Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Հաջողակ մարդիկ

Կրիս Գարդներ. հաջողության պատմություն

— Մի՛ լսիր ոչ մեկին, ով կասի, որ դու ինչ որ բան չես կարող, նույնիսկ ինձ: Եթե երազանք ունես, պահիր այն: Մարդիկ, ովքեր ինչ-որ բան չեն կարողանում, կփորձեն համոզել քեզ, որ քեզ մոտ էլ ոչինչ չի ստացվի: Եթե նպատակ ես դրել, հասիր դրան և վե՛րջ:

Այսպես է ասում “Երջանկության փնտրումներ” ֆիլմի դրվագներից մեկում գլխավոր հերոս Կրիս Գարդներն իր 5-ամյա որդուն: Ֆիլմը պատմում է այն մասին, թե ինչպես երիտասարդ տղամարդը, ով ոչ մի տեղ չի աշխատում, ում լքում է կինը և ով, չկարողանալով վճարել վարձերը, փոքրիկ տղայի հետ հայտնվում է փողոցում և դառնում անօթևան` ունենալով երազանք և հավատալով իր ուժերին, կարողանում է հաղթահարել բոլոր դժվարությունները և հասնել հաջողության: Չնշեցի միայն մի բան: Ֆիլմը նկարահանված է իրական պատմության հիման վրա:

Այսօր Կրիս Գարդները հաջողակ գործարար է, միլիոնատեր և բարերար: Նրա մասին գրվում են գրքեր, նկարահանվում ֆիլմեր: Նա Christopher Gardner International Holdings ընկերության հիմնադիրն է, ներդրումներ է կատարում Հարավային Աֆրիկայում և զբաղվում է բարեգործությամբ:

Նա ծնվել է 1954 թվականի փետրվարի 9-ին ԱՄՆ-ի Վիսկոնսին նահանգի Միլուոկի քաղաքում: Փոքր տարիքում նրանց լքում է հայրը: Կրիսի մայրը երկրորդ անգամ ամուսնանում է դաժան մի անձնավորություն հետ: Չնայած անհաջող ամուսնությանը՝ նա դառնում է որդու ոգեշնչման հիմնական աղբյուրը: Նա Կրիսին սովորեցնում է լինել վստահ սեփական ուժերի նկատմամբ, երբեք չկորցնել հույսը: Հետագայում Գարդները միշտ մեջբերում է մոր խոսքերը. «Դու կարող ես հույսդ դնել միայն քո վրա: Քեզ ոչ ոք օգնության չի գա»:

Դպրոցն ավարտելուց հետո Կրիսը մտնում է ԱՄՆ ռազմածովային ուժեր, քանի որ այլընտրանք առանձնապես նա չուներ էլ: Ծառայության ժամանակ նա նշանակվում է որպես սանիտար հոսպիտալում, որտեղ էլ իր վրա է գրավում Կալիֆոռնիայում ճանաչված սրտային վիրաբույժ Ռոբերտ Էլլիսի ուշադրությունը: Բժիշկն առաջարկում է Գարդներին աշխատել որպես իր օգնական Սան-Ֆրանցիսկոյի բժշկական կենտոններից մեկում, որտեղ նա զբաղվում էր նորարարական բժշկական հետազոտություններով: Գարդներն ընդունում է առաջարկը և անցնում աշխատանքի: Ծառայությունից դուրս գալու հաջորդ 2 տարիների ընթացքում նա բավական մասնագիտանում է լաբորատորիայում իր աշխատանքի մեջ և բժիշկ Էլլիսի հետ համատեղ դառնում բժշկական ամսագրերում տպագրված տարբեր հոդվածների համահեղինակ: Բժշկության մեջ իր գիտելիքներով, փորձով և կապերով, թվում էր, թե Գարդներին փայլուն բժշկական ապագա է սպասվում: Բայց 26 տարեկան հասակում նա որոշում է, որ մինչև ունենա սեփական բժշկական փորձ, այդ մասնագիտությունն այլևս ոչ ոքի պետք չի լինի և որոշում է թողնել բժշկությունը:

1981 թվականի հունվարի 28-ին ծնվում է Գարդների առաջնեկը` Քրիստոֆերը: Նա սկսում է իր ողջ ուժերը ներդնել գումար վաստակելու և ընտանիքն ապահովելու համար: Նա աշխատում էր վետերանների խնամքի հոսպիտալում և միաժամանակ փորձում գումար վաստակել այլ աշխատանքներում: Կուտակած գումարով Գարդները կարողանում է մեկնել Լուիզիանա նահանգ, որտեղ ծանոթանում է իր կենսաբանական հոր հետ: Այնտեղից Սան Ֆրանցիսկո Կրիսը վերադառնում է բիզնեսում հաջողության հասնելու մեծ վճռականությամբ:

Օրերից մի օր փողոցում նա հանդիպում է կարմիր ֆերրարիով, կոկիկ հագնված մի տղամարդու: Գարդները հետաքրքրությունից հարցնում է, թե ինչպես է նա գումար վաստակում: Անցորդը պատասխանում է, որ ինքը բրոքեր է: Այդ մարդը Գարդների վրա այնպիսի մեծ տպավորություն է թողնում, որ նա որոշում է ընդունում, թե ինչ ուղղությամբ պետք է շարժվի և սկսում ծանոթանալ ֆինանսների աշխարհին: Այդ ժամանակ էլ Գարդներից հեռանում է կինը` իր հետ վերցնելով տղային: Իսկ ինքը` Գարդները, 10 օրով հայտնվում է բանտում` ավտոկայանատեղի համար իր պարտքը չվճարելու համար: Բանտից վերադառնալով տուն` նա տեսնում է, որ բնակարանը ամբողջությամբ դատարկ է. չկան կինը, տղան, ունեցվածքը, շորերը: Չունենալով փորձ, կրթություն, կապեր և անընդհատ կրելով նույն հագուստը, որով նա բանտ էր ընկել, Կրիսը դասընթացների է անցնում Dean Witter Reynolds ներդրումային ընկերությունում:

Գարդները քրտնաջան աշխատում էր, որպեսզի դառնա դասընթացների լավագույն մասնակիցը: Նա գրասենյակ էր գալիս բավականին շուտ և աշխատում մինչև մութն ընկնելը` անընդհատ զանգահարելով հաճախորդներին: Նրա նպատակը օրեկան 200 զանգն էր: Նրա համառությունը վարձատրվում է, երբ 1982 թվականին նա հանձնում է որակավորման քննությունը և անցնում մշտական աշխատանքի ընկերությունում: Հետագայում Գարդները տեղափոխվում է Սան Ֆրանցիսկոյում գտնվող Bear Stearns ընկերություն:

Ամուսնուն լքելուց 4 ամիս հետո վերադառնում է կինը և ամուսնու խնամակալությանը հանձնում որդուն: Գարդները մեծ պատրաստականությամբ ընդունում է տղայի միակ խնամակալը լինելու պատասխանատվությունը: Սակայն այնտեղ, որտեղ նա ապրում էր, չէր թույլատրվում պահել երեխաներին: Նաև 1000 դոլար ամսեկան թոշակով, առանց որևէ խնայողությունների, նա չէ կարող հոգալ իր և տղայի բոլոր ծախսերը: Եվ շուտով, չունենալով բավարար միջոցներ տուն վարձակալելու համար, նա տղայի հետ հայտնվում է փողոցում և դառնում անօթևան: Սակայն Գարդների աշխատանքային ընկերներից ոչ ոք անգամ չէր էլ կասկածում, որ մոտ մեկ տարի նրանք տղայի հետ թափառաշրջիկներ էին: Գարդներն ամեն անգամ կռիվ էր տալիս երեխային մանկապարտեզում տեղավորելու համար: Նրանք այլ անօթևան մարդկանց հետ անվճար ուտելիքի հերթեր էին կանգնում և քնում այնտեղ, որտեղ ինչ որ ապահով տեղ էին գտնում` այգիներում, հանրակացարաններում և նույնիսկ կայարանների փակ զուգարաններում: Որոշ ժամանակով Գարդներին հաջողվում է որդուն տեղավորել եկեղեցական մանկատանը:

1987 թվականից սկսվում է Կրիս Գարդների վերելքը: Նա Չիկագոյում հիմնում է Gardner Rich & Co բրոքերական ընկերությունը` ունենալով սկզբնական 10000 դոլար և գրասենյակի միակ կահույքը` փայտե սեղան, որը ծառայում էր նաև որպես ընտանեկան ճաշասեղան: Հետագայում, 2006 թվականին, բազմամիլիոնանոց գործարքի արդյունքում նա վաճառում է իր ընկերությունը և հիմնում Christopher Gardner International Holdings ընկերությունը: Այցելելով Աֆրիկա` Գարդները հանդիպում է Նելսոն Մանդելլայի հետ և միասին քննարկում Հարավային Աֆրիկայում հնարավոր ներդրումային տարբերակները: Նա տարբեր ներդրումային ծրագրեր է մշակում, որոնց արդյունքում երկրում ստեղծվում են հարյուրավոր աշխատատեղեր և ավելանում արտասահմանյան գումարների ներհոսքը այդ երկիր: Նա նաև հանդիսանում է տարբեր բարեգործական կազմակերպությունների հովանավոր: Միացյալ նահանգներում նա ֆինանսավորում է 50 միլիոն դոլար արժողությամբ մի ծրագիր, որն ապրելու տեղեր և զբաղվածություն է ստեղծում եկամուտի ցածր մակարդակ ունեցող մարդկանց համար քաղաքի այն մասում, որտեղ ժամանակին ինքն անօթևան է եղել:

Նա նաև իրեն նվիրել է երեխաների բարեկեցության խնդիրներին, հանդիսանում է National Fatherhood Initiative ընկերության և մի շարք այլ հիմնադրամների անդամ: 2002 թվականին Միացյալ Նահանգներում նա ստանում է Father of the Year մրցանակը: Այսօր նրա մասին նկարահանված «Երջանկության փնտրումներ» ֆիլմը ցուցադրվում է Միացյալ Նահանգների տարբեր քաղաքներում` որպես ոգեշնչում անապահով և անօթևան քաղաքացիներին: Այն հանդիսանում է ֆինանսական ազատության և հաջողության հասնելու վառ օրինակ:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

2 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»