Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Անձնային աճ

Երկար մազերով տղամարդը

Զինվորական ծառայության ժամանակ երկար մազերով մի տղա բերեցին զորամաս. մի բան, ինչը 10 տարի առաջ միանշանակ արձագանքներ չէր ստանում: Պատուհանից նայում էինք ու մտածում, որ տղայի համար ծառայությունը «դժվար» է անցնելու: Իրականում շատ սխալ էինք մտածում: Տղան կարճ ժամանակում դարձավ իրենց գումարտակը «կարգավորող» անձանցից մեկը:

Այդ ժամանակվանից է մեջս տպավորվել, որ մարդու արտաքին տեսքն ընդհանրապես կապ չունի: Տղամարդը կարող է լինել երկար մազերով, պատռված ջինսով, բարակ ձայնով, մեծ փորով, կարճահասակ և այլն, և այլն, բայց եթե նա կարողանում է խնդիրներ լուծել, եթե նրա գործերն ու արդյունքներն ասում են նրա փոխարեն ավելի շատ, քան մյուսներինը, ապա նա ավելի ուժեղ է դիտվելու, քան ամրակազմ, խրոխտ ձայնով, կարճ սանրվածքով որևէ մեկը, ում մասին միայն խոսում է իր արտաքինը:

Մարդու գործերն ամենակարևորն են: Թե ինչ խնդիրներ է կարողանում մարդը լուծել, ամենակարևորն է: Թե քանի հոգու համար է մարդը կարողանում խնդիր լուծել, կրկին ամենակարևորն է:

Հետո սկսեցի ուշադրություն դարձնել, որ կան շատ մարդիկ, ովքեր երբ ճառ են արտասանում, լինի դա բաժակաճառ, թե այլ ճառ, թվում է, թե այդ պահին նրանք «ամենահզորն են», «ամենահաջողակն են»: Իրականում լավ խոսելը կարևորագույն ակտիվներից է, եթե դա ամրապնդված է գործով: Սակայն եթե գործեր չկան, լուծված խնդիրներ չկան, ապա խոսքերը մնալու են սոսկ խոսքեր, իսկ դրանց ազդեցությունը կարճ է լինելու:

Միշտ նկատվում են մարդիկ, ովքեր խնդիրներ են լուծում, ամենատարբեր խնդիրներ: Նման մարդկանց կարելի է հետևել: Նման մարդկանց հաճելի է և պետք է հետևել: Սա վերաբերում է ցանկացած իրավիճակի, լինի դա բիզնես, ավտովթար, հիվանդություն, ընտանիք, թե ինչ ասես: Երբ ուսանող տղան ընտանիք փող է բերում, նա խնդիր է լուծում: Երբ հայրը շինարարական ծանր աշխատանքից վերադառնում է տուն, նա խնդիր է լուծում: Խնդիր է լուծում զինվորը, խնդիր է լուծում փողոցում օգնություն առաջարկողը, խնդիր է լուծում աղետի ժամանակ չփախչողը:

Այդ պատճառով եմ ես հիանում Մահաթմա Գանդիով: Եթե նրա արտաքինով մարդ տեսնես, օրինակ, երբ նստած ես գրասենյակում քո հաստ բազմոցին և նման մի մարդ է ներս մտնում, միգուցե հայացքդ անգամ չբարձրացնես: Սակայն Գանդիի գործերն այնպիսին էին, նա այնքան մարդու խնդիր կարողացավ լուծել, որ համարվում է բոլոր ժամանակների ամենաուժեղ մարդկանցից մեկը:

Մարդու արտաքին տեսքն ինձ համար վաղուց նշանակություն չունի: Մարդու խոսքերն ինձ համար մեծ նշանակություն չունեն: Ամենակարևորը` մարդու գործերն են:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»