Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Մարքեթինգ

Գործարար Ֆեյսբուք: Ձեր ընկերության էջը ստեղծելու 2 հիմնարար պատճառ

Հեղինակ՝ Artur

Այսօր ինտերնետը դարձել է հաջող գործարարության նախապայմաններից մեկը։ Գործարար աշխարհը վաղուց հասկացել է վեբ բիզնեսի կարեւորությունը, իսկ Հայաստանում դեռ նոր են փորձում ըմբռնել: Իհարկե, մերոնք հաճախ բավարարվում են միայն մի քանի հազար դոլարանոց կայքէջ բացելով եւ հանգիստ շունչ քաշելով, թե՝ «մենք մեր ընկերության վիրտուալ ներկայությունն ապահովել ենք»:

Իրականում, համացանցն առաջին հերթին կապերն են: Ոչ այնքան հղումները նկատի ունեմ, որքան՝ մարդկային շփումները եւ հաղորդակցությունը: Հետադարձ կապը նկատի ունեմ եւ մարդկանց կարիքներին եւ նախասիրություններին, դժգոհություններին կամ շնորհակալություններին օր առաջ տեղեկանալը: Նաեւ, նորությունները համացանցի միջոցով արագորեն եւ արդյունավետ կերպով տարածելու մասին է խոսքը:

Վերջապես, «կապեր» ասելով մարդկանց անծայրածիր համաշխարհային ցանցի վերաճած Ֆեյսբուքը նկատի ունեմ, որի «բնակչությունը» հատել է 750-ը եւ վեց հատ զրոները: Կարծո՞ւմ եք, որ աշխարհի հետ դուք գործ չունեք: Շատ բարի, եկեք գանք Հայաստան: Մեր հանրապետությունում ֆեյսբուքից օգտվում են ավելի քան 182 հազար մարդ: Եվ, ովքե՞ր են այս մարդիկ, եթե ոչ Ձեր (եւ Ձեր մրցակիցների) ներկա եւ ապագա հաճախորդները:

Այսօրվա ֆեյսբուքը մարդկային պաշարների մի անսպառ շուկա է, իսկ ֆեյսբուք էջը՝ այդ շուկայում Ձեր ընկերության «լիազոր ներկայացուցիչը»:

Ձեզ լրացուցիչ փաստարկնե՞ր են պետք: Որքան ուզեք: Ես կխնայեմ Ձեր ժամանակը եւ կնշեմ ֆեյսբուքյան էջի անհրաժեշտությունը վկայող միայն 2 կետեր: Իսկ լրացուցիչ պարզաբանումները եւ քննարկումները կծավալենք մեկնաբանությունների տեսքով:

Ինչո՞ւ բացել ֆեյսբուք էջ

1. Ֆեյսբուք-էջը կարող է դառնալ Ձեր բիզնեսը մարդկանց հետ կապող եւ սնուցող «խողովակ»

Հայտարարություններ, Ձեր ոլորտի նորությունները եւ Ձեր ընկերության նորույթները, հանդիպումներ, միջոցառումներ եւ ելույթներ, նկարներ ու տեսանյութեր, հարցազրույցներ եւ վերլուծություններ… ամեն-ամեն ինչ կարելի է «փակցնել Ձեր ֆեյսբուքյան պատին» եւ տեղեկացնել Ձեր «fan»-երին (եւ ոչ միայն նրանց): Նկատի չունեմ՝ բոլորին անխտիր «սփամելը» եւ հոգնեցնելը, այլ՝ մարդկանց ոլորտի ամենակարեւոր անցուդարձին մասնակից դարձնելը: Մարդիկ վստահում են նրանց, ովքեր ազնիվ են եւ ովքեր իրենց հաճախորդներից թաքցնելու ոչ մի բան չունեն:

Ֆեյսբուք էջը նաեւ հզոր հետադարձ կապի միջոց է: Ի՞նչ է «ֆան-էջը», եթե ոչ երկխոսելու եւ քննարկելու հարթակ: Բոլոր հետաքրքրված մարդկանց, այդ թվում՝ հաճախորդների հետ: Սա միայն Like սեղմելը չէ, այլ՝ մեկնաբանելն ու սեփական կարծիքն արտահայտելը: Մարդիկ հարգում են այն գործարարներին, ովքեր ուշադիր կերպով լսում են իրենց հաճախորդների մտահոգությունները եւ նշումներ անում:

2. Ֆեյսբուք-էջը կարող է օգնել Ձեր բիզնեսի բրենդավորմանը

Բրենդը բարձր որակ է եւ այդ որակի մշտական վերահսողություն: Սակայն բրենդը նաեւ բարձր տեսանելիություն է, հանրաճանաչություն եւ կայուն «բարի հիշողություն»:

Տարածելով Ձեր ընկերության վերաբերյալ տեղեկատվությունը, դուք բարձրացնում եք Ձեր բիզնեսի տեսանելիությունը: Ժամանակի հետ Ձեր տեղեկատվությունը արտահոսում է Ձեր էջի սահմաններից դուրս, հայտնվում «լայքողների» եւ այդ «լայքողներին լայքողների» էջերում: Արդյունքում, Ձեր բիզնեսին առնչվող տեղեկատվությունը հայտնվում է ամենատարբեր էջերում:

Տեղեկատվության այսպիսի «վիրուսային» տարածումը Ձեր ընկերության անունը կարող է հասցնել աներեւակայելի հեռուներ: Հետեւողական ակտիվությունը Ձեր ընկերությունն օր-օրի կդարձնի ավելի ու ավելի հանրաճանաչ:

Վերջապես, Ֆեյսբուքը կօգնի, որպեսզի հազարավոր մարդիկ մտապահեն եւ ֆիքսեն Ձեր ընեկերության անվանումը, Ձեր լոգոն, Ձեր կարգախոսը, Ձեր ապրանքներն ու ծառայությունները:

Եվ այս ամենը՝ առանց որեւէ լումա ծախսելու, առանց երկար նախապատրաստական մամլո ասուլիսների, թարկարժեք կոկտեյլ-հանդիպումների կամ շնորհանդեսների:

Ի՞նչ արդյունավետության մասին է խոսքը

Դուք գործարար եք, ուրեմն կիմանաք, որ ամեն ինչ կախված է Ձեր համարժեք ներդրումներից, ճիշտ հաշվարկված մոտեցումներից, քայլերի նպատակասլացությունից եւ միջոցառումների արդյունավետությունից:

Բայց ֆեյսբուքն ունի նաեւ կարեւոր մի նրբություն: Մեկը կարող է իր 100 «fan»-երի հետ ստեղծել կայուն համագործակցություն, իսկ մյուսը «պահի» 1000-ը եւ ասելիք չունենա:

Ֆեսյբուքը պահանջում է ակտիվություն: Ակտիվ եղեք, եւ Ձեր ֆեյսբուք-էջը կդառնա հանրաճանաչ՝ դրանով իսկ հանրաճանաչություն բերելով Ձեր ընկերությանը: Ակտիվ եղեք ոչ միայն Ձեր էջում, այլ՝ Ձեր ոլորտը ներկայացնող էջերում: Միայն մի հայտարարեք, այլ հանդես եկեք նաեւ արժեքավոր խորհուրդներով, հավաստի տեղեկություններով եւ օգտակար մեկնաբանություններով: Եվ հիշեք, որ դուք ներկայացնում եք Ձեր բրենդը, որը կարիք ունի ամրապնվելու մարդկանց ուղեղներում որպես հեղինակություն:

Կստացվի՞ երկխոսությունը՝ կախված է Ձեզնից ու ֆեյսբուքում Ձեր նպատակասլաց ակտիվությունից, ինչպես նաեւ ընեկերությունը բրենդավորելու այլ միջոցների հետ ճիշտ զուգակցումից:

Հեղինակի մասին

Artur

Ողջույն, ես Վեբ կայքի կատարելագործման բլոգի հեղինակն եմ: Իմ բլոգում տեղ են գտել կայքերի գուգլ-օպտիմալացման, վեբ առաջխաղացման եւ բլոգինգի հարցերին նվիրված ավելի քան 600 հոդվածներ։ Բաժանորդագրվեք իմ բլոգի հոսքերին եւ տեղեկացեք նոր հրապարակումների մասին: Հետեւեք նաեւ իմ ֆեյսբուքին եւ թվիտերին:

4 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»