Գրքեր անձնային աճի մասին

Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքերի միջոցով ես կփորձեմ Ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար: -Հ. Մանուկյան


   


Ստարտափ

Truthly.me. ի՞նչ կատարվեց առաջին երկու ամիսների ընթացքում

Այսօր կխոսեմ Truthly.me նախագծի և հետագա անելիքների մասին: Մոտ 2 ամիս առաջ եղավ կայքի պաշտոնական բետա բացումը: Բացումը նախատեսված էր այսպես. նախապատրաստել էինք մամլո հաղորդագրություն արտասահմանյան լրատվամիջոցների համար և գովազդ Ֆեյսբուք սոցիալական ցանցում՝ որպես թիրախ ընտրելով առանձին երկրներ: Առաջին շաբաթվա ընթացքում ունեցանք մոտ 400 գրանցում: Բացի մեր տարածած մամլո հաղորդագրությունից, որը հայտնվեց, օրինակ, Yahoo Finance-ում, նորության մասին սկսեցին գրել արտասահմանյան և հայկական մի շարք լրատվամիջոցներ. բավական ակտիվ էր իտալական մամուլը: Առաջիններից մեկը գրեց իտալական La Stampa-ն, որից հետո նորությունը հայտնվեց իտալական տասնյակ բլոգներում և լրատվամիջոցներում, սկսվեցին քննարկումներ և համեմատություններ:

Այդ մեկ-երկու շաբաթը բավական էր, որպեսզի ստանայինք բավական հզոր հետադարձ կապ: Ստացանք տասնյակ կարծիքներ, հատկապես թերությունների և անհարմարությունների հետ կապված, վերլուծեցինք գրանցված օգտատերերի պահվածքը և հասկացանք, թե որ ուղղությամբ պետք է շարունակենք: Ստեղծեցինք արհեստական դադար, կանգնեցրեցինք գովազդները, ժամանակավոր հրաժարվեցինք մարքեթինգից և սկսեցինք փոփոխություններ կատարել: Առաջինը փոխվեց դիզայնը, ուժեղացրեցինք ինտեգրումը սոցիալական ցանցերի հետ, մարդկանց տվեցինք հնարավորություն ցանկության դեպքում հրապարակել իրենց գաղտնի նամակները, և տարբեր այլ փոփոխություններ: Հիմա էլ, երբ գրում եմ այս տողերը, փոփոխությունները դեռ շարունակվում են: Իտալացիների ակտիվությունը (գրանցվածների կեսը հենց նրանք են) ցույց տվեց, որ պետք է կայքում ավելացնել լեզուներ: Սկզբում նախատեսում ենք ավելացնել ռուսերեն, իտալերեն, ֆրանսերեն և չիներեն: Իմիջիայլոց, չինական շուկայի հետ կապված նույնպես մեծ հույսեր կան, քանի որ Չինաստանում ինտերնետից օգտվողների ընդհանուր լսարանը և մարդկանց պահվածքն այլ է, քան ասենք ԱՄՆ-ում կամ Եվրոպայում և մեր նախագծին ավելի համապատասխան:

Ամենակարևորը՝ հստակեցրինք նախագծի բիզնես մոդելը, այսինքն հասկացանք, թե ինչպես է այն գումար աշխատելու: Եթե կարճ, այն գումար է աշխատելու բիզնեսների հաշվին, քանի որ խնդիրը, որը լուծում է նախագիծը, կա ընկերությունների մեծ մասում: Իսկ խնդիրը հետևյալն է. շատ ընկերություններում աշխատողները չեն կարողանում ազատ շփվել մենեջերների և ղեկավարության հետ, չեն կարողանում ասել այն, ինչ իրոք ուզում են ասել, իսկ դա առաջացնում է ներքին լարվածություն, թողնում է բազմաթիվ անպատասխան հարցեր և արդյունքում՝ ընկնում է աշխատանքի արդյունավետությունը: Նույն երևույթը կա նաև այլ հաստատություններում, օրինակ, հիվանդանոցներում: Սթիվ Բլանկի «Ստարտափ: Հիմնադրի սեղանի գիրք» գրքում պատահական աչքովս ընկավ մի պարբերություն, որտեղ ասվում էր, որ վիրաբուժական բաժնի բուժքույրերը հնարավորություն չեն ունենում խոսել այն սթրեսի մասին, որն իրենք ապրում են աշխատանքի վայրում և չեն կարողանում քննարկել դա բժիշկների հետ, քանի որ վախենում են խոսակցությունների տարածումից և իրենց աշխատանքի հանդեպ դժգոհություններից: Եվ հայտնվեցին որոշ ծառայություններ, որոնք հնարավորություն տվեցին այդ շփումն իրականացնել անանուն: Իրոք հետաքրքիր թիրախ է անանուն շփման համար: Բժիշկների հետ կապված նաև այլ միտք ունենք՝ ավելացնել անանուն խորհրդակցություն բժշկի հետ ծառայությունը, որը նույնպես կլինի վճարովի: Նույնը կարելի է անել, ասենք, իրավաբանների հետ:

Այս ամենի ուղղությամբ դեռ աշխատում ենք և միաժամանակ սկսել ենք դիմել արտասահմանյան տարբեր աքսելերատորներ: Օրինակ, արդեն 2-րդ անգամ դիմում ենք Y Combinator: Այս պահին նպատակն ավելի շատ ոչ թե ներդրումներ ներգրավելն է, այլ կապեր հաստատելը, ոլորտի մարդկանց հետ շփվելը, հետադարձ կարծիքներ ստանալը և նախագծի մոդելը հստակեցնելը: Եվ դրանից հետո միայն, եթե զգանք անհրաժեշտությունը, կսկսենք ակտիվ զբաղվել ներդրումներով:

Առայժմ այսքանը: Նախագծի ընթացքի մասին կշարունակեմ տեղեկացնել: Նաև` հաճույքով կլսեմ Ձեր կարծիքները:

Հեղինակի մասին

Հրաչյա Մանուկյան

Անձնային աճի գծով հեղինակ, Հաջողության բլոգի հիմնադիր, «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերի հեղինակ:

7 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»