Ստարտափերների և ներդրողների շրջանում կա Elevator Pitch հասկացությունը: Եթե թարգմանենք դա հայերեն, մոտավորապես կստացվի «ներկայացում վերելակում»: Իմաստը հետևյալն է. եթե դուք ունեք լավ գաղափար, պետք է կարողանաք ներկայացնել այն ներդրողներին այնքան ժամանակում, որքանում վերելակը առաջին հարկից կբարձրանա վերև: Դա մոտավորապես 30 վայրկյանից 2 րոպե է: Այսինքն, դուք պետք է սովորեք գաղափարը ներկայացնել կարճ, պարզ, բայց սպառիչ, որպեսզի եթե հանկարծակի ներդրողների հետ հայտնվեք վերելակում և միասին բարձրանաք վերև, այդ ընթացքում հասցնեք պատմել նրանց ձեր գաղափարի մասին և երբ վերջում թողնեք նրանց ձեր այցեքարտը, նրանք ձեզ հետ զանգեն:
Իրականում, ես համաձայն եմ, որ լավ գաղափարը պետք է կարողանալ ներկայացնել կարճ ժամանակում՝ մինչև 2 րոպե: Այդ ընթացքում պետք է փորձել ներկայացնել խնդիրը և ինչպես է ձեր գաղափարը լուծում այդ խնդիրը: Elevator Pitch-ի իմաստը շատ տրամաբանական է: Եթե դուք ունեք գաղափար և ցանկանում եք ստեղծել հաջողակ ընկերություն, ապա լինելու են տարբեր հանդիպումներ (միգուցե պատահական) և միջոցառումներ, որտեղ դուք հանդիպելու եք մարդկանց՝ այն մարդկանց, ովքեր կարող են ազդել ձեր նախագծի վրա: Բայց այդ մարդիկ չունեն կես կամ մեկ ժամ, որպեսզի թողնեն ամեն ինչ և լսեն ձեզ: Դուք պետք է հասցնեք անել դա կարճ ժամանակում և նրանց մոտ հետաքրքրություն առաջացնել: Այնպես որ, սովորեք ներկայացնել գաղափարը կարճ և պարզ:
