Truthly.me. ինչ է սպասվում…

Կան բաներ, որոնք հարազատ մարդիկ իրար չեն կարողանում ասել: Օրինակ, ընկերուհին չի կարողանում ասել ընկերուհուն, որ նրա կարմիր կոշիկները չեն սազում իր դեղին զգեստի հետ, կամ կինը չի կարողանում ասել ամուսնուն, որ նա շատ է գերացել և դա իրեն դուր չի գալիս, կամ զարմիկը հորեղբորը՝ որ ալկոհոլ օգտագործելուց հետո նա ծիծաղելի է դառնում: Նման օրինակները շատ են: Բոլոր դեպքերում էլ ասելու նպատակը մեկն է՝ դարձնել մեր հարազատ մարդկանց «ավելի լավը»: Եվ բոլոր դեպքերում էլ չասելու պատճառը մեկն է՝ մենք վախենում ենք, որ մարդը մեզ սխալ կհասկանա, մեզանից կնեղանա կամ ուղղակի անհարմար ենք զգում ասել դա: Բայց կան բաներ, որոնք մարդիկ պետք է իրենց մասին իմանան: Նույնիսկ իմ մեջ, համոզված եմ, որ կան շատ բաներ, որոնք ես չեմ նկատում, սակայն դա նկատում են կողքիս գտնվող հարազատ մարդիկ, ովքեր ինչ-ինչ պատճառներով չեն ասում դա ինձ: Բայց ինձ պետք է իմանալ դա, որովհետև ես ուզում եմ դառնալ ավելի լավը, ուզում եմ բարելավել ինքս ինձ, կամ ամենաքիչը՝ գոնե ինչ-որ բաների շուրջ կմտածեմ: Truthly.me-ը լուծում է այդ խնդիրը…

Truthly-ն սոցիալական նախագիծ է, որը հնարավորություն է տալիս ձեզ հարազատ մարդկանց անանուն (anonymous) ասել այն, ինչը դուք չեք կարողանում ասել նրանց դեմ առ դեմ: Նախագծի ունիկալություն կայանում է հետևյալ երեք սկզբունքների մեջ՝ անանուն, հարազատ մարդիկ, անձնական կարծիք:

Անանուն

Եթե մարդն իմանա, որ կա գոնե 1 % հավանականություն, որ ընկերոջն ինչ-որ բան ասելուց ընկերը կիմանա, թե ով է ասողը, կամ այլ կերպ ասած ինքը «կբռնվի», ապա նա չի ասի այն, ինչ ուզում է ասել: Truthly-ում «բռնվելու» հավանականությունը հավասարեցված է զրոյի (եթե իհարկե մարդը չի գրում իր անունը կարծիքի տակ կամ չի գրում ինչ-որ բանի մասին, որի մասին գիտեն միայն երկուսով 🙂 ): Այսինքն, կարծիք ուղարկելու համար պետք չէ գրանցվել կայքում, պետք չէ թողնել որևէ անձնական տվյալ: Անհրաժեշտ է կայքի գլխավոր էջից պարզապես որոնել ձեր ընկերոջը և ուղարկել նրան ձեր կարծիքը:

Հարազատ մարդիկ

Նախորդ պարբերությունը կարդալուց դուք երևի մտածեցիք, որ այդպես բոլորը բոլորին կարող են ցանկացած կարծիք ուղարկել: Truthly-ն ստեղծված է միայն հարազատ մարդկանց կարծիքները լսելու համար, ովքեր իրոք անհանգստանում, մտածում են մեզ համար: Դրանք մարդիկ են, ովքեր, օրինակ, ունեն մեր հեռախոսահամարը, կամ մեր ֆեյսբուքյան ընկերների ցանկում են, կամ էլ գիտեն մեր մասին ինչ-որ բան, որ այլ մարդիկ չեն կարող իմանալ: Այսինքն, գրանցվելով կայքում, մարդն իր համար ընտրում է այն հարցերը, որոնց այլ մարդիկ պետք է պատասխանեն՝ մինչև իրենց կարծիք ուղարկելը: Այդ հարցերից մի քանիսը ես նշեցի վերևում: Truthly-ում մենք մտցրել ենք Truth number-ի գաղափարը (կարելի է ասել դա Phone number-ն է համացանցում :)): Դա 12-նիշանոց թիվ է, որը մարդը տարածում է ֆեյսբուքում և դա կարող են տեսնել միայն իր ընկերները: Այսինքն, նրա ֆեյսբուքյան պատին հայտնվում է նման մի հաղորդագրություն. «Ողջույն, իմ Truth number-ն է 845244575434: Եթե դուք ուզում եք ինձ որևէ բան ասել, որ չեք կարողանում իմ դեմքին ասել, խնդրում եմ անցնել այս հղումով և օգտագործել այս համարը»: Այսինքն, եթե դուք որպես «ստուգիչ հարց» ընտրել եք Truth number-ը, ոչ ոք չի կարող ձեզ կարծիք հայտնել, եթե նա չի գտնվում ձեր ֆեյսբուքյան ընկերների ցանկում: Իսկ «ստուգիչ հարցերը» կարող են լինել միաժամանակ մի քանիսը: Truth number-ին դուք կարող եք ավելացնել ձեր բջջային հեռախոսահամարը, ծննդյան ամսաթիվը, և այլն:

Անձնական կարծիք

Մինչև Truthly.me-ն ստեղծելը մենք երկար ժամանակ ուսումնասիրում էինք շուկան՝ փորձելով նմանատիպ նախագիծ գտնել: Ճիշտ է նմանատիպ (նույն խնդիրը լուծող) նախագիծ այդպես էլ չգտանք, բայց գտանք որոշ նախագծեր, որոնք հիմնված էին անանուն հաղորդագրություններ ուղարկելու վրա: Եվ զարմանալին այն էր, որ այդ հաղորդագրությունները շատ դեպքերում բաց էին, այսինքն բոլորը կարող էին տեսնել դրանք: Truthly-ում կարծիքները, որոնք դուք ուղարկում եք մարդկանց, փակ են, անձնական, այսինքն ոչ ոք չի կարող դրանց մասին իմանալ, բացի ձեզանից և կարծիք ստացողից: Կարծիք ստացողն էլ հնարավորություն ունի պատասխանել ձեր կարծիքին՝ միգուցե իր շնորհակալությունը հայտնել, կամ տրամադրության փոփոխությունն արտահայտել, կամ ցանկացած այլ բան, ինչ ցանկանա: Իսկ պատասխանն արդեն բաց է և դուք կարող եք տեսնել այն նրա պատին (այստեղ կարևորը ոչ թե պատասխանն է, այլ կարծիքը):

Տեխնիկական կողմի մասին

Գաղափարի և իրականացման մասին այս հոդվածում այսքանը: Այժմ մի փոքր էլ կխոսեմ կայքի տեխնիկական կողմի մասին, որը կհետաքրքրի հատկապես ծրագրավորողներին: Կայքը գրված է Node.js պլատֆորմի վրա, որպես տվյալների բազա ընտրված է MongoDB-ին, կայքն ունի responsive design (Twitter Bootstrap), այսինքն այն աշխատելու է ցանկացած տեսակի սարքերի վրա՝ սմարթֆոններ, պլանշետներ, և այլն: Կայքի հոսթինգը գտնվում է heroku.com-ում, մի քանի օրից Truthly.me դոմեյնի տակ կհայտնվի դրա լիարժեք գործող բետտա տարբերակը (գրանցումը հնարավոր կլինի միայն սահմանափակ թվով մարդկանց համար), իսկ մեկ ամսվա ընթացքում կսկսի գործել կայքի լիարժեք տարբերակը: Ավելացնեմ միայն, որ կայքի թիրախային խումբը միջազգային շուկան է:

Հ.Գ.
Այսքանը Truthly.me-ի մասին: Սա նախագիծ է, որին մենք երկար ենք սպասել և հուսով ենք, որ մարդկանց այն պետք կգա: Եվ վերջում, մտածեք (ցանկության դեպքում էլ՝ կիսվեք)` կա՞ն ձեր հարազատ մարդկանց շրջանակում մարդիկ, որոնց դուք կուզեք ինչ-որ բան ասել, բայց դեմ առ դեմ դա չեք կարողանում անել 🙂