Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Անձնային աճ

Ինչպես ես մասնակցեցի Ֆիլիպ Կոտլերի սեմինարին

Այս պատմությունը մեզ ուղարկել է մեր ընթերցողներից մեկը: Այն ցույց է տալիս, որ որքան էլ ճանապարհն արգելքներով լի թվա, միշտ էլ հնարավոր է հասնել նպատակին, եթե կա շատ մեծ ցանկություն: Պատմությունն իրական է և տեղի է ունեցել մոտ 1 տարի առաջ Հայաստանում: Եթե հիշում եք, հենց այդ ժամանակ էր, երբ Հայաստան էր ժամանել հայտնի մարքեթոլոգ, ժամանակակից մարքեթինգի հայր Ֆիլիպ Կոտլերը: Եվ նա պետք է դասախոսություններ կարդար և սեմինարներ անցկացներ հայ գործարարների, ուսանողների և բոլոր հետաքրքրված անձանց համար: Ես շատ քիչ միջոցառումներ եմ հանդիպել, որոնք գովազդվել են նման մասշտաբով: Նկատի ունեմ միջոցառման բնույթը. դա ոչ համերգ էր, ոչ տոնական միջոցառում, այլ գործարար մակարդակի սեմինար: Միջոցառման մասին պաստառները կարելի էր տեսնել փողոցում, մետրոյում, դրա մասին կարելի էր լսել ռադիոյով, տեսնել հեռուստատեսությամբ, մի խոսքով` մեծ մասշտաբի մարդ էր գալիս Հայաստան և դա պետք է լուսաբանվեր:

Կար միայն մեկ բայց… սեմինարի արժեքը բավական թանկ էր միջին սոցիալական պայմաններում ապրող մարդկանց համար: Հիմա հաստատ չեմ հիշի արժեքը, բայց այն կազմում էր մոտ մի քանի հարյուր հազար դրամ: Եվ մեր ընթերցողը, որին պայմանական անվանենք Ա., որոշում է անպայման մասնակցել սեմինարին: Սակայն այդքա՞ն գումար վճարել սեմինարի համար: Խոսքն այստեղ այն մասին չէ, որ սեմինարն այդքան չարժեր, խոսքն այն մասին է, որ այդ պահին ազատ դրամական միջոցները թույլ չէին տալիս: Եվ Ա.-ն գտնում է այլ տարբերակ: Նա սկսում է նամակներ գրել միջոցառման կազմակերպիչներին, որտեղ առաջարկում է մասնակցել կազմակերպչական աշխատանքներին, օգնել ինչ-ինչ հարցերում, միայն թե հնարավորություն ստանա անվճար մասնակցել սեմինարին: Նա ասում է, որ մի քանի էլեկտրոնային նամակներ էր ուղարկել կազմակերպչական թիմի անդամներին և հանկարծ… նրանցից մեկից պատասխան եկավ. համաձա՛յն էին: Եվ սեմինարներին նախորդող մի քանի օրերի ընթացքում Ա.-ն դարձավ կազմակերպչական աշխատանքների մասնակից:

Հետո եկավ երկար սպասված օրը: Ա.-ն դահլիճում կանգնած հետևում էր մեծ մարքեթոլոգին, դիտում նրան մոտ տարածությունից, գիտելիքներ ստանում, բայց ամենակարևորը` վայելում հաճույքը, որ կարողացավ հասնել իր նպատակին:

Հ.Գ.
Միգուցե թվա, որ մեծ բան չկա, բայց եթե անկեղծ` մեզանից քանիսը նման բան կանեին: Նման քայլերով են ձևավորվում մարդու սովորությունները, իսկ այս դեպքում, սովորությունը` նպատակին հասնելն է:

Այստեղ կարող է լինել նաև հաջողության Ձեր պատմությունը:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

2 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»