Գրքեր անձնային աճի մասին

Մարդը պետք է անընդհատ աճի: Այդ աճը կարող է լինել գծային, հարթության մեջ և տարածական: Սովորաբար մենք աճում ենք գծային եղանակով: Այդ գիծը կոչվում է մասնագիտություն: Երբ մենք շեղվում ենք մասնագիտությունից, սկսում ենք զբաղվել նաև հոբբիներով, ժամանակ ենք տրամադրում ինքնազարգացմանը, նոր գիտելիքներ ենք ձեռք բերում, որոնք կապ չունեն մեր հիմնական աշխատանքի հետ, մենք սկսում ենք աճել հարթության մեջ: Դա արդեն լավ է: Այս գրքերի միջոցով ես կփորձեմ Ձեր մեջ տարածական աճելու ցանկություն արթնացնել: Երրորդ առանցքը մտածողությունն է: Այն զարգանում է, երբ դուք ազատ ժամանակ եք ունենում ոչնչով չզբաղվելու, պարզապես մտածելու համար: -Հ. Մանուկյան


   


Անձնային աճ Հոգեբանություն

Ոգևորված կամ հուսահատված վիճակում որոշումներ մի կայացրեք

Զգացմունքներ
Հեղինակ՝ Մանե

Կյանքն անընդհատ փոխվում է: Ավելի հաճախ՝ փոխվում է դրա հանդեպ մեր վերաբերմունքը: Երբեմն այն մեզ ոգևորում է, երբեմն՝ հուսահատության գիրկը գցում: Առավոտյան մենք կարող ենք արթնանալ մեծ ոգևորությամբ, սակայն պառկենք քնելու՝ հուսահատված: Ոգևորությունն ու հուսահատությունը մեր զգացմունքային դաշտի երկու հակադիր բևեռներն են: Մեկը ընկալվում է որպես դրական, մյուսը՝ բացասական: Մեկի ազդեցության տակ մենք ուզում ենք սարեր շուռ տալ, մյուսի ազդեցության տակ՝ անկողնուց դուրս չգալ:

Զգացմունքային երկու վիճակներն էլ ազդում են իրականության՝ մեր ընկալման վրա: Դա է պատճառը, որ պետք չէ կարևոր որոշումները կայացնել ո՛չ ոգևորված, ո՛չ էլ հուսահատված վիճակում: Ոգևորված վիճակում, իհարկե, կարելի է գործել, սակայն միայն այն որոշումների հիման վրա, որոնք կայացվել են զգացմունքային հավասարակշռված, հանդարտ վիճակում: Ոգևորությունը սովորաբար հայտնվում է այն ժամանակ, երբ մենք կարճաժամկետ որևէ արդյունք ենք ունենում: Սակայն կարճաժամկետ արդյունքի ազդեցության տակ մենք ուզում ենք կայացնել որոշումներ, որոնք երկարաժամկետ ազդեցություն են թողնում, տեղեկատվության ամբողջական վերլուծություն են պահանջում կամ էլ ընդհանրապես կապված չեն ոգևորության աղբյուրի հետ: Օրինակ՝ իր արտաքինի հասցեին գովեստի խոսքերից ոգևորված աղջիկը կարող է որևէ գործնական որոշում կայացնել, որի հետևանքները հնարավոր չի լինի կանխել, երբ ոգևորությունն անցնի: Կամ կարճաժամկետ ֆինանսական հաջողությունից ոգևորված տղամարդը կարող է ֆինանսական որոշում կայացնել, որը խելամիտ չի թվա, երբ իրավիճակը հաջորդ օրը վերլուծես:

Զգացմունքների ազդեցության տակ կայացրած յուրաքանչյուր չորս որոշումներից երեքի համար ավելի ուշ զղջացել եմ: Իսկ այն մեկ որոշումը կկայացնեի, նույնիսկ եթե հանգիստ վիճակում լինեի /Հ. Մանուկյան/:

Նույնը վերաբերվում է հուսահատությանը: Շատերը որոշումներ են կայացնում հուսահատված ժամանակ՝ փոխարենը դադար տալու՝ սպասելու, որ հուսահատությունը նահանջի (նվազի): Հուսահատված վիճակում նույնպես կարելի է (հաճախ՝ պետք է) գործել, սակայն ոչ այն որոշումների հիման վրա, որոնք կայացվել են հուսահատության գագաթնակետում: Որքան էլ հուսահատությունը երկար տևի և որքան էլ պատճառները լուրջ լինեն, միշտ էլ լինում են պահեր, երբ ուղեղը հանգիստ է, զգացմունքները հետին պլանում են: Կարևոր որոշումները պետք է կայացնել այդ հոգեվիճակում:

Հիշեք՝ երկու վիճակների հետ կապված էլ սկզբունքը նույնն է՝ պետք է թույլ տալ, որպեսզի զգացմունքները հանդարտվեն, ուղեղը հանգիստ լինի, ապա որոշումներ կայացնել: Զգացմունքային տատանումներից մինչև խելամիտ որոշում Ձեզ բաժանում է 8-ժամյա քունը:

Հ.Գ.
Ոգևորությունը չէ, որ շատերին ստիպում է ռիսկի դիմել, անել այն, ինչն ուրիշները չէին անի: Շարժիչ ուժը մարդու մտածելակերպն է, ապրելակեպը, տեսլականը:

Հեղինակի մասին

Մանե

Մենք գործում ենք 2009 թ. ից: Մենք գրում ենք անձնային աճի մասին և ներկայացնում ենք «Փոխիր կյանքդ», «Կամքի ուժ. ինչպես ղեկավարել սովորությունները» և «Ստանդարտ մտածելակերպի սահմաններից դուրս» գրքերը:

2 մեկնաբանություն

Մեկնաբանել

error: Կյանքն ավելի հրաշալի է, երբ ստեղծում ես սեփական «բովանդակությունը»