Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքի միջոցով ես կփորձեմ ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար:


   


Անձնային աճ

Ինչպես աշխատել շատ և հանգստանալ շատ

Մարդու քունը զարմանալի բան է: Մինչև հիմա էլ գիտնականները «գլուխ են ջարդում» հասկանալու համար, թե ինչու են մարդիկ քնում: Վերջերս մի տեսանյութ էի դիտում, որտեղ գիտնականների կողմից վարկած էր առաջ քաշվում, որ քնի ամենակարևոր նշանակություններից մեկը երազներ տեսնելն է: Նրանք նույնիսկ փորձեր էին կատարել, որ երբ մարդը երազ չի տեսնում քնած ժամանակ, նա սկսում է դրանք տեսնել արթուն ժամանակ: Այսինքն, չքնելու դեպքում մարդու իրականությունն ընկալելու զգացումը խախտվում է և նա սկսում է խառը պատկերներ տեսնել: Ամեն դեպքում, այս հոդվածի նպատակը քնի բացահայտումը չէ, պարզապես անհրաժեշտ էր հասկանալ քնի կարևորությունը առաջ անցնելու համար:

Միանգամից պատասխանեմ գլխավոր հարցին՝ ինչպե՞ս անել, որպեսզի աշխատել շատ և հանգստանալ շատ: Անհրաժեշտ է քնել շուտ և արթնանալ շուտ: Հիշեք՝ շատ չի նշանակում արդյունավետ: Շատ աշխատել չի նշանակում արդյունավետ աշխատել և շատ հանգստանալ չի նշանակում արդյունավետ հանգստանալ: Պետք է հասկանալ երբ աշխատել և երբ հանգստանալ: Այստեղ ես չեմ պատրաստվում հարցին մոտենալ գիտականորեն կամ փաստերով (դա միգուցե անեմ մեկ այլ անգամ), այլ պարզապես ուզում եմ կիսվել իմ փորձով: Արդեն երկար ժամանակ է, ինչ ես երբեք չեմ աշխատում երեկոյան ժամը 21:00-ից հետո, քնած եմ լինում ժամը 23:00-ին և արթնանում եմ առավոտյան ժամը 5:00-6:00: Դա թույլ է տալիս անել ավելի շատ:

Առավոտյան արթնանալիս մարդու ուղեղը թարմ է, գիտակցությունը հստակ, ուժերը լի: Այդ ժամերին կարելի է այնքան գործ անել, որքան միգուցե չկարողանաս անել երեկոյան՝ եռապատիկ ժամանակում: Պարտադիր չէ, որ առավոտը սկսվի ժամը 8-ից: Պետք է սկսել այն ավելի շուտ, օրինակ, ժամը 6-ին: Այդ երկու ժամը կարող են լինել ձեր կյանքի ամենաարդյունավետ ժամերը՝ հատկապես, եթե դուք մտավոր աշխատանք ունեք անելու: Նույնիսկ եթե ոչ, ապա այդ ժամերին դուք կարող եք մարզվել, գիրք կարդալ կամ անել ցանկացած կիսատ գործ: Առավոտյան ժամերը հանգիստ են, ոչ ոք չի խանգարում, ձայները լռած են, հաճախ մութ է և ողջ ուշադրությունը կարելի է կենտրոնացնել գործի վրա: Դուք արթնանում եք շուտ, հասցնում եք անել շատ և նույնիսկ զգացողություն է առաջանում, որ ձեր օրը երկար է, հետևաբար «ապրում եք ավելի երկար»: Արդյունքը հետևյալն է. այն ժամին, երբ բոլորը դեռ նոր են արթնանում, դուք արդեն հասցրել եք շատ բան անել, դուք ունեք առավելություն:

Անցնենք երեկոյան ժամերին: Կարծում եմ ես չպետք է Ձեզ ասեմ, թե որքան հոգնած ենք մենք հաճախ լինում երեկոյան ժամերին: Ի՞նչ իմաստ ունի աշխատել այդ ժամերին, եթե աշխատած 2 ժամը իրականում 2 ժամ չէ. առավոտյան դուք կարող էիք այդ գործն ավելի արագ անել: Ավելի լավ չէ՞ այդ ժամանակը ծախսել հարազատների հետ շփվելու, զրուցելու, զբոսնելու կամ ֆիլմ դիտելու վրա: Լիցքաթափվեք օրվա վերջում, մոռացեք գործերի մասին: «Կարևոր գործեր» միշտ էլ լինելու են, փորձեք հավասարակաշռություն մտցնել գործերի և հանգստի միջև: Ես իմ համար ընտրել եմ ժամը 21:00-ն, որից հետո գործ չեմ անում, դուք միգուցե ընտրեք 20:00-ն կամ 21:30-ը, դա էական չէ: Կարևորը՝ քնել ոչ շատ ուշ: Երբ ես քնում եմ 23:00-ից հետո, շատ դժվար է լինում արթնանալ առավոտյան շուտ, օրգանիզմը դիմադրում է: Մի տեղ կարդացել եմ, որ մարդու ուղեղում ամենակարևոր գործողությունները տեղի են ունենում 23:00-ին և այդ ժամանակ մարդը պետք է քնած լինի (սա մի ընդունեք որպես փաստ) և հենց դրանից հետո որոշեցի այդ ժամին միշտ քնած լինել: 23:00-ին քնած լինելու դեպքում առավոտյան զարթուցչի կարիք նույնիսկ չի լինում. օրգանիզմը արթնացնում է քեզ ինքնուրույն (պարզապես պետք է դա սովորություն դարձնել, չհանձնվեք մեկ շաբաթ): Այնպես որ, կարգավորեք ձեր քունը, մի թողեք այն ինքնահոս: Դա ոչ թե սահմանափակում է, այլ հնարավորություն. հնարավորություն աշխատելու ավելի շատ և հանգստանալու ավելի շատ:

Հ.Գ.
Օրվա միջին հատվածը ղեկավարեք Ձեր հայեցողությամբ 🙂

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

2 մեկնաբանություն

  • Հրաչյա ջան, շատ արդիական է ինձ համար: Այնպիսի տպավորություն էր, որ իմ մտքերն եմ կարդում` միայն մեկ տարբերությամբ, դեռ չեմ արթնանում այդքան շուտ, բայց դա իմ to do ցուցակում է:`)

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»