Գրքեր անձնային աճի մասին

Այս գրքերը ծնվեցին այն փոփոխությունների արդյունքում, որոնք տեղի ունեցան մի մարդու ներսում: Առաջին փոփոխությունը կապված էր կյանքի հանդեպ վերաբերմունքի, երկարաժամկետ նպատակները հասկանալու հետ: Փոփոխությունն ամփոփվեց «Փոխիր Կյանքդ» գրքում: Երկրորդ փոփոխությունը կապված էր բնավորության հետ. կամ մենք ղեկավարում ենք մեր բնավորությունը, կամ այն ղեկավարում է մեզ: Փոփոխության արդյունքում ծնվեց «Կամքի ուժ. ինչպես ղեկավարել սովորությունները» գիրքը: Երրորդ փոփոխությունը կապված էր աշխարհայացքի ընդլայնման հետ: Մեր մտածողությունը սահմանափակվում է այն միջավայրով, որում մենք ապրում ենք, որը գիտենք: Երբ կտրվում ես այդ միջավայրից, հնարավորություն ես ձեռք բերում աշխարհն այլ կերպ տեսնել, այլ կերպ մտածել: Մտածողության աճն ամփոփվեց «Ստանդարտ մտածելակերպի սահմաններից դուրս» գրքում: Դեռ փոփոխություններ կան առջևում…


   


Հեղինակային առակներ

Ո՞ր ճանապարհն ընտրել. առակ

Մի անգամ իմաստուն ծերունին քայլում էր ճանապարհով: Ծերունին ուրախ էր, նա հաճույք էր ստանում իր արած ամեն մի քայլից, նա հաճույք էր ստանում իր կուլ տված ամեն մի շունչ օդից, նա վայելում էր ճանապարհի եզրին շարված ծառերի պարը, նա վայելում էր իր վրայով թռչող թռչունների երգը, նա վայելում էր նույնիսկ մեղուների բզզոցը, որ գալիս էր ծառերի մյուս կողմից: Ծերունու համար աշխարհը իր տունն էր, շրջապատող ամեն ինչը` իր ընտանիքը: Նա ճանապարհորդում էր այնտեղ, որտեղ ինքն էր ուզում, հանդիպում էր մարդկանց, պատմում էր իր ճանապարհորդությունների մասին, խորհուրդներ էր տալիս, լսում էր նրանց պատմությունները: Մարդիկ սիրում էին ծերունուն, դժվար էին նրանից բաժանվում, ծերունին էլ սիրում էր մարդկանց. չէ՞ որ մարդիկ նրա ընտանիքն էին:

Ճանապարհը վերջացավ… Ծերունին հասավ ճանապարհի այն հատվածին, որտեղ այն ճյուղավորվում էր` վերածվելով երկու արահետների: Քիչ հեռու ինչ-որ մարդ նկատեց: Երբ մոտեցավ, տեսավ կուչ եկած մի երիտասարդի, ով գլուխը բռնած` ինչ-որ բանի շուրջ էր մտածում: Ծերունին ողջունեց նրան, ծանոթացավ և հարցրեց.
— Ի՞նչ ես այստեղ անում, ինչի մասին ես մտածում, ինչն է քեզ անհանգստացնում:

— Ես իմ ուղին եմ փնտրում, — պատասխանեց երիտասարդը, — ես ուզում եմ երջանիկ լինել: Երկու շաբաթ առաջ ես դուրս եկա տանից և բռնեցի այս ճանապարհը` հույս ունենալով հասնել այնտեղ, որտեղ իմ երջանկությունն է: Մինչ այս պահը՝ ճանապարհը մեկն էր և ես չէի մտածում, թե որ ճանապարհով շարժվեմ: Բայց հիմա ճանապարհը բաժանվում է և ես չգիտեմ՝ որ մեկով շարժվեմ: Ես վախենում եմ ընտրել մեկը, բայց պարզվի, որ ճիշտ էր մյուսը: Ո՞ր ճանապարհով են շարժվում երջանիկ մարդիկ:

Ծերունին ժպտաց:
— Երջանիկ մարդիկ շարժվում են ԻՐԵՆՑ ճանապարհով, — պատասխանեց նա, — կարևոր չէ, թե որ ճանապարհը դու հիմա կընտրես, եթե շարժվես ՔՈ ճանապարհով, անպայման կհասնես երջանկությանդ:

Շարժվիր ՔՈ ճանապարհով, Հարգելի Ընթերցող:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

7 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»