Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Ինտերնետ

Ինտերնետը՝ որպես օնլայն համալսարան

Ինտերնետի օգտակարության կամ վնասակարության մասին զրույցները շարունակվում են: Շատերը պնդում են, որ այն տեղափոխում է մարդկանց վիրտուալ աշխարհ, կտրում է իրականությունից, փչացնում է աչքերը, սպանում է ժամանակը և վնասակար սովորություններ է առաջացնում, մյուսներն էլ համոզված են, որ ինտերնետը մարդու առջև բացում է անսահման հնարավորություններ, որոնք չկային նախկինում, գլոբալացնում է աշխարհը, կապում է մարդկանց իրար, բիզնեսի և կրթության նոր հնարավորություններ է ստեղծում, հարմարություններ է մտցնում մարդու առօրյա կյանքում: Ինչպես հասկացաք, այսօրվա թեման` ինտերնետն է 🙂

Ուզում եմ կիսվել ինտերնետի մասին իմ պատկերացումներով: Նույնիսկ աշխարհի լավագույն համալսարաններում, որտեղից հանճարներ են դուրս գալիս, կան անկյուններ, որտեղ թմրանյութեր են վաճառում: Նույնիսկ հասարակ շաքարավազը, որ մենք ամեն օր օգտագործում ենք, կարող է վնասել մարդուն, եթե այն շատ օգտագործես: Նույնիսկ արևի ճառագայթները, առանց որոնց այս աշխարհը մռայլ կլիներ, կարող են արևահարում առաջացնել, եթե տանը պատսպարվելու փոխարեն` ամբողջ օրը դրանց տակ անցկացնես: Այդպես էլ ինտերնետն է. իր նախնական տեսքով այն ոչ թշնամի է, ոչ բարեկամ: Այն գործիք է` ստեղծված մարդու կողմից մարդկանց համար: Ամեն ինչ կախված է նրանից, թե ինչպես եք այն օգտագործում, որքան եք օգտագործում և որ «անկյուններում» եք ձեր ժամանակն անցկացնում:

Ինձ համար ինտերնետն օնլայն համալսարան է, գիտելիքների անսպառ աղբյուր: Երեկ որոշել էի հոդված գրել օֆշորային ընկերությունների մասին: Բայց քանի որ դրանց մասին գիտելիքներս մակերևույթային էին, որոշեցի տեղեկություններ փնտրել համացանցում: Մեկ-երկու ժամում այնքան ինֆորմացիա ստացա, որ մտածում եմ` եթե չլիներ ինտերնետը, որքա՞ն ժամանակում դա կհասցնեի սովորեի, ո՞վ ինձ պետք է սովորեցներ, որտեղի՞ց ես օֆշորային ընկերությունների մասին գիրք պետք է գտնեի: Օրվա ընթացքում ես անընդհատ փորձում եմ նոր բան սովորել: Եթե չլիներ ինտերնետը, միայն գրքերով ես այդ արդյունքը չէի ստանա: Գիրքն իհարկե գիտելիքի մեծ աղբյուր է, բայց ինտերնետի հնարավորություններն ուրիշ են:

Եթե դուք ուզում եք լեզուներ սովորել, դաշնամուր նվագել, ծրագրավորման դասընթացներ անցնել, ֆինանսական կրթություն ստանալ, կամ թեկուզ ճաշ պատրաստել` ինտերնետը ձեզ տալիս է այդ հնարավորությունը: Իհարկե, դուք ճաշը չեք պատրաստում ինտերնետում 🙂 Դուք գտնում եք ձեզ համար անհրաժեշտ ողջ ինֆորմացիան, յուրացնում եք, բայց փորձերը կատարում եք իրական կյանքում: Այսինքն, ինտերնետը չի փոխարինում իրական կյանքը, այլ լրացնում է այն: Օգտագործեք ինտերնետը կառուցողական, ստեղծարարական նպատակներով, օգտագործեք այն որպես գիտելիքի աղբյուր:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

2 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»