Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Հաջողության գաղտնիքներ

Դուք հաջողա՞կ եք

Ես շատ երկար եմ մտածել այս հարցի շուրջ. ո՞ր մարդն է համարվում հաջողակ: Այն մարդը, ով ինքն իրեն է համարում հաջողակ, թե այն մարդը, ում հաջողակ են համարում ուրիշները: Որպեսզի հասկանաք հարցի կարևորությունը, պատկերացրեք երկու մարդկանց: Նրանցից մեկը հավաքարար է, իմիջիայլոց` տղամարդ: Նա սիրում է իր աշխատանքը, ունի սիրված ընտանիք, ունի լավ ընկերներ, ազատ ժամանակը կարողանում է վայելել, մի խոսքով.. նա երջանիկ է: Երկրորդը հայտնի երգիչ է: Նրան անընդհատ ցույց են տալիս հեռուստացույցով, նրա ետևից վազում են աղջիկները, նա շրջում է շքեղ մեքենաներով, մի խոսքով.. նա հանրահայտ է: Բայց նա երջանիկ չէ, նա հանգիստ կյանք է ուզում, հոգնել է ուշադրությունից, ամուսնացած չէ, նրան թվում է, որ բոլորն իրեն խաբում են և նա անընդհատ լարված է: Նայեք այս երկու մարդկանց: Նրանցից ո՞վ է Ձեզ համար հաջողակ:

Նախ ասեմ, որ այս հարցի պատասխանը ես ինձ համար գտել եմ: Բայց մինչև դրան անդրադառնալը, մի քիչ պատմեմ այն մասին, թե ինչ եմ այդ ընթացքում զգացել: Նախ, հաճախ նկատում եմ, որ մարդիկ, ովքեր մի շրջապատում համարվում են հաջողակ, մեկ այլ շրջապատում բոլորովին էլ հաջողակ չեն և ոչնչով աչքի չեն ընկնում: Համոզված եմ, որ նրանք իրենք էլ իրենց հաջողակ չեն զգում: Ուղղակի ստացվում է այնպես, որ քեզանից քիչ հաջողությունների հասած մարդկանց համար դու դառնում ես հաջողակ: Իսկ նման մարդիկ կարող են շատ-շատ լինել: Բայց երբ դու հայտնվում ես մարդկանց մեջ, ովքեր քեզանից շատ հաջողությունների են հասել, դու քեզ զգում ես անճոռնի ճուտիկ և մոռանում ես քո հաջողությունների մասին:

Երկրորդ բանը, որ զգացել եմ այն է, որ կան մարդիկ, ովքեր, երբ նայում ես կողքից, ոչ մի լուրջ հաջողությունների չեն հասել: Բայց նրանք երբեք չեն էլ մտածել այդ ուղղությամբ, նրանք գոհ են իրենց կյանքից, նրանք ապրում են իրենց ունեցածով և ավելին չեն էլ ուզում: Այսինքն, նրանց համար կարևոր չէ, թե շրջապատում մարդիկ ինչի են հասնում, նրանք ապրում են իրենց փոքրիկ աշխարհում և այնտեղ նրանք երջանիկ են:

Երրորդ բանը, որ զգացել եմ, այն է, որ նախորդ կետում նկարագրված մարդկանցից գրեթե չկան: Այսինքն, գրեթե չկան մարդիկ, ովքեր ամեն ինչից գոհ են, բավարարվում են քչով, իրենց լիարժեք երջանիկ են համարում և կյանքից ոչ մի ավել բան չեն ուզում: Հիմնականում, բոլոր մարդիկ էլ ինչ-որ բանից դժգոհ են, հիասթափված, հուսահատված և ոչ թե չեն ուզում կյանքից ավելին, այլ ուղղակի չեն կարողանում դրան հասնել և բավարարվում են եղածով: Այսինքն, լիարժեք բավարարված մարդիկ գրեթե չկան: Օրինակ, դուք կարող եք գոհ լինել Ձեր սոցիալական վիճակից, բայց դժգոհեք Ձեր երեխաներից կամ գործերի ծանրաբեռնվածությունից: Կամ հակառակը, դուք կարող եք գոհ լինել Ձեր ընտանիքից և գործերից, սակայն դժգոհեք սոցիալական ծանր վիճակից:

Այդ ամենը հաշվի առնելով, ես եկել եմ եզրակացության, որ հաջողակ է այն մարդը, ով ինքն իրեն է համարում հաջողակ: Բայց դա պետք է լինի այնքան անկեղծ, այնքան խորը, որ դուք դրանում կասկածներ չունենաք: Հեշտ է հանգիստ հայտարարել` ես հաջողակ եմ, բայց դա ներքուստ չզգալ: Հեշտ է հայտարարել` ես հաջողակ եմ, բայց դրանից 10 րոպե հետո բողոքել կյանքից և այլ մարդկանցից: Բայց եթե դուք կարողանաք գալ այն հոգեվիճակին, որ ոչնչից չեք բողոքում, չեք դժգոհում, գոհ եք կյանքից, վայելում եք կյանքը, ամեն ինչ լավ է, մարդիկ լավն են, և դուք զգաք Ձեզ հաջողակ, զգաք դա ամեն րոպե, հավատացեք, որ դուք հաջողակ մարդ եք, համենայն դեպս` գտնվում եք այդ ճանապարհի վրա: Երբ մարդն իրեն այդպես է զգում, նա անպայման կդառնա հաջողակ նաև շրջապատի մարդկանց համար և դա միայն ժամանակի հարց է: Դուք չպետք է ոչ մեկին ասեք, հաջողակ եք դուք, թե ոչ: Դուք պետք է զգաք դա: Դուք պետք է ինքներդ Ձեր այդ հարցին պատասխանեք: Եվ նույնիսկ, եթե պատասխանը լինի ոչ, ուրախացեք, քանի որ դուք հենց նոր հասկացաք, որ Ձեր կյանքում փոխելու բան ունեք: Սկսե՛ք այդ փոփոխությունները:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

5 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»