Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Հաջողակ մարդիկ

Ֆինանսիստ, միլիարդատեր և ճանապարհորդ. Ջիմ Ռոջերս

Ջիմ Ռոջերսը ունիկալ անձնավորություն է: Բացի այն, որ նա հայտնի ֆինանսիստ է, աշխարհի ամենահայտնի ներդրողներից մեկը և վերջապես՝ միլիարդատեր, նա նաև արկածախնդիր ճանապարհորդ է, ով 2 անգամ հայտնվել է Գինեսի ռեկորդների գրքում. 1-ին անգամ կատարելով շուրջերկրյա ճանապարհորդություն իր մոտոցիկլով 1990թ-ին՝ անցնելով շուրջ 160 հազար կիլոմետր, և 2-րդ անգամ՝ 1999թ-ից-2002-ը՝ կատարելով ևս մեկ շուրջերկրյա ճանապարհորդություն՝ այս անգամ կնոջ հետ անցնելով 116 երկրներով մեքենայով (մոտ 245 հազար կիլոմետր): Եվ սա մի մարդ է, ով ունի սեփական միջազգային ապրանքահումքային բորսայի ինդեքսը՝ RICI-ն: Նա նաև մի քանի գրքերի հեղինակ է, որոնք նվիրված են նրա ճանապարհորդություններին և ներդրումներին: Նրա վերջին գրքերից մեկը՝ «Նվեր իմ երեխաներին: Հոր խորհուրդները կյանքի և ներդրումների մասին» (A Gift to My Children: A Father’s Lessons For Life And Investing), նա գրել է 1999թ-ին, որն իրենից ներկայացնում է խորհուրդներ իր երկու աղջիկներին, ինչպես նաև աշխարհի մյուս բոլոր երեխաներին: Այս գրքից որոշ մեջբերումներ կանենք հոդվածի վերջում:

Ջիմ Ռոջերսը ծնվել է 1942թ-ին ԱՄՆ-ում: Ավարտել է Յալի համալսարանը (Yale University), ապա՝ Օքսֆորդը: Աշխատել է ֆինանսական ընկերություններում, ապա 70-ականների սկզբներին Ջորջ Սորոսի հետ միասին հիմնադրել է Quantum Fund-ը, որի գինն առաջին 10 տարիների ընթացքում աճել է 4200%-ով (S&P ինդեքսն այդ ընթացքում աճել է ընդամենը 50%-ով): 37 տարեկան հասակում Ջիմը որոշում է հանգստի անցնել և ճանապարհորդել: 2007թ-ից բնակվում է Սինգապուրում, կատարում է ներդրումներ ապրանքահումքային շուկաներում, ոսկում և որոշ չափով՝ արժեթղթերում:

Իր գրքերից մեկում Ռոջերսը գրում է.

«Ինչի՞ց սկսել մարդուն, ով երազում է հաջողության հասնել: Պատասխանը պարզ է. որքան հնարավոր է շատ տարբեր զբաղմունքներ փորձեք, ապա նվիրվեք նրան, որը ձեզ հոգեհարազատ է: Եթե դուք սիրում եք պատրաստել, ռեստորան բացեք: Սկսեք պարել, եթե դա ձեզ մոտ լավ է ստացվում: Այգի տնկեք, եթե ձեր հոգին դա է ուզում: Միգուցե մի օր դուք որոշեք ծաղկի խանութների ցանց բացել: Հաջողության հասնելու ամենաարագ ճանապարհն է. գտնել այն, ինչն ամենից շատն է ձեզ դուր գալիս և ամբողջությամբ նվիրվել դրան:»

«Նայեք դեպի ապագան: Մի կառչեք նրանից, ինչն արդեն անցյալում է: Կարևոր չէ, թե որքան ժամանակ, ջանք կամ գումար եք դուք ծախսել: Եթե ինչ-որ բան անցյալում է, դա արդեն անցյալում է ընդմիշտ: Եթե դուք ուզում եք հաջողության հասնել այս կյանքում, շեշտը դրեք նրա վրա, ինչի կենսունակության մեջ դուք համոզված եք»:

«Դուք կհանդիպեք մարդկանց, ովքեր ամեն կերպ կփորձեն հրահրել ձեզ առանց մտածելու ծախսել ձեր փողերը՝ բերելով նման փաստարկներ. «Միևնույնն է՝ մյուս կյանք հետդ չե՛ս տանի»: Երբ դուք ավելի հասուն դառնաք, հավանաբար կունենաք ընկերներ, ովքեր ամեն օր ճաշում են թանկ ռեստորաններում, գնում են տեխնիկայի վերջին նորույթները, անընդհատ թարմացնում են իրենց զգեստապահարանը՝ նորաձևության վերջին ճիչերով, և հանգստանում են շքեղ հանգստավայրերում: Շատ կարևոր է խուսափել գումարը վատնելու գայթակղությունից միայն նրա համար, որ դուք պարզապես այն ունեք: Անտեղի վատնումը ոչ միայն ֆինանսական աղետի սկիզբ է, այլ նաև վտանգ՝ մոռանալու այն մասին, թե ինչն է իրոք կարևոր կյանքում »:

Այսքանը Ջիմ Ռոջերսի մասին: Նրա ճանապարհորդությունների մասին (օրինակ՝ ուղին) և այլ ինֆորմացիա կարող եք գտնել նրա անձնական կայքում՝ jimrogers.com: Նրա՝ «Նվեր իմ երեխաներին: Հոր խորհուրդները կյանքի և ներդրումների մասին» գրքին կարող եք ծանոթանալ այստեղ:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

1 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»