Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Աֆորիզմներ

Արիստոտել — մտքեր

Երբ աշակերտները հարցնում են Արիստոտելին` ինչպես հասնել հաջողության, նա պատասխանում է.
-Առաջ անցեք նրանցից, ովքեր առջևում են և մի սպասեք նրանց, ովքեր ետևում են:

Ձեզ ենք ներկայացնում հայտնի փիլիսոփայի մտքերից մի քանիսը` մեր մեկնաբանություններով:

Ո՞րն է կյանքի իմաստը: Ծառայել ուրիշներին և բարություն գործել: Հազվագյուտ մարդիկ են ձգտում ծառայել ուրիշներին: Բոլորն ուզում են, որ ծառայեն իրենց: Այդ պատճառով էլ այն «հազվագյուտները», որոնք ծառայում են ուրիշներին, առանձնանում են բոլորից:

Ապրել, նշանակում է ստեղծել իրեր, այլ ոչ թե դրանք ձեռք բերել: Իմ ամենասիրած մտքերից մեկն է: Ստեղծելով է մարդն իրենից արժեք ներկայացնում, այլ ոչ թե ձեռք բերելով:

Երջանկությունը նրա հետ է, ով գոհ է: Եթե դուք ինչ-որ բանից դժգոհ եք, դուք ինքներդ եք ազդակներ ուղարկում ձեր ուղեղին, որ ամեն ինչ վատ է: Արդյունքում` այդպես էլ լինում է: Ցանկացած բանի դեմ կարելի է պայքարել առանց դժգոհելու` պարզ և մաքուր գիտակցությամբ:

Խելքը բնութագրվում է ոչ միայն գիտելիքներով, այլ նաև դրանք գործնականում կիրառելու ունակությամբ: Ամենակարևոր մտքերից մեկը, որի վրա պետք է ուշադրություն դարձնել: Ավելի լավ է քիչ գիտելիք ունենալ, բայց կարողանալ դրանք կիրառել, քան անընդհատ գիտելիքներ հավաքել և չմտածել այն մասին, թե ինչպես դրանք կիրառել:

Վախը` դա չարի ակնկալումն է: Իմ մոտ եղել են դեպքեր, երբ ես երկու օր անհանգիստ սպասել եմ ինչ-որ վատ բանի: Բայց երբ եկել է օրը, ոչինչ էլ չի եղել: Եվ հիմա խորհուրդ եմ տալիս: Մի վախեցեք մի բանից, որը կարող է նույնիսկ չլինել: Միևնույն է, դա ոչինչ չի փոխի: Ավելի լավ է, այդ ընթացքում ինչ-որ լավ բանով զբաղվեք:

Մեր բնավորությունը, մեր պահելաձևի արդյունքն է: Եթե մենք անգործությամբ ենք զբաղվում, դա դառնում է բնավորություն: Եթե մենք բողոքում ենք, դա դառնում է բնավորություն: Եթե մենք մտածում ենք այն մասին, որ չենք հասնելու հաջողության, դա դառնում է բնավորություն:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»