Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Մարդկանց հետ շփում

Պարզաբանված հարաբերություններ (կամ կառուցենք ճիշտ հարաբերություններ)

Հեղինակ՝ Vanuhi

Քանի անգամ է մեր  կյանքում պատահել, որ ասել ենք հետևյալ արտահայտությունը «Հերիք եղավ` ինչքան լռեցի»: Իսկ ում էր պետք մեր լռելը, եթե մի օր վերջիվերջո հնչեցնելու ենք այդ նախադասությունը: Ցանկացած մարդու հետ, կլինի գործընկերոջ, ընկերոջ թե նույնիսկ ընտանիքի անդամի, պետք է հարաբերությունները տեղում պարզել, ու պետք չէ դա հասկանալ բառիս վատ իմաստով, չնայած հասկանում եմ, որ «հարաբերություններ պարզել» արտահայտության մեջ արդեն իսկ ինչ-որ ագրեսիվ տարր կա, բայց հավատացնում եմ, որ չպարզելն ավելի ագրեսիվ հետևանքներ կարող է կրել:

Շատերի հետ պատահած կլինի, որ աշխատավայրում կոնկրետ պարտականություններ միայն դուք եք կատարում, չնայած նրա, որ այդ պարտականությունները միայն ձերը չեն և դա անում եք գործընկերների հետ լավ հարաբերություններ պահպանելու, ավելորդ կոնֆլիկտային իրավիճակներից խուսափելու և այս ու այլ շատ պատճառներով: Ու մի օր էլ մենք բանական էակներից վերածվում ենք էմոցիոնալ էակների ու հնչեցնում ենք այդ «Հերիք եղավ` ինչքան լռեցի» ու կոնֆլիկտը, որից միաժամանակ խուսափում էինք, դառնում է անխուսափելի: Իսկ դա չէր լինի, եթե մենք նրբանկատության և կոռեկտության սահմաններում ամեն ինչ նախօրոք պարզաբանած լինեինք, չթողնեինք, որ «ագրեսիվ» մտքերը  մեր մեջ կուտակվեին:

Ցանկացած պարագայում, ցանկացած մարդու հետ, երբ պետք է հարաբերությունները պարզաբանել, տեղում տվեք և խնդրեք բացատրություններ, մեկնաբանեք ձեր այս կամ այն արարքը և նույնն էլ խնդրեք դիմացինից: Երբեմն մենք մեր պարտքը չենք համարում բացատրություններ տալ, բայց ուրիշների պարտքն ենք համարում մեզ հասկանալ առանց բացատրությունների: Իսկ ինչո՞ւ: Բացատրեք և ձեզ անպայման կհասկանան: Պետք է միշտ ընդառաջել, աջակցել, մտնել ուրիշի դրության մեջ, պետք է ներել, բայց երբեք չի կարելի թողնել, որ ոչ ճիշտ հարաբերությունները պարբերաբար կրկնվեն, եթե հենց սկզբից գիտեք, որ սխալ սկիզբն ու սխալ ընթացքը հիմք են դառնալու հետագա առավել սխալ լուծումների համար:

Հեղինակի մասին

Vanuhi

4 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»