Երբ սկսեցի այս գիրքը գրել, գլխավոր մտահոգություններիցս մեկն այն էր, թե ինչ կհասկանան մարդիկ՝ «ստանդարտ մտածելակերպի սահմաններից դուրս» արտահայտությունը լսելով: Այլ կերպ ասած` ի՞նչ է մեզ համար «ոչ ստանդարտ» մտածելակերպը: Եթե հարցնեք ինչ-որ մեկին՝ «Երևակայիր մի բան, որը ստանդարտներից դուրս է», ամենաանհավանական պատասխաններում հավանաբար կլսեք այն մասին, թե ինչպես է մարդը թռչում, պատի միջով անցնում, ճանապարհորդում տիեզերքում, այլմոլորակայինների հետ շփվում, կենդանիների լեզվով խոսում, ջրի տակ շնչում, չորս ձեռք կամ երեք աչք ունի, ուրիշների մտքերն է կարդում, ապրում է առանց սնվելու և այլն, և այլն: Սա է միջին վիճակագրական մարդու մտքի ամենաընդարձակ սահմանը: Իրականում այս մտքերն ու պատկերացումները չի կարելի «ոչ ստանդարտ» անվանել: Մարդիկ, փորձելով մտածել ստանդարտներից դուրս, չեն էլ կռահում, որ շարունակում են մնալ ստանդարտների ներսում:


   


Օգտակար խորհուրդներ

Կրճատեք ժամանցի ժամանակը

Շատ հաճախ մարդիկ, որոնք դժգոհում են իրենց կյանքից և ուզում են ավելի լավ ապրել, այնքան ժամանակ են ծախսում ժամանցի վրա, որ դրանով ոչ միայն չեն բարելավում իրենց կյանքը, այլ նաև վատնում են այն անգին ժամանակը, որը պետք է օգտագործեին ավելի կարևոր բաներ անելու համար: Գիտե՞ք ինչն է ցավալի: Երբ տեսնում եմ, որ մարդիկ, որոնք օրեկան 8-ից 10 ժամ չարչարվում են և զբաղվում են «ոչ սիրելի» աշխատանքով, աշխատանքից դուրս իրենց ամբողջ ազատ ժամանակը վատնում են ժամանցի վրա` փոխարենը զբաղվելու այնպիսի բանով, որը կօգներ փոխել իրավիճակը:

Այն, որ ընկերների ու հարազատ մարդկանց հետ պետք է շփվել, գիտենք բոլորս: Այն, որ արդյունավետ աշխատելու համար պետք է հանգստանալ և լիցքաթափվել` նույնպես գիտենք բոլորս: Դրա համար ցանկալի է, որ տարին գոնե մեկ անգամ ճանապարհորդեք, երբեմն կինո կամ թատրոն գնաք, երեկոյան մի քիչ զբոսնեք, ժամանակ առ ժամանակ ընկերների հետ հավաքվեք, երեկույթներ կազմակերպեք, ուրախանաք, պարեք: Բայց այդ ամենը չպետք է անցնի չափերը: Ժամանցը չպետք է զբաղեցնի ձեր ժամանակի մեծ մասը: Ձեր ուղեղը չպետք է անընդհատ այդ ուղղությամբ աշխատի: Պետք է տարբերել «անհրաժեշտ» ժամանցը «անօգուտ» ժամանցից: Պետք չէ սրճարաններում անիմաստ ժամանակ անցկացնել: Արեք դա այն ժամանակ, երբ դրա անհրաժեշտությունը իրոք կա: Լուրջ ուշադրություն դարձրեք ոգելից խմիչքի վրա: Մի համարեք դա ժամանցի «ամենալավ» ձևը: Պետք չէ ամեն երեկո ընկերների հետ հավաքվել խմելու, կամ շաբաթական մի քանի անգամ ճաշկերույթներ կազմակերպել, կամ պետք չէ ամեն օր այնքան զբոսնել, որ հետո հոգնած վերադառնալ տուն և ոչինչ չկարողանալ անել:

Երբեմն, որպեսզի ինչ-որ բան ձեռք բերեք, պետք է ինչ-որ բանից հրաժարվեք` թեկուզ ժամանակավոր: Եթե դուք նպատակ ունեք, ապա պետք է կենտրոնանաք ձեր նպատակի վրա, այդ ուղղությամբ քայլեր ձեռնարկեք և հնարավորինս քիչ այդ ճանապարհից շեղվեք: Մտածեք այդ ուղղությամբ:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

2 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»