3 մլն դրամ: Նաև ընկերությունն ունի գրասենյակ, որն իր գույքի հետ միասին գնահատվում է 20 մլն դրամ: Փաստորեն «Սըքսես» տաքսի ծառայության արժեքն է 50 մլն դրա՞մ:

Դժվար է ասել, քանի որ «Սըքսես» տաքսի ծառայությունն ունի նաև ընթացիկ վարկ: Մեքենաները գնելու համար նա ժամանակին վերցրել է 40 մլն դրամ վարկ, որից 15 մլնը դեռ մարած չէ: Այսինքն, «Սըքսես» տաքսի ծառայության արժեքն է 50-15 = 35 մլն դրա՞մ: Նույնպես վիճելի է, քանի որ տաքսի ծառայության տարեկան մաքուր շահույթը կազմում է 10 մլն դրամ և փաստորեն ընկերության գնորդը այդ գնով գնելու դեպքում 3,5 տարի անց կզրոյացնի իր ծախսերը և կսկսի շահույթ ստանալ: Դա շատ լավ հասկանում է նաև վաճառողը և իհարկե նա չի վաճառի ընկերությունն այդ գնով, այլ կվաճառի, օրինակ, 80 մլն դրամ:

Բացի այդ «Սըքսես» տաքսի ծառայությունը տարբերվում է այլ տաքսի ծառայություններից իր համբավով: Մարդիկ սիրում են տաքսի ծառայությունը, քանի որ նրա մեքենաները երբեք չեն ուշանում, վարորդները բարեհամբյուր են, իսկ մշտական հաճախորդներին զեղչեր են արվում: Այսինքն, «Սըքսես» անունը մարդկանց մոտ վստահություն է առաջացնում: Միգուցե դա է՞լ է ազդում ընկերության գնի վրա: Իհարկե ազդում է: Հայտնի ապրանքանիշը կարող է բարձրացնել ընկերության գինը մի քանի անգամ: Չէ՞ որ եթե Coca-Cola-ն սկսի արտադրել Coca-Cola ջինսեր, ամենայն հավանականությամբ դրանք կվաճառվեն նույն հաջողությամբ, որքան ընկերության ըմպելիքները, քանի որ Coca-Cola անունը մարդկանց մոտ հեղինակություն է վայելում:

Այդ դեպքում ինչպե՞ս որոշել ընկերության գինը, չէ որ դրա վրա ազդող գործոններն այդքան շատ են: Ընկերության գինը որոշելու հստակ բանաձև չկա: Ընկերությունը վաճառելիս հաշվի են առնվում բոլոր գործոնները: Դա նման է ցանկացած այլ ապրանք վաճառելուն: Օրինակ, դուք չեք կարող միանշանակ ասել, որ անձրևանոցի գինը 5$ է: Աֆրիկայում այն միգուցե լինի 2$, քանի որ այնտեղ անձրևներ չեն գալիս, իսկ Շրի Լանկայում, որտեղ տարվա մեծ մասն անձրևներ են լինում, այն արժենա 25$: Այսինքն, ապրանքի գնի վրա ազդեց մի գործոն, որն առաջին հայացքից նկատելի չէր և ինքն իրենով այն գին չունի: Նույնը կատարվում է նաև ընկերությունների դեպքում: Ընկերության գնի վրա ազդող գործոնները կարող են լինել բազմաթիվ՝ սկսած համաշխարհային ճգնաժամից վերջացրած ընկերության տնօրենի անձով:

Բայց չէ՞ որ ընդունված է, որ այդ բոլոր գործոնները հաշվի են առնում այն մարդիկ, ովքեր զբաղվում են ընկերության բաժնետոմսերի առք ու վաճառքով: Չէ՞ որ եթե ինչ-որ մեկն ունի բաժնետոմս, փաստացիորեն նա ունի այդ ընկերության մի մասը և այդ մի մասը վաճառելիս նա իհարկե կփորձի հաշվի առնել բոլոր այն գործոնները, որոնք ազդում են ընկերության գնի վրա: Մեկ, երկու, երեք, … տասնյակ մարդիկ միգուցե սխալվեն, քանի որ ոչ բոլորն ունեն անհրաժեշտ գիտելիքներ: Բայց բոլոր մարդիկ միաժամանակ հազվադեպ են սխալվում. շուկան հազվադեպ է սխալվում: Մարդիկ չեն կարող 5$-անոց բաժնետոմսը վաճառել 50$-ով, քանի որ այդ դեպքում ոչ ոք չի գնի: Գնորդներն էլ չեն կարող այն գնել 3$-ով, քանի որ այդ գնով ոչ ոք չի վաճառի:

Ընկերության բաժնետոմսերի գինը տվյալ պահին որոշում է շուկան, իսկ այդ շուկայում բացի հասարակ մարդկանցից ներգրավված են խոշոր ներդրումային կազմակերպություններ, պրոֆեսիոնալ մասնագետներ, որոնք վերլուծում են այն ամենը, ինչը կարող է ազդել ընկերության բաժնետոմսերի գնի վրա: Եվ եթե այս պահին ընկերության բաժնետոմսերի գինը 5$ է, ուրեմն հենց այդ գնով են պատրաստ վաճառել մարդիկ իրենց բաժնետոմսերը և հենց այդ գնով են պատրաստ ձեռք բերել դրանք գնորդները: Իսկ ինչ է ապրանքի գինը, եթե ոչ այլ ինչ, քան այն գինը, որը պատրաստ են վճարել մարդիկ ապրանքի համար: Նույն ձև էլ որոշվում է ընկերության գինը: Դա այն գինն է, որը պատրաստ է վճարել գնորդը ընկերության համար: Իսկ բաժնետիրական ընկերության դեպքում գնորդը ոչ թե մեկն է, այլ հարյուրավոր մարդիկ, ովքեր ցանկանում են ձեռք բերել ընկերության բաժնետոմսերը: Փաստորեն, ընկերության գինը կորոշվի նրա բոլոր բաժնետոմսերի գնով, այսինքն ընկերության բոլոր բաժնետոմսերի թիվը բազմապատկած մեկ բաժնետոմսի շուկայական գնով:

Վերջապես հասանք վերջին: Բաժնետիրական ընկերությունների դեպքում ավելի հաճախ կիրառվում է ոչ թե «գին», այլ «շուկայական կապիտալիզացիա» տերմինը, այսինքն այդ պահին ընկերության գնահատվող արժեքը շուկայում: Փաստորեն, շուկայական կապիտալիզացիան ընկերության բոլոր բաժնետոմսերի գինն է` դրանց քանակի և մեկ բաժնետոմսի շուկայական գնի արտադրյալը:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

5 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»